Posted in Articles

கிறிஸ்மஸ் என்பது நம்பிக்கை

5

கிறிஸ்மஸ் என்பது
நம்பிக்கை

கிறிஸ்மஸ்
நம்பிக்கையின் விழா.

காரிருளின் காலடிகளில்
துழாவித் திரிந்தவர்கள்
பரமனின்
பேரொளி கண்ட‌
தினம்.

கடவுளிடம்
வெளிச்சம் கேட்டவர்களிடம்,
கடவுளே வெளிச்சமாய்
வந்த தினம்.

மௌனத்தின் பள்ளங்களில்
புதைந்து கிடந்தவர்கள்
கீதத்தின்
பேரொலி கேட்ட‌
தினம்

சகதியே
கதியென்றிருந்தவர்களை
கரமொன்று
தூக்கி நிறுத்திய தினம்.

பதட்டத்தின்
பாய்மரப் பயணத்தில்,
நம்பிக்கையின் நங்கூரம்
தரையிறங்கிய தினம்.

கன்னியிடமும்
கனிவரும்,
விண்ணரசு
இனிவரும்
எனும் நம்பிக்கையின் தினம்.

கிறிஸ்மஸ்
நம்பிக்கை நிஜமான தினம்.

புறக்கணிக்கப்பட்ட‌
புற இனத்தாரிடம்
பரமன்
பரிவு காட்டுவாரெனும் நம்பிக்கை.

அகராதியிலிருந்தே
அகற்றப்பட்ட அடிமைகளை
ஆண்டவர்
அரவணைப்பார் எனும்
நம்பிக்கை !

வீதிகளிலிருந்து
விரட்டப்பட்ட ஒதுக்கப்பட்டோரை
விரல்களால் தீண்டி
விடுதலை தருவாரெனும்
நம்பிக்கை.

வீண் என வெறுக்கப்பட்ட‌
பாவிகளை
பந்தியில் அமர்த்தி
பசியாற்றுவாரெனும்
நம்பிக்கை.

பாவத்தின் பதுங்கு குழிகளில்
பயந்து கிடப்பவர்களை
மீட்பின்
எக்காளம் முழங்கி
எழுப்புவாரெனும் நம்பிக்கை.

நிராயுதபாணியாய்
நிர்மூலமாக்கப்பட்ட‌
பாலை இதயங்களிலும்
நீரூற்றை
புறப்படச் செய்வாரெனும்
நம்பிக்கை.

கடவுள்
விண்ணகத்தின் மேனியிலல்ல‌
மண்ணகத்தின்
வீதியிலும் வலம் வருவாரெனும்
நம்பிக்கை.

தீர்ப்பின் தொனியாயல்ல‌
மீட்பின் ஒளியாகவும்
இறைவன்
இறங்கி வருவாரெனும்
நம்பிக்கை.

மதத்தின் மதில் சுவர்களால்
பிரிக்கப்பட்ட‌
மனிதர்களை
ஆன்மிகத்தின் அழைகுரலால்
அரவணைப்பாரெனும்
நம்பிக்கை

அழுகுரலில்
நுரைகளிலிருந்தும்
மகிழ்வின்
முத்துகளை
மீண்டெடுப்பார் எனும் நம்பிக்கை.

அழையா விருந்தாளிக்கும்
நிலையாம் வாழ்வை
நல்குவாரெனும்
வலுவான நம்பிக்கை.

கிறிஸ்மஸ்
நம்பிக்கையை விதைக்கிறது.

நம்பிக்கை
விசுவாசத்தின் முதல் நிலை.
விசுவாசம்
செயல்களின் முதல் நிலை.
செயல்கள்
புனிதத்தின் முதல் நிலை.
புனிதம்
இறைவனின் சாயல் நிலை.

கிறிஸ்மஸ் நாளில்
நம்பிக்கை கொள்வோம்.

*

சேவியர்

உங்கள் கருத்தைச் சொல்லலாமே...

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s