Posted in Songs, Sunday School

இயேசப்பா உங்க அன்பு

Image result for praying to jesus

இயேசப்பா உங்க அன்பு ரொம்ப பெருசு
அது
ஆழ்கடலை விட ரொம்ப ஆழமானது
இயேசப்பா உங்க அன்பு ரொம்ப பெருசு
அது
வான் வெளிய விட ரொம்ப நீளமானது.

இயேசப்பா…
இயேசப்பா…
(இயேசப்பா.. )

*

பசி தாகத்தால நான் பதறுகையிலே
மேய்ச்சலுக்கு புல்வெளிக்கு கூட்டிப் போனீக
காடு மேடு தெரியாம தொலஞ்சு போனப்போ
தோள்மேல நீங்க என்னை தூக்கி கிட்டீக

ஐயோ பசிக்குதுன்னு
கலங்கி நின்னப்போ
மண் மேலே
மன்னாவைப் பொழியச் செஞ்சீங்க

மண் மேலே
மன்னாவைப் பொழியச் செஞ்சீங்க

( இயேசப்பா )

புயலடிச்ச படகைப் போல வாழ்க்கை ஆனப்போ
பயத்தைப் போக்க காத்தைக் கூட அடக்கி வெச்சீங்க

செங்கடலும் மல்லுக்கட்டி முன்னால் நின்னப்போ
கடலுக்கு நடுவால பாத போட்டீக

ஐயோ மாட்டேனுன்னு
கதவடைச்சாலும்
கதவோடு கதவாகக் காத்திருப்பீக

(இயேசப்பா )

 

Posted in Poem on People, Songs

புனித தெரேசா

Image result for mother teresa

மடியில் தாங்கிய மகன்,
மடியும் நிலையில் தொங்க‌
கொல்கொதாவில்
உயிர்
துடித்து நின்றார் ஓர் அன்னை.

ந‌ம்
அன்னை மரியா !

மடியும் தருவாய் மனிதர்களை
மடியில் தாங்கி அன்பால்
கொல்கொத்தாவில்
உயிர்
துடிக்க நின்றார் ஓர் அன்னை.

அது நம்
அன்னை தெரேசா.

புனிதர்கள்
பிறப்பதில்லை,
பிறப்பெடுக்கிறார்கள்.

மனிதம் புறப்படும் இடத்தில்
புனிதர்கள்
பிறப்பெடுக்கிறார்கள்.

அல்பேனிய மழலை
அன்பினால் மலர்ந்தது
வேதனையின் வீதிகளில்
இயேசுவை விளம்பியது.

பலியாய் தொங்கிய‌
இயேசுவுக்காய்
வலிகளைத் தாங்கினார் அன்னை.

புனிதர் பட்டம் என்பது
மதிப்பெண்களால் பெறுவதல்ல‌
மதிப்பீடுகளால் பெறுவது.

திருச்சபை
அன்னையின் பணிகளை
அலசியது !
மலைமேல் இருக்கும் ஊர்
மறைவாய் இருக்க முடியுமா ?

பணியின் வாசனை,
வத்திக்கான் வாசலுக்கு
அறிக்கையாய்
அனுப்பப்பட்டது.

இறையின் வெளிச்சத்தில்
பணியின் பாதைகள்
அலசப்பட்டன.

வியப்பின் ஒப்பத்துடன்
போப்பின் பார்வைக்கு
அன்னையின் அறிக்கை
வந்து சேர்ந்தது.

செபத்தின் ஒளியில்
இயேசுவின் வழியில்
போப்
முடிவெடுக்க முடிவுசெய்தார்.

அன்னையின் பெயரால்
இயேசுவின் அருளால்
புதுமை ஒன்று
நடந்ததாய்
நிரூபிக்கப்பட வேண்டும்.

அது நடந்தது !
அருளாளர் பட்டம் கிடைத்தது !

இரண்டாம் புதுமை
புனிதராக்குவதன்
அனுமதி !

அதுவும் நடந்தது.

வாழும்போது
முதுமைகளைத் தொட்டவர்
மறைந்தபின்
புதுமைகளால் தொட்டார்.

அன்னை !
இதோ
நம் புனிதர் படையில் புதிதாய்.

செப்டம்பர் 5
அனையின் பிறந்த தினம்
செப்டம்பர் 4
புனிதராய் சிறந்த தினம்

நாள்காட்டிகளே
இந்தத் தியதியை
இனிமேல்
அச்சால் எழுதாதீர்கள்.
அன்பால் எழுதுங்கள்

*

Posted in Articles, Songs

வானின் தேவன் உயிர்த்தெழுந்தார்

வானின் தேவன் உயிர்த்தெழுந்தார்
வாழ்வைத் தரவே உயிர்த்தெழுந்தார்
சாவின் கதவினை உடைத்தெழுந்தார்
மீட்பின் ஒளியைத் தர எழுந்தார்

சாவின் கொடுக்கும்
சாத்தான் மிடுக்கும்
பரமன் உயிர்ப்பில் அழிந்ததுவே !

நம்பும் யார்க்கும்
மீட்பை அளிக்கும்
விடியல் வெள்ளி எழுந்ததுவே !!

*

பாவம் என்னும் பாரச் சிலுவை
பரமனைக் கல்லறை அனுப்பியது
தூய்மை என்னும் வாழ்க்கை வாழ
அவரின் உயிர்ப்பு அழைக்கிறது

மீட்பு என்னும் வானக விருந்தை
இறைவன் நமக்காய் தருகின்றார்
மனிதம் மலர மனிதர் இயேசு
இறையாய் இன்று எழுகின்றார்

உலகம் அதிர
உதிரம் உதிர
இறந்தவர் கல்லறை திறந்துவிட்டார்.

அன்பைப் பகிர
அருளை அருள‌
இறைமகன் இதயம் நிறைந்து விட்டார்

*
அகிலம் தன்னை ஆலம் விதைக்குள்
அடைத்திட யார்க்கும் முடியாது
இருளின் அறையில் கதிரின் ஒளியை
ஓளித்திட எவர்க்கும் இயலாது

எளிமை வடிவாய் பிறந்த இயேசு
வலிமை கொண்டே விழிக்கின்றார்
அடிமை வடிவாய் வாழும் மனிதர்
முடிவை மாற்ற அழைக்கின்றார்.

ஆலயத் திரையும்
இரண்டாய் கிழிய
தூயக வாசலைத் திறந்துவிட்டார்

தூயநல் ஆவி
இதயம் நிறைய
தூயவர் வழியை வழங்கிவிட்டார்