Posted in Animals Birds, Bible Poems

உயர் திணையான அஃறிணைகள் – பன்றி

உயர் திணையான அஃறிணைகள்
பன்றி

புறக்கணிப்பின்
பின்வாசலாய் இருக்கிறது
என் வாழ்க்கை !

குதித்து வந்து
தோளில் தாவும் நாய்க்குட்டியாகவோ
படுக்கையில்
புரண்டு படுக்கும் பூனைக்குட்டியாகவோ
பொதுவாக
நான் இருப்பதில்லை !

சகதியின் சகவாசமும்
அழுக்கின் அருகாமையும்
என்னை
புனிதத்தின் தேசத்திலிருந்து
புறந்தள்ளியிருக்கிறது.

நான்
அசைபோடாததால்
என்னை
அசைபோடக் கூடாதென
மோசேயின் சட்டம்
முட்டுக்கட்டை இடுகிறது.

என்
இறுதிச் சடங்கில் கூட
தொட்டு விடாத் தீண்டாமையுடன்
சட்டம்
என்னை தூரமாய் வைக்கிறது.

நான்
அருவருப்புகளின் உருவகமாய்
அறியப்படுவதில் வருத்தமுண்டு.

கடவுளின் சொல்லுக்கு
அஞ்சாதவரின்
உணவுப் படையலானது,
பன்றியின் இரத்தப் படையல் போல
வெறுக்கத்தக்கது
என்கிறது விவிலியம்.

உங்கள் முத்துகளை
என் முன்னால் எறிந்தால்
நாங்கள்
அதன் மதிப்பை உணராமல்
மிதித்துப் போடுவோம்
என
இயேசுவே சொல்லிவிட்டார்.

இலேகியோன்
எனும்
பேய்களின் படையையும்
எங்களிடமே அனுப்பி
நாங்கள்
தண்ணீருக்குள் தாவி
தற்கொலை செய்யவும் வைத்தார்.

ஊதாரி மைந்தனின்
இழிநிலையைச் சொல்லவும்
என்
உணவு தானே உவமையானது.

பன்றியைக் கழுவினாலும்
அது
சேற்றில் புரளுமென
சொல்லிச் சொல்லி
யாரும் எங்களைக் கழுவுவதுமில்லை.

நாங்கள்
தோராவின் காலம் முதல்
தூரமாகவே இருக்கிறோம்.

மனிதனின்
உடலுக்குள் செல்வதொன்றும்
மனிதனைத்
தீட்டுப்படுத்தாதென
ஒருமுறை
சற்றே ஆறுதல் தந்தார் இயேசு.

இஸ்லாமியர்களுக்கும்
நான்
இகழப்படும் விலங்கு.

ஆனாலும்
தவிர்க்கமுடியா சூழலில்
என்னைத் தின்பது
பாவமல்ல,
ஏனெனில் கடவுள் இரக்கமுள்ளவர்
என
குரானும் கொஞ்சம் கருணை காட்டியது.

எனினும்
எனக்கு
மகிழ்ச்சி தரும்மனிதர்
சாலமோன் தான்.

அவர் மட்டும் தான்
எனது மூக்கில் ஒரு
வைர மூக்குத்தியை
கற்பனையேனும் செய்து பார்த்தவர்

அவர் சொன்னார்.

மதிகேடான
பெண்ணின் அழகு,
பன்றிக்குப் போட்ட
வைர மூக்குத்தி !

*

சேவியர்

Posted in Articles, Bible Animals, Bible Poems

உயர்திணையான அஃறிணைகள் 5 – ஆடு !

உயர்திணையான அஃறிணைகள்

5


ஆடு !

நான் தான்
ஆடு பேசுகிறேன்.

ஆபேல் காலத்தில்
என்
மெல்லிய பாதங்கள் பூமியில்
அசைந்தாடத் துவங்கின.

அதன் பின்
விவிலியத்தின்
பசும்புல் வெளிகளிலும்
நீரோடைகளிலும்
முட் புதர்களிலும்

என் பயணம்
தொடர்ந்து கொண்டேயிருக்கிறது.

பலியின் குறியீடாய்,
வலியின்
விளைநிலமாய்,
நான்
பயணித்துக் கொண்டேயிருக்கிறேன்.

ஆதாமின்
ஆடையும் நானாயிருக்கலாம்,
ஆபேலின்
பலியும் நானாயிருக்கலாம் !

பாவத்தின்
நிர்வாணத்தை
நானே மறைக்கிறேன்,
புனிதத்தின்
பலியாகவும் நானே நிறைகிறேன்.

இறைவனின்
பிள்ளைகளையும்
நானே அடையாளப்படுத்துகிறேன்.

பிள்ளைகளின்
இறைவனையும்
நானே அடையாளப்படுத்துகிறேன்

ஈசாக்கிற்குப்
பதிலாய்
நானே பலியானேன் !

எனக்குப் பதிலாகவே
ஈசனும்
பலியானார் !

எனக்கு
நல்ல ராசி !

என்னோடு
உறவாடிக் கொண்டிருந்த
தாவீது
மாபெரும் மன்னனானார் !

என்னோடு
சகவாசம் கொண்டிருந்த
யோசேப்பு
மாபெரும் அதிபரானார் !

என்னோடு
நட்புறவு கொண்டிருந்த
மோசே
மாபெரும் விடுதலை வீரரானார்.

நான்
மென்மையில் ஒளிந்த
வலிமை.
பாறையைப் பதுக்கி வைத்த
பனித்துளி.

நான்
தொலைகின்ற தருணங்களில்
தேடப்படுகிறேன்,
தேடப்படும் கணங்களில்
அகப்படுகிறேன்.

ஆயனின் குரலுக்கு
என்
செவிகள் இசைந்திருக்கும்
கால்கள்
தொடர்ந்திருக்கும்.

ஆயனின்
தகுதியைப் பார்த்து நான்
பின் தொடர்வதில்லை,
எனவே தான்
தவறாகவும் பலவேளைகளில்
தடம் மாறுகிறேன்.

நானும் இயேசுவும்
பிரியாமல் பயணிக்கிறோம்

இயேசுவின்
பிறப்பில்
ஆடு மேய்த்தவர்கள்
ஆயனைக் கண்டார்கள்.

இயேசுவின்
இறப்பின்
பலியாடாகவே
ஆயனைக் கண்டார்கள்.

விண்ணக
வீதியில்
ஆட்டுக்குட்டியாகவே
ஆண்டவனைக் கண்டார்கள்.

நானும் இயேசுவும்
பிரியாமல் பயணிக்கிறோம்

ஓநாய்களிடையே
ஆடுகளாய்
சீடர்களை அனுப்பினார் இயேசு
நான் மகிழ்ந்தேன்.

வன்மத்தின்
நகக்கீறல்களுக்கு நடுங்கவில்லை.

என்
கவலையெல்லாம்
ஓநாய்களிடையே அலைவதிலல்ல,
ஓநாய்களே
ஆட்டுத் தோலுடன்
அலைகையில் மட்டும் தான்.

*

சேவியர்

Posted in Articles, Bible Animals, Bible Poems

உயர்திணையான அஃறிணைகள் 4 – ஒட்டகம் !

உயர்திணையான அஃறிணைகள்
4

ஒட்டகம் !

 

இஸ்ரேல் மக்களுக்கு
வெறும்
நாற்பது ஆண்டுகள் !

எனக்கு
வாழ்நாளெல்லாம்
வாய்த்திருப்பது பாலை நிலமே.

ஆபிரகாமின்
வரலாற்றில் நான் இடம்பெற்றது
சில
ஆய்வாளர்களுக்கு
அலர்ஜி,
அதை நான் கண்டுகொள்வதில்லை.

நான்
செல்வத்தின் அடையாளமாகவும்
உழைப்பின்
அடையாளமாகவும்
உலவிக் கொண்டிருந்தேன்.

எனக்குத்
தண்ணி கொடுத்ததால் தான்
ரபேக்கா
ஈசாக்கின் மனைவியானார்.

யோபுவின்
சொத்துப் பட்டியலில்
ஆறாயிரம் ஒட்டகங்கள்
வந்து சேர்ந்தது
எம் இனத்துக்கே பெருமையானது.

பழைய
ஏற்பாட்டின் பக்கங்களில்
நான்
மணல் துகள்கள் பறக்க
நடந்து திரிகிறேன்.

என் மீது
வீரர்கள் ஏறி
விரைந்து வருவதை
அது
கர்வத்துடன் எழுதி வைத்தது.

என்
திமிலின் மீது
பொருட்கள் குவிந்து கிடப்பதை
அது
பெருமையுடன் பறை சாற்றியது.

புதிய
ஏற்பாட்டின் பக்கங்களில்
இயேசுவே
என்னை அழைத்து
சிலிர்க்க வைக்கிறார்.

செல்வச் சீமானின்
விண்ணகக் கனவென்பது
ஊசிக் காதில்
நான் நுழைவது போல
என்றார் இயேசு !

பரிசேயரின்
போலிப் பிம்பங்களை நோக்கி
கொசுவை வடிகட்டி
ஒட்டகத்தை விழுங்குவதாய்
புதுமை மொழி
சொன்னார் இயேசு

விவிலியத்தில்
எல்லாரோடும் எனக்கு
உடன்பாடு உண்டு
இந்த
திருமுழுக்கு யோவானைத் தவிர !

அவர் தான்
ஒட்டக மயிராடை அணிந்து
என் மதிப்பை
உடை வரை
இறக்கி வைத்தார்.

*

சேவியர்

Posted in Articles, Bible Animals, Bible Poems

உயர்திணையான அஃறிணைகள் 3 – சிங்கம் !

உயர்திணையான அஃறிணைகள்
3

சிங்கம் !

கானகத்து
ராஜா என ஊர் அழைக்கும்.
கம்பீரம் என்
காலடியில்
கவிழ்ந்து படுத்திருக்கும்.

பிரபஞ்சத்தின்
கர்வக் காற்றலையில்
என்
பிடரி மயிர்கள்
ஆழிப் பேரலையாய்
சீற்றத்தை ஒளிபரப்பும்.

என் கர்ஜனைகளின்
எல்லைகளில்
காற்று கூட
துயில் தொலைத்து
விழித்திருக்கும்.

எனினும்,

நான்
குழப்பத்தில் விழுவது
விவிலியத்தில்
நுழைகையில் தான்.

அலகை,
சிங்கம் போல்
தேடித் திரிகிறதென
என்னை ஒரு பக்கம்
சாத்தானாக்குகிறது.

நான்
சங்கடத்தில் விழுகிறேன்.

பின்
யூத ராஜ சிங்கம்
என
என்னைக் கடவுளோடு
காட்சிப்படுத்துகிறது.

நான்
சந்தோசத்தில் நிமிர்கிறேன்.

கானகமே
நடு நடுங்க கர்ஜிக்கும்,
எதிரிகளை
கூர் நகங்களால் பீறும்
என்றெல்லாம்
என் வலிமையைப் பேசிவிட்டு,

தானியேலின் முன்னால்
வாய்பொத்தி
கைகட்டி
புரண்டு படுக்கச் சொல்கிறார்
கடவுள்,
நான் பணிவு காட்டுகிறேன்.

உலகமே
என் வீரத்தின் முன்
விழுந்து கிடக்கையில்
ஒருவன்
கையினால் என்னை
அடித்தே கொல்கிறான்.

ஒருவன்
என் வாயிலிருந்து
ஆட்டுக் குட்டியைப்
போரிட்டுப்
பறிக்கிறான் !

விவிலியம்
என்னைப் பந்தாடுகிறது !

சிங்கம் என்பதே
அசிங்கமாகி விடுகிறது !

எனக்குப்
பெயரிட்ட ஆதாமின்
சந்ததி
பயத்தில் விழுந்தாலும்,

என்னைப் படைத்த
பரமன் முன்
நான் என்
சுண்டு விரலையும்
உயர்த்துவதில்லை !

கொழுத்த இரைகளின்
மாமிசத்தில்
உடல் வளர்க்கும் என்னை
உலுக்கிப் போடும்
ஒரு வசனம் உண்டு !

அது
இது தான்

சிங்கம் மாட்டைப் போல
வைக்கோல் தின்னும் !

*

சேவியர்

Posted in Articles, Bible Poems, Christianity, Poem on People, Sunday School

இறையச்சம் கொண்ட பெண்கள்

Godly Women

+

இறையச்சம் கொண்ட பெண்கள்
நிறைவாழ்வின் நதியோரம்
நடமாடுகிறார்கள்.
புதுவாழ்வின் பாதைகளில்
இடம் தேடுகிறார்கள்.

இறையச்சம் கொண்ட பெண்கள்
கனிவின் கரம் பிடித்து
துணிவின் துணையுடன்
பணி செய்வார்கள்.

ஆண்மகவை எல்லாம்
அழித்தொழியுங்கள்
என
எகிப்திய மன்னன் எகிறிக் குதித்தான்

சிப்ராவும் பூவாவும்
கர்ஜனைக்குக் கீழ்படியாமல்
கர்த்தருக்குக் கட்டுப்பட்டனர்.
இளகிய இதயத்தோடு
மழலையரைக் காத்தனர்.

இறையச்சம் கொண்ட பெண்கள்
இறைவனின் பிள்ளைகளை
இதயத்தால்
அறிவார்கள்,
ஞானத்தால் பொதிவார்கள்.

ராகாப்
உடலை விற்றவள்
இறையைக் கற்றவள்.
அவளது ஞானம்
இஸ்ரேல் உளவாளிகளைக் காத்தது
அவளது நாமம்
இறை வரலாற்றில் இடம் பெற்றது.

இறையச்சம் கொண்ட பெண்கள்
வீரத்தின் தீரத்தை
உயிரெங்கும் தரித்திருப்பார்கள்.

அரச குடும்பத்தை
அழித்துக் கொக்கரித்த
அத்தலியாவிடமிருந்து
இளவரசர் யோவாசைக் காத்தாள்
யோசேபா !
வம்சம் அழியாமல் காப்பாற்றப்பட்டது.

இறையச்சம் கொண்ட பெண்கள்
அர்ப்பணிப்பின்
நற்பண்பை
நெஞ்சத்தில் நிறைத்திருப்பார்கள்.

இதோ அடிமையென
தாழ்மை காட்டினார்
தாவீதின் அம்சமான மரியாள் !
மனித ஆதாரத்தின்
மானுட அவதாரம் மலர்ந்தது.

இறையச்சம் கொண்ட பெண்கள்
இயேசுவின்
பணி வாழ்வின்
வழியெங்கும் நிறைந்திருந்தனர்.

பாடுகளின் பாதைகளிலும்
அழுதிருந்தனர்.

சிலுவையின் சுவடுகளிலும்
காத்திருந்தனர்.

இறையச்சம் கொண்ட பெண்கள்
உயிர்ப்பின் பேரொளியை
விழி நிரம்ப
அள்ளிக் கொள்கின்றனர்

அவர்கள்
செபத்தின் ஆழியில்
நங்கூடமிட்டு நிலைத்திருப்பார்கள்
அன்னாவைப் போல

அவர்கள்
விருந்தோம்பலின் விழுதினை
விழிகளில் நட்டிருப்பார்கள்
மார்த்தாளைப் போல

அவர்கள்
இறைவார்த்தை விருதினை
உயிரினில் வைத்திருப்பார்கள்
மரியாளைப் போல

அவர்கள்
கண்ணியத்தின் கவசத்தை
கேடயமாய் வைத்திருப்பார்கள்
ரபேக்கா போல

மொத்தத்தில்,

இறையச்சம் கொண்ட பெண்கள்
இறைவனின்
புனித வாழ்வில்
புகலிடம் தேடுவார்கள்,
சாத்தானுக்குச் சன்னல்களையும்
சத்தமாய்ச் சாத்துவார்கள்

*