Posted in Articles, WhatsApp

எதற்கெல்லாம் வெட்கப்பட வேண்டும் ?

எந்தெந்தச் சூழலில்
நாணம் காக்கவேண்டும் என
உங்களுக்குக் கூறுவேன்;
சில வேளைகளில்
நாணம் காப்பது நல்லதல்ல;
எல்லாவகை நாணத்தையும்
ஏற்றுக்கொள்ளலாகாது.

சீராக் : 41 : 16

Image result for lustful look art

நாணமும், வெட்கமும் அவசியமானவை. ஆனால் பல நேரங்க்ளில் நாம் சரியான விஷயத்துக்காக வெட்கப்படுவதில்லை. பிறரைப் போல அழகாய் இல்லை, உயரமாய் இல்லை, என்பதற்கெல்லாம் வெட்கப்படுகிறோம். பிறரைப் போல படிக்கவில்லை, சம்பாதிக்கவில்லை என்பதற்காய் வெட்கப்படுகிறோம். சில இடங்களில் நாம் கிறிஸ்தவன் என்பதைச் சொல்லவே வெட்கப்படுகிறோம். பிள்ளைகள் படிக்கவில்லையெனில் வெட்கப்படுகிறோம். இவையெல்லாம் தேவையற்ற வெட்கங்கள்.

நாணம் எப்போது நல்லதாகிறது, எப்போது தீயதாகிறது என்னும் தெளிவான போதனையை சீராக்கின் நூல் 41வது அதிகாரத்தில் தருகிறது. எல்லா நாணமும் நல்லதல்ல, எல்லா நாணமும் கெட்டதல்ல. சில இடங்களில் நாணம் அவசியம், சில இடங்களில் நாணம் அநாவசியம். சீராக் என்ன சொல்கிறது ?

1. தாய் தந்தையர் முன், கெட்ட நடத்தை பற்றி நாணம் கொள்ளுங்கள்.

தனது தவறுகளுக்கு நியாயம் கற்பிக்கும் பிள்ளைகள் வாழ்க்கையில் நேரிய வழியில் நடப்பதில்லை. தங்களுடைய தவறான நடத்தைகளுக்காக வெட்கமடைந்து, தன் பெற்றோருக்கு இத்தகைய மன வருத்தத்தைக் கொடுத்து விட்டேனே என உணரும் பிள்ளைகள் சரியான வழிக்குத் திரும்புவார்கள்.

2. ஆட்சியாளர் முன்னும் வலியோர் முன்னும் பொய்யைப் பற்றி வெட்கப்படுங்கள்.

பொய் பேசும் உதடுகளை இறைவன் அருவருக்கிறார். பொய் எந்த சூழலில் எப்படி சொல்லப்பட்டாலும் அது இறைவனை மகிழ்ச்சிக்கு உள்ளாக்குவதில்லை. பொய் சொல்லிவிட்டேனே என ஆட்சியாளர் முன் நிற்கும் போது நாணம் அடைய வேன்டும். இறைவனுக்கு முன்னால் பொய்யனாக நிற்க வெட்கப்பட வேண்டும்.

3. நடுவர்முன்னும் ஆளுநர் முன்னும் குற்றத்தைப் பற்றி வெட்கப்பட வேண்டும்.

நமது பிழைகள் குற்றங்கள் நம்மை தண்டனைத் தீர்ப்பின் வாசலில் கொண்டு நிறுத்தும். நாம் தவறு செய்துவிட்டோம் எனும் உறுத்தலும், இனியேனும் தவறிலிருந்து விடுபடவேண்டும் எனும் தீர்மானமும் மிக அவசியம். அத்தகைய சிந்தனையற்ற மனம் இறுகிய இதயத்தின் வெளிப்பாடு.

4. தொழுகைக் கூடத்திலும் மக்கள் முன்னும் சட்ட மீறல்பற்றி வெட்கப்பட வேண்டும்.

திருச்சட்ட மீறல் என்பது இறைவனுடைய கட்டளைகளுக்கு எதிராகச் செயல்படுவது. அவருடைய போதனைகளுக்கு எதிராகச் செயல்பட்டேனே என்பதை உணர்ந்து திருச்சபைக்கு முன்பும், மக்களுக்கு முன்பும் நாம் நாணமடைய வேண்டும். அந்த நாணம் நம்மை மனம் திரும்ப வைக்க வேண்டும்.

5. தோழர் முன்னும் நண்பர் முன்னும் அநீதிபற்றி வெட்கப்பட வேண்டும்.

இங்கே அநீதி என்பது நட்புக்கு விளைவிக்கின்ற களங்கம் எனலாம். நம்பிக்கையின் வேர்களில் பாதரசம் ஊற்றும் மனநிலையை விட்டு விலகவேண்டும். நண்பர்களும், தோழர்களும் நமது வாழ்வின் முக்கிய பாகங்கள். அவர்களுக்கு எதிரான செயல்பாடுகளை விட்டு விட வேண்டும்.

6. வாழ்கின்ற இடத்தில் திருட்டைப்பற்றி வெட்கப்பட வேண்டும்.

வாழ்கின்ற இடம் என்பது நமது சூழலாக இருக்கலாம், நமது அலுவலகமாக இருக்கலாம், நமது தங்குமிடமாக இருக்கலாம். திருட்டு என்பது பொருளாகவோ, அலுவலக நேரமாகவோ எதுவாக வேண்டுமானாலும் இருக்கலாம். நியாயமாக பிறருக்குக் கிடைக்க வேண்டிய எதையும் நாம் அபகரிக்கக் கூடாது என்பது இதன் சுருக்கமான விளக்கமாகக் கொள்ளலாம்.

7. ஆணையையும் உடன்படிக்கையையும் முறித்தல்பற்றி வெட்கப்பட வேண்டும்.

“சொன்ன சொல்லைக் காப்பாற்றுவேன்” எனும் பற்றுறுதி இந்தக் காலத்தில் மறைந்து வருகிறது. ஒரு காலத்தில் பத்திரம், ஒப்பந்தம் எதுவும் இல்லாமல் “ஒற்றைச் சொல்லுக்கு” மதிப்பு கொடுத்தே காரியங்கள் நடக்கும். அதில் அத்து மீறல்களே நடக்காது. நமது ஆணைகள், உடன்படிக்கைகள் போன்றவற்றை மீறா மனநிலை வேண்டும்.

8. உணவு மேசை மீது உன் முழங்கைகளை வைப்பதுபற்றி வெட்கப்பட வேண்டும்.

இது ஒரு சின்ன விஷயமாக இருக்கலாம். ஆனால் இது சொல்கின்ற பொருள் என்னவெனில் நாம் கற்றுக்கொள்ள வேண்டிய அடிப்படை சபை மரியாதைகளை கற்றுக் கொள்ளவில்லை என்பதாகும். அதற்காக நாம் வெட்கப்படவேண்டும்.

9. கொடுக்கும்போதும் வாங்கும்போதும் மதியாமை பற்றி வெட்கப்படவேண்டும்.

பல நேரங்களில் நாம் பிறருக்குக் கொடுக்கும் போது அலட்சியத்துடன் கொடுப்பதுண்டு. வாங்கும் போதும் பல நேரங்களில் ‘அது அவர்களின் கடமை’ என்பது போல நடந்து கொள்வதுண்டு. பிறருக்குக் கொடுக்குமளவுக்கு நம்மை வைத்திருக்கும் இறைவனை நன்றியுடன் நினைத்தால் மதியாமை மறையும், மதி நிறையும்.

10. வணக்கம் செலுத்துவோர்முன் அமைதி காத்தல் பற்றி வெட்கப்படவேண்டும்.

சில உயரதிகாரிகளைப் பார்த்திருக்கிறேன். அவர்களை நோக்கி பணியாளர்கள் வணக்கம் வைத்தால் பதிலுக்கு ஒரு புன்னகை கூட கொடுக்காமல் அமைதியாய் சென்று விடுவார்கள். நமக்கு வணக்கம் செலுத்துவோருக்கு பதில் வணக்கம் செலுத்துவதோ, அல்லது அன்புடன் புன்னகைப்பதோ மிகவும் அவசியம் என்கிறது சீராக் நூல்.

11. விலைமாதரை நோக்குவதுபற்றி வெட்கப்பட வேண்டும்.

பாலியல் ஒழுக்கம் என்பது மிகவும் கடினமானதும், தேவையானதும் என்பதை விவிலியம் வலியுறுத்துகிறது. விலைமாதரின் வழிகளில் செல்லாமல் இருக்க வேண்டியது அவசியம். அதே நேரத்தில் விலைமாதரையும் மனிதர்களாய்க் காணவேண்டும். அவர்களை இழிவாய் நோக்குவது தவறு.

12 உறவினரின் விண்ணப்பத்தை புறக்கணிப்பது பற்றி வெட்கப்படவேண்டும்.

உறவினர்கள் நம்மை அணுகுவதன் காரணம், அவர்கள் நம் மீது வைக்கின்ற நம்பிக்கையே. அந்த நம்பிக்கையை உடைக்காமல் இருக்க வேண்டியது அவசியம். அவர்களுடைய மனதைப் புண்படுத்தாமல், உதவி செய்வது மிக மிக முக்கியம். பொருளாதாரத்தை விட உறவே பிரதானம் எனும் புரிதல் வேண்டும்.

13. அடுத்தவரின் பங்கையும் பரிசையும் பறித்துக்கொள்வதுபற்றி வெட்கப்பட வேண்டும்.

பிறருக்கு நியாயமாகக் கிடைக்க வேண்டிய அங்கீகாரத்தை இடையில் நின்று தட்டிப் பறிப்பது அலுவலக சூழல்களில் வெகு சகஜம். பிறருக்குக் கிடைக்க வேண்டிய பாராட்டை தனது வயலுக்கு வாய்க்கால் வெட்டிப் பாய்ச்சுவதும் வெகு சகஜம். அத்தகைய செயல்கள் தவறானவை.

14. மணமான பெண்ணை உற்றுநோக்குவதுபற்றி வெட்கப்படவேண்டும்.

திருமணம் எனும் பந்தம் இறைவனால் கட்டமைக்கப்பட்டது. அதிலுள்ள கணவன் மனைவியர் உறவே புனிதமானது. பிறன் மனை நோக்குதல் என்பது சமூக சட்டங்களுக்கே எதிரானது. இறை சட்டங்களுக்கோ மிக மிக எதிரானது. அந்த செயலுக்காய் வெட்கப்பட வேண்டும்.

15. அன்பளிப்பு வழங்கியபின் அவர்களை இகழாதே.

நண்பர்களுக்கு உதவிகள் வழங்கியபின், அல்லது அன்பளிப்புகள் வழங்கியபின் நமது மனநிலை எப்படி இருக்கிறது ? அவர்களுடைய நிலமைக்காக அவர்களை இகழ்கிறோமா ? அது மிகப்பெரிய பாவம். யாருக்கு உதவி செய்தாலும் அவர்களை சக மனிதராகக் காண வேண்டுமே தவிர இகழ்ச்சிக்குரியவராகப் பார்க்கவே கூடாது.

16. ஒருவருடைய பணிப் பெண்ணோடு தகாத பழக்கம் வைத்துக்கொள்வது பற்றி வெட்கப்படுங்கள்.

சக மனித அன்பும் கரிசனையும் மிக முக்கியம். நம்மை விட எளியவர்கள், நம்மையே நம்பியிருப்பவர்கள் போன்றோரை மிகவும் கண்ணியமாகவும் அன்பாகவும் நடத்த வேண்டும். எக்காரணம் கொண்டும் அவர்களுடைய இயலாமையை சுயநலத்துக்காகப் பயன்படுத்தக் கூடாது என்பதற்கான எச்சரிக்கை இது.

17. நீங்கள் கேள்வியுற்றதைத் திருப்பிச் சொல்வதுபற்றியும் இரகசியங்களை வெளிப்படுத்துவது பற்றியும் வெட்கப்படுங்கள்.

நம்மிடம் ஒருவர் ஒரு செய்தியைப் பகிர்கிறார் எனில் அதற்கு மிக முக்கியமான இரண்டு காரணங்கள் உண்டு. ஒன்று, நம்மை அவர் அந்த அளவுக்கு நெருக்கமானவராகக் கருதுகிறார். இரண்டு, நாம் இரகசியங்களை வெளியிடமாடோம் என அவர் நம்புகிறார். அந்த நெருக்கத்துக்கும், நம்பிக்கைக்கும் நாம் எதிரே நிற்கக் கூடாது.

*

4 thoughts on “எதற்கெல்லாம் வெட்கப்பட வேண்டும் ?

உங்கள் கருத்தைச் சொல்லலாமே...

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s