Posted in Articles, Christianity, Desopakari

சிலுவைப் பாதையில் பெண்கள்

சிலுவைப் பாதையில் பெண்கள்

இன்றைய உலகில் பெண்கள் சிலுவை சுமந்து கொண்டு, சிலுவைப்பாதையில் நடக்கிறார்கள். சமூகமும், வாழ்க்கையும் அவர்களுடைய தோள்களில் சிலுவையைச் சுமத்துகின்றன‌. பிறருக்காகச் சிலுவை சுமக்கும் பணியே பெரும்பாலும் அவர்களுடைய தோள்களில் வலுக்கட்டாயமாய் திணிக்கப்படுகின்றன. அந்த சிலுவைப் பாதை வியர்வையும், கண்ணீரும், துயரமும் மிகுந்ததாக இருக்கிறது. ஆங்காங்கே சில சீமோன்கள் அவர்களுடைய துயரங்களில் சற்றே தோள் கொடுக்கின்றனர் . உழைப்பின் கரங்களை இழுத்துப் பிடித்து ஆணிகளால் அவர்களைத் துளைக்க பழியின் ஆணிகள் விழித்திருக்கின்றன. அவர்களது வெற்றிக் கால்களில் பொறாமையின் கூர் ஆணிகள் குத்திக் கிழிக்கின்றன.

பெண்களின் சிலுவைப்பாதையின் துவக்கம், அவர்கள் பெண்கள் எனும் அடையாளத்திலிருந்தே ஆரம்பமாகிறது. சிலுவை என்றால் என்ன என்பதைப் புரியும் முன்பே முதல் சிலுவை அவர்களுக்காய்ச் செய்யப்படுகிறது. அந்தச் சிலுவையைத் தங்களது பட்டாம்பூச்சிச் சிறகுகளுக்கு மேல் சுமந்து கொண்டு அவர்கள் பாதையெங்கும் இடறி விழுகின்றனர்.

உலகம் உதாசீனப்படுத்தினாலும், விவிலியத்தில் பெண்கள் சிறப்பிடம் பெறுகின்றனர். பெண்களை மதிக்காத ஆணாதிக்கச் சுழலிலேயே, பெண்களுக்கு விவிலியம் மிக முக்கியமான இடத்தைக் கொடுத்திருக்கிறது.  இயேசுவின் வாழ்க்கையிலும், மரணத்திலும், உயிர்ப்பிலும் பெண்களின் பங்களிப்பை நாம் முழுமையாக உணர முடியும்.

இயேசுவின் வாழ்க்கையின் ஒவ்வொரு காலகட்டத்திலும் பெண்களின் பங்களிப்பு எப்படி இருந்தது என்பதை அலசினால் வியப்பாகவே இருக்கிறது.

1. இயேசுவின் வாழ்க்கையில்

இயேசுவின் வாழ்க்கை முழுவதும் பெண்களின் மீதான கரிசனையும், அன்பும், அங்கீகாரமும் இருந்து கொண்டே இருந்திருக்கிறது எனும் வியப்பூட்டும் உண்மையை பைபிள் நமக்குச் சொல்லித் தருகிறது. பெண்கள் இயேசுவைச் சுற்றி எப்போதும் இருந்தார்கள். அவர்களுடைய துயரத்தைக் கேட்க இயேசுவின் காதுகள் எப்போதும் திறந்தே இருந்தன. மத குருக்களைப் போல, தங்களை பெண்களின் எல்லையிலிருந்து விலக்கி இயேசு வாழவில்லை. இணைந்தே வாழ்ந்தார். பேதுருவின் மாமியாருக்குக் காய்ச்சல் விலக வேண்டியிருந்தது, நயீன் விதவையின் துயரத்தைத் துடைக்க வேண்டியிருந்தது, மதலேன் மரியாளை விடுவிக்க வேண்டியிருந்தது, மார்த்தா, மரியாவின் அன்பில் கலக்க வேண்டியிருந்தது இயேசு எல்லோரையும் கவனித்தார்.

யவீருவின் சின்ன மகள் முதல், காணிக்கை போட்ட ஏழை விதவை வரை யாரும் அவரது பார்வைக்குத் தப்பவில்லை. விபசாரத்தில் பிடிபட்ட பெண் முதல், ஆடையின் விளிம்பைத் தொட்ட பெண் வரை யாரும் அவரது ஆதரவைப் பெறாமல் போகவில்லை. அவருக்கு அன்பாலும், பொருளாதாரத்திலும் துணையாய் இருந்த பெண்களே அவரது வாழ்க்கை முழுவதும் தொடர்ந்தனர். அன்னை மரியாளின் முதல் அரவணைப்பு முதல், கடைசித் தழுவல் வரை பெண்களின் ஆதரவாளராகவே இயேசு இருந்தார்.

2. இயேசுவின் வலிகளில்

இயேசு பெண்களின் அன்பைச் சம்பாதித்தார். அதனால் தான் அவர் சிலுவை சுமந்து சென்ற போது எருசலேம் மகளிர் கண்ணீர் வடித்தனர். ஆண்கள் இயேசுவைச் சிலுவையில் அறையச் சொல்லி கூச்சலிட்டனர். ஆணாதிக்கம் அவரைச் சாட்டையால் அடித்து வேடிக்கை பார்த்தது. ஆண்களின் விரோதப் பார்வைகள் அவரை ஏளனப் பேச்சினால் அவமானப் படுத்தின. ஆனால் பெண்களின் கண்களோ கண்ணீர் துளிகளை விடுத்து நேசத்தை வெளிப்படுத்தியது. தங்கள் வலிகளின் பாதையில் வலம் வந்தவரை,அவரத வலிகளின் பாதையில் பெண்கள் சந்தித்தனர். அவர்களுடைய துயரத்தின் கண்ணீர் ஆண்களின் இரும்பு இதயத்தில் விழுந்த சவுக்கடிகள்.

இயேசு அந்த வலியின் நொடியிலும் பெண்களை ஆறுதல்படுத்துகிறார். அழாதீர்கள் என்றல்ல ! அழுங்கள் என்று. ஆனால், சரியான விஷயங்களுக்காய் அழுங்கள் என்கிறார் இயேசு. உங்கள் பிள்ளைகளுக்காக அழுங்கள். நாளை அவர்கள் வளர்ந்து இன்னொரு சிலுவையை ஒரு எளியவன் தோளில் சுமத்தாதிருக்கட்டும். உங்கள் பிள்ளைகள் நாளை அநீதியான தீர்ப்பை நிரபராதியின் தலையில் சுமத்தாதிருக்கட்டும். உங்கள் பிள்ளைகள் நாளை இயலாமையின் முதுகில் சாட்டைகளை வீசாதிருக்கட்டும். அழுங்கள், உங்கள் வாழ்க்கையும் பிள்ளைகளின் வாழ்க்கையும் பாவத்தை விட்டு விலக அழுங்கள் என்றார் இயேசு.

3. இயேசுவின் வழியினில்

இயேசு கல்வாரி மலையை நோக்கி வியர்வை வழிய, குருதி கசிய நடந்து செல்கிறார். வல்லூறுகள் அவரைச் சுற்றி வருகின்றன. அந்த வல்லூறுகளின் இடையே சமாதானப் புறாவாய் நுழைந்து செல்கிறாள் ஒரு பெண். அவள் பெயர் வெரோணிக்காள். கூட்டம் இயேசுவை நெருங்க பயந்து தொலைவில் நிற்க, இவள் இயேசுவை நெருங்குகிறாள். தனது கையிலிருந்த ஆடையினால் இயேசுவின் வியர்வை முகத்தைத் துடைக்கிறார். ‘என் பெயரால் ஒரு குவளை குளிர்ந்த நீர் கொடுத்தால் கூட கைமாறு நிச்சயம்” என்று சொன்ன இயேசு பார்க்கிறார். என்ன கொடுப்பேன் இந்தப் பெண்ணுக்கு ? தோளில் சிலுவையோடு நடக்கும் என்னிடம் என்ன இருக்கிறது ? வெறுங்கையாய் இவளை அனுப்புதல் பிழையல்லவா ? இயேசு தனது முகத்தையே அந்த ஆடையில் பதிக்கிறார். அடையாளமற்ற பெண்ணாய் வந்தவர், இயேசுவின் அடையாளம் சுமந்து விடைபெறுகிறாள்.

பைபிளில் இடம்பெறாத ஆதித் திருச்சபை வரலாற்றில் இந்த நிகழ்வு இருக்கிறது. நிக்கோதேமுவின் நற்செய்தி ( apocryphal gospel of Nicodemus ) எனப்படும் ஒரு நூலிலும் இந்த நிகழ்வு இடம்பெறுகிறது. அவர் புனிதையாக் போற்றப்படுகிறார். பாரம்பரியக் கிறிஸ்தவக் குழுக்களெல்லாம் இந்த நிகழ்வை ஏற்றுக் கொள்கின்றன. இயேசுவின் முகம் பதிந்த அந்த ஆடை “வேல் ஆஃப் வெரோனிகா” என அழைக்கப்படுகிறது.

4. சிலுவையின் அடியினில்

இயேசுவின் சிலுவை மரணம் பெண்களை உலுக்கியது எனலாம். அவர்கள் இயேசுவின் சிலுவையின் அடியே ஈர விழிகளுடன் கலங்கி நிற்கின்றனர். ஆண்களைப் போல, “இயேசுவை நான் அறியேன்” என அவர்கள் மறுதலிக்கவில்லை. “எதிரிகளிடம் அவரைக் காட்டிக் கொடுக்கவில்லை”  ! ` “உம்மோடு வருவோம், மரிப்போம்” என அவர்கள் வீச வசனம் பேசியிருக்கவில்லை. “நான் உம்மோடு சேர்ந்து இறக்க வேண்டியிருந்தாலும் உம்மை ஒருபோதும் மறுதலிக்க மாட்டேன்” என அத்தனை சீடர்களும் சொன்னது போல பெண்கள் சொல்லவில்லை. அவர்கள் அன்பினை செயலில் காட்டினார்கள். இயேசுவின் பயணத்தில் அழுதார்கள், நெருங்கி வந்து முகம் துடைத்தார்கள், சிலுவை அருகில் கலங்கி நின்றார்கள். சிலுவையிலிருந்து இயேசுவை இறக்கியபின் தாய் அவரை மடியில் கிடத்தினார்.

பிறப்பின் போது மூவொரு இறைவனை மூன்று ஞானிகள் காண வந்தார்கள். இறப்பின் போது சிலுவை அடியில் மூன்று மரியாள்கள் அவரைப் பார்த்து நின்றார்கள்.  இயேசுவின் அன்பு சீடர் தவிர எல்லோரும் தலை தெறிக்க ஓடிவிட்டனர். ஆனால் பெண்கள் ஓடவில்லை. “கலிலேயாவிலிருந்து இயேசுவைப் பின்பற்றி அவருக்குப் பணிவிடை செய்து வந்த பல பெண்களும் அங்கிருந்தார்கள். அவர்கள் தொலையில் நின்று உற்று நோக்கிக் கொண்டிருந்தார்கள்” என்கிறது மத்தேயு நூல். பெண்கள் துயரத்தின் உச்சியிலும் துணையிருந்தார்கள்.

5. விடியலின் வாசலில்

பெண்களின் மனம் இளகியது. மென்மையான அந்த மனதில் கரிசனையின் சுடர் எளிதில் அணைவதில்லை. தங்களுடைய துயரத்தில் கரம் கொடுத்தவர்களை அவர்கள் கைவிட்டு விடுவதில்லை. இருளின் குகையில் இயேசுவை அடைத்தபின்னும் பெண்களின் அன்பை இருள் சூழவில்லை. அவர்கள் கல்லறையை நோக்கி ஓடுபவர்களாகவே இருந்தார்கள். அதனால், இயேசு தனது முதல் காட்சியை பெண்ணுக்கே அளித்தார்.

ஏவாளின் சலனம் பாவத்தை அனுமதித்தது. அந்த சாபம் மனுக்குலம் முழுவதும் படர்ந்தது. பாவம் பூமியில் நுழைந்ததன் பழியை ஒரு பெண்ணின் தலையில் சுமத்தியது மனுக்குலம். இங்கே மீட்பின் பேரொளியை பெண்ணின் விழிகளுக்கே பரிசளிக்கிறார் இயேசு. பாவத்தின் பழியில் இருந்த பெண்மையை, மீட்பின் வழியில் சந்தித்து பெருமைப்படுத்துகிறார் இயேசு. சிலுவைப் பாதையில் நடந்த பெண்களுக்கு, விடியல் பாதையில் பரிசளிக்கிறார் இயேசு. நற்செய்தியை முதலில் அறியவும், அறிவிக்கவும் பெண்களையே இயேசு தேர்ந்தெடுக்கிறார்.

இப்படி இயேசுவின் காலம் முழுவதும் தொடர்ந்து நடந்த பெண்களை இயேசு எப்படி அன்புடன் நடத்தினாரோ, அப்படி நடத்த வேண்டிய பொறுப்பும், கடமையும் நம்மிடம் இருக்கிறது. பெண்களின் துயர் துடைக்க முன்வருவோம். அவர்களுடைய தோள்களில் சிலுவைகளையல்ல, வாழ்வின் இனிமைகளை சுமத்துவோம்.

இந்த தவக்காலம் பெண்மையின் மேன்மையை உணர வைக்கட்டும்.
பெண்கள் சிறப்பானவர்கள், மரச் சிலுவைகளைப் புறக்கணித்து, மனச் சிறகுகளைப் பரிசளிப்போம்.

*

சேவியர்

தேசோபகாரி, பிப்ரவரி 2020

One thought on “சிலுவைப் பாதையில் பெண்கள்

உங்கள் கருத்தைச் சொல்லலாமே...

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s