கிறிஸ்மஸ் என்றால் மீட்பு

கிறிஸ்மஸ் என்றால் மீட்பு

 

 

மீட்பு

எனும் எட்டாக்கனி

நமக்கு

பந்தி வைக்கப்பட்ட தினம்.

 

அடிமைகளின்

சிரங்களிலும்

கிரீடம் சூட்டப்படுமென

அறிவிக்கப்பட்ட தினம்.

 

பிற இனங்களின்

தாழ்வாரங்களிலும்

தேவன்

உலவுவார் என

நிரூபிக்கப்பட்ட தினம்

 

கிறிஸ்மஸ்

மீட்பின் தினம். 

 

மீட்பர் பிறந்துள்ளார்

எனும்

தூதரின் ஒலியால்

பூமி மகிழ்ந்த தினம்.

 

உருவமற்ற மீட்பரின்

உருவத்தை

கண்கள் கண்ட தினம்.

 

கிறிஸ்மஸ்

மீட்பின் தினம்

 

இயேசு எனும்

ஆழிப் பேரலை

பாவத்தின் நுரைகளை

முழுமையாய் அழிக்கும்.

 

இயேசு எனும்

ஒற்றைப் புயல்

சர்வ சக்தியையும்

புரட்டிக் கவிழ்க்கும்.

 

காலங்களைக் கடந்தவர்

பாலனாய்ப் பிறந்தார்.

மீட்பராய் மலர்ந்தார்

 

கிறிஸ்மஸ்

மீட்பின் தினம்.

 

மீட்பின் பந்தியில்

சேர

ஆன்மீக முடவர்களுக்கும்

அழைப்பு விடுக்கும் தினம்

 

விண்ணும் மண்ணும்

கை குலுக்கிக் கொண்ட‌

விஸ்வரூப தினம்

 

மாளிகைகளை

மறுதலித்து விட்டு

முன்னணையை

முன்னிறுத்திய வியப்பின் தினம்.

 

கிறிஸ்மஸ்

முடிந்து போன நிகழ்வின்

கொண்டாட்டம் அல்ல,

 

முடிவற்ற மீட்பை

சொந்தமாக்கும் தினம்.

 

இம்முறை

தொழுவத்தை அடைத்துவிட்டு

இதயத்தைத் திறப்போம்.

 

இயேசு

உள்ளத்தில் பிறக்கட்டும்

விண்ணகத்தை நோக்கி

நம் ஆன்மா

பறக்கட்டும்

 

*

 

சேவியர்

 

கிறிஸ்மஸ் என்றால் பதில்

கிறிஸ்மஸ் என்றால் பதில்

கிறிஸ்மஸ் என்றால் பதில்

*

கிறிஸ்மஸ் என்பது
பதில் !

எமை மீட்க‌
எவர் வருவார் எனும்
மக்களின் கேள்விக்கான‌
பதில்.

பிற இன மக்கள்
பிழைக்க முடியாதா
எனும்
கண்ணீர் கதறலுக்கான‌
பதில்.

கன்னி ஒருத்தி
கருத்தாங்குவாளா ?
எனும்
வியப்புக் கேள்வியின்
பதில்

சிற்றூரில் எப்படி
பேரரசர் எழுவார்
எனும்
குழப்பக் கேள்விகளின்
பதில்

நட்சத்திர விரல்
ஒளி நீட்டித் தொட்ட‌
வெளிச்சக் கேள்வியின்
பதில்

கிறிஸ்மஸ் என்பது
பதில்

இறைவாக்கு நிறைவேறும்
எனும்
தீர்க்கமான பதில்.

இறை திட்டம் தவறாது
எனும்
அழுத்தமான பதில்

அலகையின் தலையை
குதிகாலால் மிதிப்பவர்
யாரெனும் கேள்வியின்
பதில்.

தந்தையை அடைவது
எப்படி எனும்
தலைமுறைக் கேள்வியின்
பதில்.

புனித வாழ்க்கை
பூமியில் சாத்தியமில்லையா
எனும்
பாவ மனிதனுக்கான‌
பதில்

கிறிஸ்மஸ் என்பது
பதில்

இயேசுவின்
முதல் வருகையை
நம்புவதில் இருக்கிறது
இரண்டாம் வருகை
உண்டா எனும் கேள்விக்கான‌
பதில்.

*
சேவியர்

 

கிறிஸ்மஸ் என்றால் பதில்

கிறிஸ்மஸ் என்றால் பதில்

 

 

கிறிஸ்மஸ் என்பது

பதில் !

 

எமை மீட்க‌

எவர் வருவார் எனும்

மக்களின் கேள்விக்கான‌

பதில்.

 

பிற இன மக்கள்

பிழைக்க முடியாதா

எனும்

கண்ணீர் கதறலுக்கான‌

பதில்.

 

கன்னி ஒருத்தி

கருத்தாங்குவாளா ?

எனும்

வியப்புக் கேள்வியின்

பதில்

 

சிற்றூரில் எப்படி

பேரரசர் எழுவார்

எனும்

குழப்பக் கேள்விகளின்

பதில்

 

நட்சத்திர விரல்

ஒளி நீட்டித் தொட்ட‌

வெளிச்சக் கேள்வியின்

பதில்

 

கிறிஸ்மஸ் என்பது

பதில்

 

இறைவாக்கு நிறைவேறும்

எனும்

தீர்க்கமான பதில்.

 

இறை திட்டம் தவறாது

எனும்

அழுத்தமான பதில்

 

அலகையின் தலையை

குதிகாலால் மிதிப்பவர்

யாரெனும் கேள்வியின்

பதில்.

 

தந்தையை அடைவது

எப்படி எனும்

தலைமுறைக் கேள்வியின்

பதில்.

 

புனித வாழ்க்கை

பூமியில் சாத்தியமில்லையா

எனும்

பாவ மனிதனுக்கான‌

பதில்

 

கிறிஸ்மஸ் என்பது

பதில்

 

இயேசுவின்

முதல் வருகையை

நம்புவதில் இருக்கிறது

இரண்டாம் வருகை

உண்டா எனும் கேள்விக்கான‌

பதில்.

 

*

சேவியர்

கிறிஸ்மஸ் என்றால் போலித்தனம்

கிறிஸ்மஸ் என்றால்
போலித்தனம்

கிறிஸ்மஸ்
என்றால் போலித்தனம்.

இயேசு பிறந்தபோது
எந்த மரமும்
பகட்டின் விளக்கில்
பளபளக்கவில்லை.

வானளாவ உயர்ந்த‌
ஆரம்பரக் குடியில்
தாழ்மைப் பிறப்பு
நிகழவில்லை.

ஆயிரம் விண்மீன்
கீழிறங்கி வந்து
கண்சிமிட்டிக் கண்சிமிட்டி
வர்ணஜாலம்
காட்டவில்லை.

வெள்ளைத் தாடியுடனும்
கோமாளி
நாட்டியத்துடனும்
தொந்தித் தாத்தாக்கள்
வந்து நிரம்பவில்லை.

அர்த்தமற்ற‌
பாடல்களால்
பெத்லேகேம் பதறியெழவில்லை.

கிறிஸ்மஸ் என்றால்
போலித்தனம்
இன்று !

பாவத்தில் துயிலாதே
புனிதத்தில் விழித்தெழு
என்றார் இயேசு,
நாமோ
பாலனை தூங்கச் சொல்லி
தாலாட்டு பாடுகிறோம்.

தாழ்மையாய் வேண்டியவனே
இறைவனுக்கு வேண்டியவன்
என்றார் இயேசு,
நாமோ
பட்டாடைகளின் உரசலுடனே
ஆலயத்தில் அலைகிறோம்.

செபத்தை விட‌
அதிக நேரம்
செல்பியிலே செலவழிக்கிறோம்.

இறைவனிடம்
உரையாடுவதை விட‌
அதிக நேரம்
நண்பரிடம் உரையாடுகிறோம்.

ஆலய அலங்காரம்
பேசுபொருளாகிறது
ஆராதனை அர்த்தமிழக்கிறது.

கிறிஸ்மஸ் என்றால்
போலித்தனம்
இன்று !

டிசம்பர் 25 தான்
கிறிஸ்மஸா ?
அவர் பிறந்தது
நள்ளிரவிலா ?
இது கிரேக்க விழாக்களின்
தழுவலா ?

என‌
தேவையற்ற விவாதங்கள்
அதிகரிக்க‌
தேவனின் வார்த்தைகள்
ஒதுக்கப்படுகின்றன.

கிறிஸ்மஸ்
என்றால் போலித்தனம்
இன்று.

ஒன்றை மட்டும்
புரிந்து கொள்வோம்

கிறிஸ்மஸில் தான்
போலித்தனம்
கிறிஸ்துவில் அல்ல !

*

சேவியர்

கிறிஸ்மஸ் என்பது இழப்பு

கிறிஸ்மஸ் என்பது இழப்பு

கிறிஸ்மஸ் என்பது
இழப்பு !

இறைமகன்
இயேசு
மகிமையை இழந்தார்
மானிட மகனானார்.

அன்னை மரியாள்
நற்பெயர் இழந்தார்
கன்னியிலேயே
அன்னையாகும் நிலையுற்றார்.

தந்தை யோசேப்பு
கனவுகள் இழந்தார்
தாய்மையைக் கரம்பிடித்து
தரணியில் வாழ்ந்தார்.

இடையர்கள்
தூக்கம் இழந்தனர்
பெத்லேகேம் பாதைகளில்
பாலனைத் தேடித் திரிந்தனர்.

ஞானியர்
பொறுமை இழந்தனர்
வானத்தைப் பார்த்தவர்கள்
மாளிகைக்குள் நுழைந்தனர்.

மாளிகை மன்னன்
நிம்மதி இழந்தான்
கிரீடம் கவிழுமோ என
வன்முறைக்குத் தாவினான்.

திருக்குடும்பம்
நிம்மதி இழந்தது
எகிப்தின் வீதிகளுக்கு
உயிர்தப்ப ஓடியது.

மழலையைப் பெற்றவரெல்லாம்
நிம்மதி இழந்தனர்
பாலகர்களை
வாளுக்கு இரையாக்கி
ஒப்பாரியில் ஒதுங்கினர்.

கிறிஸ்மஸ்
என்பது இழப்பு !

இயேசுவின் வருகையினால்,
தனது மரண ஒலியை
தன் காதிலேயே கேட்டு
சமாதானம் இழந்தான்
சாத்தான்.

கிறிஸ்மஸ்
என்பது இழப்பு !

அரியணையை விட்டு விட்டு
புல்லணையில் புன்னகைக்கும்
பாலன்
இழப்பின் தேவையை
நமக்குக் கற்றுத் தருகிறார்.

கிறிஸ்மஸில்
இழக்கத் தயாராவோம்.

நமது
சுயநல சிந்தனைகளை,

நமது
வெறுப்பின் வேர்களை,

நமது
பெருமையின் ஆரவாரங்களை,

நமது
வெளிவேடத்தின் ஆடைகளை,

இழக்கத் தயாராவோம்.

இறைவனுக்காய்
இழப்பதெல்லாம்
விண்ணகத்தில் ஆதாயமே,

இறைவனை
இழந்து விட்டால்
பெறுவதெல்லாம் வெறும் சேதாரமே

*

சேவியர்