Posted in Articles, Miracles of JESUS

இயேசு செய்த புதுமைகள் 4 : பேயை விரட்டுதல்

Image result for demon possessed man in synagogueலூக்கா 4 : 31 முதல் 37 வரை

***

இயேசு கலிலேயாவிலுள்ள கப்பர்நாகும் ஊருக்குச் சென்று, ஓய்வு நாள்களில் மக்களுக்குக் கற்பித்து வந்தார். அவருடைய போதனையைக் குறித்து அவர்கள் வியப்பில் ஆழ்ந்தார்கள். ஏனெனில் அவர் அதிகாரத்தோடு கற்பித்தார்.

தொழுகைக் கூடத்தில் தீய ஆவியான பேய் பிடித்திருந்த ஒருவர் இருந்தார். அவரைப் பிடித்திருந்த பேய், “ஐயோ! நாசரேத்து இயேசுவே, உமக்கு இங்கு என்ன வேலை? எங்களை ஒழித்துவிடவா வந்தீர்? நீர் யார் என எனக்குத் தெரியும். நீர் கடவுளுக்கு அர்ப்பணமானவர்” என்று உரத்த குரலில் கத்தியது.

“வாயை மூடு, இவரை விட்டு வெளியே போ” என்று இயேசு அதனை அதட்டினார்.

அப்பொழுது பேய் பிடித்தவரை அவர்கள் நடுவே விழச்செய்து, அவருக்கு ஒரு தீங்கும் இழைக்காமல் பேய் அவரைவிட்டு வெளியேறிற்று.

எல்லாரும் திகைப்படைந்து, “எப்படிப் பேசுகிறார், பாருங்கள்! அதிகாரத்தோடும் வல்லமையோடும் தீய ஆவிகளுக்குக் கட்டளையிடுகிறார்; அவையும் போய்விடுகின்றனவே!” என்று ஒருவரோடு ஒருவர் பேசிக் கொண்டனர். அவரைப்பற்றிய பேச்சு சுற்றுப்புறமெங்கும் பரவியது.

***

இயேசு ஆலயத்தில் போதிக்க வந்தார். அவரது சொந்த ஊரான நாசரேத்தில் அவருக்கு மரியாதை இல்லை. “இறைவாக்கினருக்கு சொந்த ஊரில் மரியாதை இருக்காது” என இயேசுவே சொன்னார். இப்போது அவர் வந்திருப்பது பக்கத்து ஊரான கப்பர்நகூமுக்கு. அங்கே அவருக்கு மிகப்பெரிய மரியாதை.

இயேசுவின் போதனை வழக்கமான மதவாதிகளின் போதனை போல இருக்கவில்லை. அதிகாரப் பூர்வமான போதனையாய் இருந்தது. அவர் இறைமகனாய் இருந்ததால் நேரடியாக இறைவனின் சிந்தனைகளை மக்களிடம் பகிர்ந்து கொண்டார். அவற்றைக் கேட்ட மக்கள் வியந்தனர்.

அது ஒரு ஓய்வு நாள் ! இயேசு ஓய்வு நாளுக்கும் ஆண்டவர். அந்த நாளை வைத்து மக்களை கஷ்டப்படுத்தும் மதவாதிகளின் செயலை அவர் விரும்பவில்லை. ஓய்வு நாளிலும் நன்மை செய்வதை அவர் வழக்கமாக்கிக் கொண்டிருந்தார். சொல்லப் போனால் ஓய்வு நாளில் இன்னும் அதிகமாய் நன்மை செய்தார். மக்களின் கலங்கிய மனதுக்கு ஓய்வு கொடுத்தார்.

இங்கும் ஒரு பேயை விரட்டுகிறார். அந்த மனிதன் நலமடைகிறான். அந்த நிகழ்வு மக்களை திகைப்பிலும் வியப்பிலும் ஆழ்த்துகிறது.

இந்த நிகழ்வு பல சிந்தனைகளை நமக்குள் எழுப்புகிறது. பல ஆன்மீக கேள்விகளையும் நமக்குள் ஒலிக்க வைக்கிறது
Image result for demon possessed man in synagogue art1. இயேசுவின் போதனைகள் அதிகாரமுடையவையாய் இருந்தன. அவரிடமிருந்து வல்லமையான வார்த்தைகள் வந்தன. முதலில் வல்லமையாய் இருந்த வார்த்தைகளை மக்கள் கண்டனர். கடைசியில் அந்த வார்த்தைகளுக்கு இருந்த வல்லமையைக் கண்டனர். இயேசுவின் வார்த்தைகள் பேயை பதறியடித்து ஓட வைக்கிறது. இறை வார்த்தைகள் நமக்குள் எத்தகைய மாற்றத்தைக் கொண்டு வருகின்றன. நமக்குள் இருக்கும் பேயையோ, தீய எண்ணங்களையோ இறை வார்த்தை விரட்டுகிறதா ? அத்தகைய வல்லமையான வார்த்தைகளால் நமது இதயத்தை தினமும் தூய்மை செய்கிறோமா ?

Image result for demon possessed man in synagogue art2. ஆலயத்தில் இருந்த நபருக்குள் தீய ஆவி இருக்கிறது. ஆலயத்துக்குள் தீய ஆவிகள் நுழையாது என்பார்கள். இங்கே ஆலயத்தில் இருக்கும் ஒரு மனிதனுக்குள் தீய ஆவி இருக்கிறது. இன்றும் நமது ஆலயங்களில் தீய ஆவிகள் நிரம்பிய மனிதர்கள் இருக்கலாம். பிரிவினை ஆவிகள், பொறாமை ஆவிகள், கோப ஆவிகள், இச்சையின் ஆவிகள் நிரம்பிய மனிதர்கள் இருக்கலாம். அவர்களை சாதாரண செய்திகள் அசைப்பதில்லை. இயேசுவைப் போன்ற வலிமையான போதனைகள் உலுக்கி எடுக்கின்றன. நமது வாழ்க்கையில் ஆவிகள் நுழையாது என நினைக்கின்ற இடங்கள் இருக்கின்றனவா ? எனது இல்லத்தில் நுழையாது, எனது வேலையில் நுழையாது, எனது ஆன்மீகவாழ்க்கையில் நுழையாது எனும் அதீத நம்பிக்கையில் இருக்கிறோமா ? அதை விட்டு விடுவோம். தீய ஆவிகள் நுழையாமல் மனதை கவனமாய்ப் பாதுகாப்போம்.

Image result for demon possessed man in synagogue art3. இயேசு பேய் பிடித்திருந்தவரை எதுவுமே சொல்லவில்லை. ஆனால் இயேசுவின் போதனைகள் அந்த மனிதருக்குள் இருந்த பேயை குத்தியது. பேயால் அமைதியாய் இருக்க முடியவில்லை. அது தாமாகவே பேச ஆரம்பிக்கிறது. வலிமையான வார்த்தைகள் பேய்களை பேச வைக்கும். இயேசு முன்னால் நின்றால் தீமை அங்கே நிற்க முடியாது. தீமை பதறியே ஆகவேண்டும். ஒளியும் இருளும் ஒரே இடத்தில் நில்லா ! இயேசுவும் பிசாசும் ஒரே இடத்தில் நில்லா ! நமது இதயத்தில் இருக்கின்ற பேய்களைப் பேசவைக்கும் செய்திகளை நாம் கேட்கிறோமா ? இல்லை அவற்றுக்கு பொழுதுபோக்கு தரும் செய்திகளைக் கேட்கிறோமா ?

Image result for demon possessed man in synagogue art4. அந்த பேய் முதலில் ஐயோ ! என்கிறது. இயேசுவை நேரடியாகப் பார்க்கும்போது நமது பதில் எப்படி இருக்கிறது ? “ஹையா” எனும் பரவசமா ? “ஐயோ” எனும் பதட்டமா ? நமது வாழ்க்கை இறைவனுக்கு ஏற்புடையதாய் இருந்தால் பதில் பரவசமாய் இருக்கும். ஏற்புடையதால் இல்லையேல் அச்சமாய் இருக்கும். இரண்டாம் வருகை வருகையில் நமது பதில் எப்படி இருக்கும் என்பதை சிந்தித்துப் பார்ப்பது அவசியம். நமது வாழ்க்கை இயேசுவை நேரடியாகச் சந்திக்கும் போது ஒரு பரவச அனுபவமாய் இருப்பதே ஆன்மீக வாழ்வின் வளர்ச்சிக்கான அடையாளம்.

அதே நேரத்தில் நமது வாழ்க்கைப் பயணத்தில், இயேசுவின் வார்த்தைகள் நம் உள்ளத்தைத் தொடும் போது, “ஐயோ” நான் பாவியாய் இருக்கிறேனே எனும் உணர்வு எழவேண்டியதும் அவசியம். அது தான் இறுதியில் இறைவனைக் காணும்போது ஐயோ என பதட்டமடையாமல் இருக்க உதவும்.

Image result for demon possessed man in synagogue art5. இரண்டாவதாக “நாசரேத்து இயேசுவே” என்கிறது பேய். இயேசுவின் மனிதத் தன்மையை அது பறைசாற்றுகிறது. அவர் ஒரு வரலாற்று மனிதன் என்பதை ஒத்துக் கொள்கிறது. இயேசுவின் மனிதத் தன்மையை ஒத்துக் கொள்ளும் போது தான் அவரை நமது “முன்மாதிரி” யாகப் பார்க்க முடியும். நம்மைப் போல சோதனைகளின் வழியாய்ப் பயணித்து அவற்றைக் கடந்தவர் என ஏற்றுக் கொள்ள முடியும். எனவே நமது வாழ்க்கையில் இயேசுவை, முழுமையான மனிதர் என ஒத்துக் கொள்வதில் தெளிவு வேண்டும்.

Image result for demon possessed man in synagogue art6. “உமக்கு இங்கு என்ன வேலை” என மூன்றாவதாய் பேய் பேசுகிறது. இயேசுவை ஏற்றுக் கொள்ளாத மனநிலை. சாத்தானின் செயல்களும், ஆண்டவரின் செயல்களும் எதிர் எதிர் துருவங்கள். அவை ஒரு இடத்தில் இருக்க முடியாது. நமது வாழ்க்கையிலும் நாம் இயேசுவை நோக்கி இதே கேள்வியை பல தடவை கேட்கிறோம். “இயேசுவே எனது அலுவலக வாழ்க்கையில் உமக்கு என்ன வேலை ?” , “எனது ஹாபியில் உமக்கு என்ன வேலை ?”, “எனது சோசியல் மீடியா நேரத்தில் உமக்கு என்ன வேலை ?” என இயேசுவை பிரிக்கிறோம். ஞாயிறு பயணத்தில் இயேசுவை ஏற்றிக் கொண்டு, திங்கட்கிழமை அவரை இறக்கி விட்டுப் பயணிக்கிறோம். நமது வாழ்வின் ஒவ்வொரு பகுதியிலும் இறைவன் இருக்கும் நிலையே உயர் நிலை.

Image result for demon possessed man in synagogue art7. “எங்களை ஒழித்து விடவா வந்தீர் ?” இந்தக் கேள்வியையும் நாம் பல வேளைகளில் இயேசுவை நோக்கிக் கேட்கிறோம். நமது உலகின் போக்கில் வாழும் வாக்கையை இறைவன் ஒழிக்கும் போது தான் இறை வாழ்க்கை நமக்கு வசப்படும். இயேசுவின் வார்த்தைகளும், வாழ்க்கையும் நமது சொகுசான சிற்றின்ப வாழ்க்கையை ஒழிக்க வேண்டும். அதை நாம் விரும்புவதில்லை. இவ்வுலகில் நமது விருப்பம் போன்ற வாழ்க்கை, மறு உலகில் இயேசு தரும் வாழ்க்கை. இரண்டும் வேண்டும் என நினைக்கிறோம். விதைக்காத இடத்தில் பயிர் வளர்வதில்லை. பெய்யாத இடத்தில் மழை நனைப்பதில்லை என்பதை மறந்து விடுகிறோம்.

Image result for demon possessed man in synagogue art8. “நீர் யார் என எனக்குத் தெரியும். நீர் கடவுளுக்கு அர்ப்பணமானவர்” என இயேசு இறைவனின் மகன் என சாட்சி சொல்கிறது பேய். தலைவர்களெல்லாம் இயேசு “பேய்களின் தலைவனைக் கொண்டு பேயோட்டுவதாய்” குற்றம் சாட்டியபோது, பேய் சொல்கிறது இவர் இறைமகன் என்று. சாத்தான் வேதம் ஓதுகிறது. இயேசு கடவுள் என அறிக்கையிடுகிறது. ஆனால் இயேசு அதை விரும்பவில்லை” பேசாதே, இவனை விட்டுப் போ” என்கிறார். நமது வாழ்க்கை இறைவனோடு இணைந்து இருந்தால் மட்டுமே அவரைப் பற்றி அறிக்கையிடுவதை இயேசு விரும்புகிறார். இல்லையேல் அவர் அதை நிராகரிக்கிறார். தனது சீடர்கள் தன்னைப் பற்றி சரியான புரிதல் இல்லாமல் பேசுவதையும் ஏற்றுக் கொள்ளும் இயேசு, பேய் உண்மையைச் சொன்னாலும் கேட்க நிற்பதில்லை. நமது வாழ்க்கை இறைவனோடு இணைந்து இருக்கிறதா ? எனில் மட்டுமே நற்செய்தி அறிவித்தல் இயேசுவுக்கு ஏற்புடையதாகும்.

Image result for demon possessed man in synagogue art9. பேய் பிடித்தவனை கீழே தள்ளி விட்டு பேய் செல்கிறது. பேய் சென்றபின் உணர்வு வரும் மனிதன் தான் கீழே கிடப்பதை உணர்கிறார். நமது வாழ்க்கையிலும் நம்மைப் பிடித்திருக்கின்ற பேய்கள் வெளியேறும் போது நாம் விழுந்து கிடப்பதை உணர்கிறோம். பேயுடன் இருக்கும் வரை நமது பாவத்தைக் குறித்த உறுத்தல் வருவதில்லை. நாம் பாவத்தில் விழுந்து கிடப்பதை உணர்வதில்லை. இயேசுவின் வார்த்தை நமது இதயத்தில் இருக்கும் பேய்களை விரட்டும் போது தான் நாம் விழுகிறோம். விழுதலே எழுதலின் முதல் படி.

Image result for demon possessed man in synagogue art10. மக்கள் திகைக்கின்றனர். அதிகாரம் கொண்ட வார்த்தைகள், வார்த்தைகளில் இருந்த அதிகாரம் இரண்டும் அவர்களை திகைக்கச் செய்தது. மனிதர்களோடான உரையாடல் அவரை ஒரு மனிதராய் அடையாளம் காட்டியது. ஆனால் பேய்களோடும், இயற்கையோடும் இயேசு செய்த உரையாடல்கள் அவரை இறைத் தன்மை உடையவராகக் காட்டியது. இயேசு இறைமகன் என்பதை மக்கள் நம்ப இந்த நிகழ்ச்சி ஒரு காரணமானது.

இந்த சிந்தனைகளை மனதில் கொள்வோம். நமது மனதை இறைவனின் வார்த்தைகளினால் புதுமை செய்வோம்.

*

Advertisements

உங்கள் கருத்தைச் சொல்லலாமே...

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s