Posted in Articles, Christmas Special, Sunday School

கிறிஸ்மஸ் என்பது அர்ப்பணிப்பு

கிறிஸ்மஸ் என்பது
அர்ப்பணிப்பு

*

கிறிஸ்மஸ்
அர்ப்பணிப்பின் விழா.

தர்ப்பரன் பாதத்தில்
அர்ப்பண மலராய்
நம்மை
அர்ப்பணிக்கும் விழா.

மகிமையின் கிரீடத்திலிருந்து
மனிதனின் சரீரத்துக்கு
இயேசு இறங்கியது
தந்தைக்கு தன்னை
அர்ப்பணித்ததன் அடையாளம்.

தூய்மையின் வழிநடந்த‌
அன்னை மரியாள்
கன்னியாய்,
தாயாகத் தயாரானது
பரமனுக்குத் தன்னை
அர்ப்பணித்ததன் அடையாளம்.

சந்தேகத்தின் நகக்கீறல்களால்
நங்கையை நசுக்காமல்
கனவின் குரல் கேட்டு
யோசேப்பு மரியாவை ஏற்றது
அர்ப்பணிப்பின் அடையாளம்.

வானத்தில் கேட்ட‌
கானத்தில்
இடையர்கள்
தொழுவம் தேடித் திரிந்தது
அர்ப்பணிப்பின் அடையாளம்.

ஞானியராய் இருந்தாலும்
வெளிச்சத்தின் விரல் பிடித்து
அரசரைத் தேடி
ஞானியர் அலைந்தது
அர்ப்பணிப்பின் அடையாளம்.

வாலின் நீளத்தை அதிகமாக்கி
ஒளியின் தூரத்தை
விசாலமாக்கிய விண்மீன்
அர்ப்பணிப்பின் அடையாளம்.

அழையா விருந்தாளிகளாம்
மரியாள் குடும்பத்தை
அசைபோட்டு வரவேற்ற‌
கால்நடைகள்
அர்ப்பணிப்பின் அடையாளம்.

கிறிஸ்மஸ்
அர்ப்பணிப்பின் அடையாளம்.

நாமும் அர்ப்பணிப்போம்
கரங்களை நழுவாத‌
களிமண்ணாய்,
கர்த்தரின் கரங்களில்
நம்மையே அர்ப்பணிப்போம்.

அர்ப்பணிப்பின்
கிறிஸ்மஸ் அர்த்தம் பெறும்.

*

சேவியர்

Posted in Articles, Christmas Special, Sunday School

3 கிறிஸ்மஸ் என்பது நிறைவேறுதல்

கிறிஸ்மஸ்
முன்னுரைத்த வார்த்தைகளின்
பின்னுதித்த‌
தினம்

இறைவாக்கினரின்
வார்த்தைகள்
குறைவின்றி
நிறைவேறிய தினம்

இறவாத வார்த்தையாய்
இறைவன் வந்தார்
இயேசு என‌
விண்ணகம் அவருக்கு
பெயர் சூட்டியது.

விண்ணோடு இருந்தவர்
நம்மோடு இருக்க வந்தார்
இம்மானுவேல் என‌
இறைவாக்கு அழைத்தது.

புனிதத்தின் தேரில்
பயணித்தவர்
பாவத்தின் வீதியில்
பாதம் பதித்தார்
மீட்பர் என்றது இறைவாக்கு.

இருளில் இருந்தவரின்
இதயங்களில்
வெளிச்சத்தை ஊற்றி நிரப்ப‌
இறங்கி வந்தார் இயேசு.
மனுமகன் என்றது இறைவாக்கு.

கன்னியின் வயிற்றில்
கனியாவார்
ஆவியின் அருளால்
உருவாவார் !
ஆனந்தம் என்றது இறைவாக்கு.

பாலகன் பிறப்பான்
பாரினில் சிறப்பான்
ஆட்சியைத் தருகிற‌
அதிசயம் அவரே !
அன்று உரைத்தது இன்று உறைத்தது.

எப்பிராத்தா எனும்
பெத்லேகேம்
சிறுமையில் பெருமையை
சூடிக்கொள்ளும் !
வாக்கு தொழுவைத் திறந்தது.

யாக்கோப் வழியில்
விண்மீன் விழித்தெழும்,
யூதா வம்சம்
செங்கோலில் நிலைத்திடும்,
ஈசாப் அடிமரம்
துளிரை அழைத்திடும்
சொன்னது எதுவும் சிதையவில்லை.

பிரமிடு தேசத்தில்
இளைப்பாற,
புரியா வாக்கும்
நிறைவேற‌
எகிப்தில் இருந்து மகனை
அழைத்தேன் !
என்றொரு வார்த்தையும் நிஜமாக.
கிறிஸ்மஸ் வந்தது நிலையாக !

கிறிஸ்மஸ்
இறை அன்பின் பரிமாற்றம்
இறைவாக்கின் நிறைவேற்றம்.

கிறிஸ்மஸ் நாள்
சொல்வது இதைத் தான்
இறைவார்த்தை
நிறைவேறும்,
நிராகரித்தால் நரகம் வரும்

*

சேவியர்

Posted in Articles, Christmas Special, Sunday School

2.கிறிஸ்மஸ் என்பது தாழ்மை

2

கிறிஸ்மஸ் என்பது
தாழ்மை

ஒரு குழந்தை
பிறந்தது !
ஏழ்மைப் பெற்றோரின்
எளிய மகனாய்.

தொப்புழ் கொடியறுத்து
துடைத்துச் சுற்ற‌
ஒரு
புதிய துணி இருக்கவில்லை.
கிழிந்த கந்தலே கிடைத்தது.

சத்திரங்களில் இடம் வாங்க
சிபாரிசுக் கடிதங்கள்
இருக்கவில்லை.
அறைகளைத் திறந்து கொடுக்க‌
தூரத்து சொந்தங்களும்
வாய்க்கவில்லை.
தொழுவமே அழைத்தது.

பிரசவம் பார்க்க‌
தாதிகள் வரவில்லை !
துணையாய் நிற்க‌
தோழிகள் வரவில்லை.

நீதிமானாய் ஒருவர்
உடனிருந்தார்,
அவர்
குழந்தையின் தந்தையைப் போல !
ஆனால் தந்தையல்ல !

குளிர் உறைந்த‌ காற்று
குத்தீட்டி வீசியது
சுவர்களால் மூடிய‌
அறைகள் கிடைக்கவில்லை.

இரவின் கருமை
இறுக்கிப் போர்த்தியது
அழகாய் ஏற்றும்
விளக்குகள் இருக்கவில்லை.

மொழியறியா மாடுகள்
அசை போட்டன,
பொருளறியா ஆடுகள்
தலையாட்டின.

சந்தனமும், சாம்பிராணியும்
அறையை நிறைக்கவில்லை
கால்நடையின்
கழிவுகளே தெறித்தன.

தொழுவில் தான் எழுந்தது
வருகையின்
முதல் அழுகை.

மேய்ப்பனாய் வந்தவர்
மாடுகளிடையே துயின்றார்
ஆயனாய் வந்தவர்
ஆடுகளிடையே சிரித்தார்.

பெத்லகேம்
பரமனைப் பெற்றது !
எந்தச் செவியும்
இந்த ரகசியம் அறியவில்லை.

மரியின் தாலாட்டில்
மனுமகன் தூங்கினார்
புரியாத பிரமிப்பில்
அன்னையும் தாங்கினார்.

கன்னியிடம் இருந்தார்
மக்களை
மீட்டெடுக்க வந்தவர் !
மக்களோ
கணக்கெடுப்பில்
கவனம் செலுத்தினர்.

மண்ணகம் மௌனித்ததால்
விண்ணகம்
களமிறங்கியது.
தூதர்கள் சேதியோடு வந்தனர்
வானத்தில் கானத்தோடு வந்தனர்.

நட்சத்திரம்
ஒளி படைத்தவர் மேல்
ஒளியைப் பரப்பியது.

மண்ணகம்
விரிந்த கண்களோடு
மயங்கியது
மாளிகை
உண்மையை ஏற்கத் தயங்கியது.

தாழ்மையின்
தாழ்வாரங்களில்
மேன்மையின் மகத்துவம்
முளைக்காதென்றது.

தாழ்மையின்
துவக்கப் புள்ளியாய்
மலர்ந்தது கிறிஸ்மஸ்

இயேசு சொன்னார்,
தன்னைத் தாழ்த்துவோன்
உயர்த்தப்படுவான்.
தன்னை உயர்த்துவோன்
தாழ்த்தப்படுவான்.

லூசிபர் தன்னை உயர்த்தினான்
பாதாளம் அவனுக்கு
நுழைவுச் சீட்டு கொடுத்தது.

இயேசு தன்னைத் தாழ்த்தினார்
கழுமரம் அவருக்கு
விண்ணக சாவியை நீட்டியது.

கிறிஸ்மஸ் நாளில்
பகட்டில் பொதிந்த‌
ஆடம்பரம் அகற்றுவோம்
இயேசுவில் பதிந்த‌
தாழ்மையை அணிவோம்.

*

சேவியர்

Posted in Christmas Special, Sunday School

1. கிறிஸ்மஸ் என்றால் அன்பு

1

கிறிஸ்மஸ் என்றால்
அன்பு

கிறிஸ்மஸ் !
அன்பின் முழுமை
அவனிக்கு வந்த தினம்

தந்தையின் அன்பு
தரணிக்கு வந்த தினம்.

தூதனின் கர்வம்
விண்ணக பாவத்தின்
துவக்கம்,
ஏவாளின் ஆர்வம்
மண்ணக பாவத்தின்
துவக்கம்,
இயேசுவின் வருகை
அன்பின் பாலத்தின்
தொடக்கம்.

நண்பனுக்காய்
உயிர்தருதல்
அன்பின் உயர் நிலை.
எதிரிக்காய்
உயிர் தருதல்
அன்பின் தேவ நிலை.

இயேசுவின் வருகை
காணா அன்பின்
உருவ நிலை.

மீட்பரின் தொடக்கம்
மீட்பதன் தொடக்கம்.
இறையினை அடைதலே
நிறைவினை அடைதல்.

கிறிஸ்மஸ்
அன்பினைப் போதிக்கிறது.

தன்னலமற்றுத்
தன்னையே தரும்
தாய்ன்பு.

கழுமரம் நோக்கி
தொழுவினில் உழலும்
பேரன்பு

கற்றுக் கொள்வோம்.

பாலனாய் பிறந்த‌
பரமனுக்கு
அன்பினை அளிப்போம்.

குடிலினில் பிறந்த‌
குழந்தைக்கு
பிரியத்தை அளிப்போம்.

மரியிடம் பிறந்த‌
மழலைக்கு
மனதினை அளிப்போம்.

நினைவில் கொள்வோம்,
அன்பு என்பது
வார்த்தைகளைக்
கொட்டுவதல்ல‌
செயல்களால்
காட்டுவது !

இயேசுவின் வருகை
அன்பின் செயல்வடிவம் !
அதையே மனதில் கொண்டு
என்றும் செயல்படுவோம்

*

சேவியர்

Posted in Articles, Christianity, Sunday School

SKIT : பாவம்

காட்சி 1 

( இரண்டு நண்பர்கள் பேசிக்கொண்டே வருகிறார்கள், அப்போது ஒரு கோணி தொங்கவிடப்பட்டிருக்கிறது. அதில் பாவம் என எழுதப்பட்டிருக்கிறது )

நபர் 1 : எப்படிடா இருக்கே.. போனவாரம் உன்னை சர்ச்ல பாக்கவே முடியல ?

நபர் 2 : போன வாரம் சர்ச்க்கு வரலைடா.. ஊர்ல இருந்து சொந்தக்காரங்க எல்லாம் வந்திருந்தாங்க. அதான்  வர முடியல.

நபர் 1 : சொந்தக்காரங்க தானே.. சண்டைக்காரங்க இல்லையே.. அவங்களையும் கூட்டிட்டு வரவேண்டியது தானேடா.. 

நபர் 2 : எல்லாரையும் எழுப்பி, ரெடி பண்ணி வரதுக்குள்ள போதும் போதும்ன்னு ஆயிடும். அதுமட்டுமில்ல, காலையில போய் மட்டன் வாங்கி, சமைக்கிறதுக்கு ஏற்பாடு பண்ண வேண்டியிருந்துச்சு.

நப 1 : ம்ம்.. மட்டனை மிஸ் பண்ண கூடாதுன்னு… சண்டேஸ்கிளாஸ் கூட நீ மிஸ் பண்ணிட்டே..

நபர் 2 : தட்ஸ் ஓகே.. ஒரு நாள் தானே. என்ன புதுசா சொல்லிட போறாங்க. அதே பைபிள், அதே டீச்சர்ஸ், அதே டீச்சிங்ஸ்…. அடுத்த வாரம் கேட்டுக்கலாம்.

நபர் 1 : அப்படி அலட்சியமா இருக்கக் கூடாது. எப்பவுமே கடவுளோட இணைந்து இருக்கிறது தான் நல்ல வாழ்க்கை. கொஞ்ச நேரம் தானேன்னு நாம கையை வெட்டி ஓரமா வைக்கிறதில்லை. கொஞ்ச நேரம் தானேன்னு ஒரு கிளையை வெட்டி ஓரமா வைக்கிறதில்லை. அப்படி பண்ணினா அழிவு நமக்குத் தான். நாம் கொஞ்சம் அசந்து போய் இருக்கிற நேரத்துல சாத்தான் கரெக்டா வந்து நம்மை புடிச்சுடுவான். 

நபர் 2 : என்னப்பா.. போன வாரம் கிளாசுக்கு வரலேன்னு இங்கே எனக்கு சண்டேஸ் கிளாஸ் எடுக்கறியா ? 

நபர் 1 : சொல்லணும்ன்னு தோணிச்சு சொன்னேன்.

நபர் 2 : ஆமா.. அங்கே என்னவோ தெரியுதே.. அட அழகான ஒரு கோணி. 

நபர் 1 : டேய்.. அதுல பாவம்ன்னு எழுதியிருக்கு.. வா..வா.. ஓரமாவே போவோம். பக்கத்துலயே போக வேண்டாம். 

நபர் 2 : என்னதான் இருக்குன்னு பாக்கலாமேடா.. ஏன் பதட்டப்படறே. அதென்ன சாணியா ? கோணி தானே. 

நபர் 1 : டேய்.. விளையாடறியா.. பாவத்தைக் கண்டா தூரமா ஓடிப் போயிடுன்னு பைபிள் சொல்லுது. நீ என்னடான்னா எட்டிப் பாக்கலாம்ன்னு சொல்றே.. வேண்டவே வேண்டாம்.

நபர் 2 : டேய்.. என்னடா பயந்தாங்கொள்ளியா இருக்கே… உன் மேலயே உனக்கு நம்பிக்கை இல்லையா என்ன ? ஒண்ணும் ஆவாது. 

நபர் 1 : பாம்பு கூப்பிட்டப்போ ஏவாள் ஓடிப் போயிருந்தா உலகத்துல பாவமே வந்திருக்காது. தொட்டு பாப்போம், எட்டிப் பாப்போம், தின்னு பாப்போம்ன்னு யோசிக்கும்போ தாண்டா பாவம் வருது.

நபர் 2 : போடா.. நீ பெரிய செயிண்ட்… போ.. போ… நான் போய் என்னன்னு பாத்துட்டு தான் வருவேன்.

நபர் 1 : வேணாம்டா.. பாம்போட இயல்பு கடிக்கிறது. பாவத்தோட இயல்பு நம்மை புடிக்கிறது. பொறியில சிக்கின எலி மாதிரி ஆயிடுவே.. விட்டுடு..

நபர் 2 : நீ வேணும்ன்னா ஓடிப்போ.. நான் என்னனு பாக்கறேன். என்னை யாரும் புடிக்க முடியாது. ஐ ஆம் ஸ்ட்றாங்.

நபர் 1 : நான் இந்த ஆட்டத்துக்கு வரலை ஆளை விடு.. ( போகிறான் )

( தொடர் காட்சி )

( நபர் 2 அந்த கோணியின் அருகே போகிறார் )

நபர் 2 : (எட்டிப் பார்க்கிறார் ) அட.. ஒண்ணுமில்ல… சின்ன மேட்டர்தான்…. இதுக்குப் போயி பயந்துட்டோமே… 

( கொஞ்சம் அந்தப் பக்கமாகப் போகிறார் )

நபர் 2 : சும்மா பாத்துட்டு வந்தா எப்படி ? லைட்டா தொட்டுப் பாப்போம் 

( கொஞ்சம் சட்டென தொட்டுப் பார்க்கிறார். ) ஒண்ணும் ஆகலையே… ( இன்னும் கொஞ்சம் அழுத்தமாய் தொட்டுப் பார்க்கிறார் ) ஒண்ணுமே ஆகல. 

( கொஞ்சம் அந்தப் பக்கமாகப் போகிறார் )

நபர் 2 : லைட்டா தூக்கிப் பாப்போம். 

( கொஞ்சம் கையில் தூக்கிப் பார்க்கிறார் ) அட ஒண்ணும் ஆகலையே… ஆஹா.. ஆஹா

( கொஞ்சம் அந்தப் பக்கமாகப் போகிறார் )

நபர் 2 : உள்ளே கை போட்டுப் பாப்போம். கொஞ்சம் பயமா தான் இருக்கு.. ( மெதுவாகக் கொஞ்சம் போடுகிறார் ) ம்ம்.. ஒண்ணும் ஆகல…  ( மீண்டும் கொஞ்சம் போடுகிறார் ) ம்ம்.. நல்லது ஒண்ணுமே ஆகல.. 

( கொஞ்சம் அந்தப் பக்கமாகப் போகிறார் )

நபர் 2 : அதான் ஒண்ணும் ஆகலையே அப்புறம் என்ன .. ரெண்டு கையையும் போட்டுப் பாப்போம். ( இரண்டு கைகளையும் போட்டுப் பார்க்கிறார். ) ஒண்ணுமே ஆகல…. ஆஹா.. நல்லா இருக்கே.. நல்லா இருக்கே.

( அப்போது நபர் 1 வருகிறார் )

நபர் 1 : ஏய்ய்..ஏய்.. என்ன பண்ணிட்டிருக்கே.. இங்க வா.. அதை அங்கே போடு… 

நபர் 2 : போப்பா.. நீதான் தேவையில்லாம என்னென்னவோ சொல்லி பயமுறுத்தினே. இதில ஒண்ணும் கிடையாது. நல்லா இருக்கு. எட்டிப் பாத்தேன், தொட்டுப் பாத்தேன், கையை விட்டுப் பாத்தேன் ஒண்ணுமே ஆகல. நீ தான் சும்மா பயமுறுத்தினே.

நபர் 1 : அதெல்லாம் வேண்டாம்டா… போர்க்களத்துல ஆயுதம் இல்லாம நிக்கிறதும் கடவுள் இல்லாம பாவத்துக்குப் பக்கத்துல நிக்கறதும்  தற்கொலைக்கு சமம். விட்டுட்டு வா. 

நபர் 2 : அதெல்லாம் தன்னம்பிக்கை இல்லாதவங்களுக்கு. என்னை மாதிரி தில்லான ஆட்களை எதுவுமே தொடாது. கையை உதறிட்டு போயிட்டே இருக்கலாம்.

நபர் 1 : வேணாம்பா… இப்பவே வெளியே வந்துடு. புதைகுழில சிக்கிட்டா வெளியே வர முடியாது. நெருப்பு சின்னதா இருந்தா அணைக்கலாம். காட்டுத் தீயா மாறினா அழிக்காம போகாது. 

நபர் 2 : ஷப்பப்பா.. இந்த உதாரணம் சொல்றதை நிப்பாட்டறியா முதல்ல. நீ போய் உன் வேலையைப் பாரு.

நபர் 1 : என்னவோப்பா.. நான் உன் நல்லதுக்குத் தான் சொல்றேன்.

( நபர் 1 போகிறார் )

நபர் 2 : இந்த ஓவர் ஸ்பிரிச்சுவல் பசங்க தொல்லை தாங்கல. இதுவரை ஒண்ணுமே ஆவலையே… காலை மெதுவா போடுவோம். ( ஒரு காலை போடுகிறான் .. எடுக்கிறான். பிறகு மீண்டும் ஒரு காலை போடுகிறான். .. மறு காலைப் போடுகிறான் )

( கொஞ்சம் அந்தப் பக்கமாகப் போகிறார் )

நபர் 2 : (இரண்டு காலையும் போடுகிறான் ) ஆஹா.. இதான் பெஸ்டா இருக்கு.. செமயா இருக்கு. இதைப் போய் வேண்டாம், நல்லாயில்ல.. லொட்டு லொசுக்குன்னு சொன்னாங்க. 

( அப்போது சாத்தான் வந்து ஒரு கயிறால் கோணியை உடலோடு சேர்த்துக் கட்டி விடுகிறான் )

நபர் 2 : ஹேய்.. நீ யாரு. என்ன பண்றே.

சாத்தான் : ஒண்ணுமில்லைப்பா… நீ இப்போ தான் சரியான இடத்துக்கு வந்திருக்கே.. ஜாலியா எஞாய் பண்ணு. கடவுளாவது கத்தரிக்காயாவது.

நபர் 2 : கடவுளை அப்படியெல்லாம் சொல்லக் கூடாது. 

சாத்தான் : அடேங்கப்பா… கடவுள். மேல ரொம்ப பாசமோ.. அப்புறம் எதுக்கு என்னோட கோட்டைக்குள்ளே வந்தே. தொட்டு பாப்பாராம், தூக்கிப் பாப்பாராம், கையை நுழைப்பாராம், கடைசில கடவுளுக்கு வக்காலத்து வாங்க டிரை பண்ணுவாராம்…

நபர் 2 : இல்ல.. பாவம் எப்படி இருக்கும்ன்னு பாக்கலாம்ன்னு தான் வந்தேன்.. நான் போறேன்.

சாத்தான் : ஹா..ஹா… ஓவர் சீன் போடாதப்பா… ஒரே ஒரு பழம் தான் ஏவாள் சாப்பிட்டா.. ஒரே ஒரு பாலியல் தவறு தான் தாவீது செய்தாரு… பாவம் எல்லாம் மூட்டை மூட்டையா செய்யணும்ன்னு இல்லை.. ஒண்ணே ஒண்ணு செய்தாலும் நீ என் சைடு தான்..

நபர் 2 : இல்லை.. என்னை விட்டுடு.. நான் போணும்….

சாத்தான் : இத பார்ரா… வாடகை தராம தங்கிட்டு போக நான் என்ன சத்திரம் கட்டி வெச்சிருக்கேனா.. உன்னோட பாவத்துக்கு சம்பளம் நீ தந்துட்டு தான் போணும். 

நபர் 2 : பாவத்தோட சம்பளமா ?

சாத்தான் : ஓ.. நீ ஒழுங்கா பைபிளும் படிக்கிறதில்லையா ? “பாவத்தோட சம்பளம் மரணம்” ம்ம்ம்… ஹா..ஹா… அதை தராம நான் உன்னை இங்கேயிருந்து விடப்போறதே இல்லை

நபர் 2 : நீ பைபிள் வசனமெல்லாம் சொல்றே’

சாத்தான் : யப்பா.. நீ தம்மாத்துண்டு பையன்.. நான் இயேசுவையே வசனத்தை வெச்சு மிரட்டினவன் தெரியுமா ?

நபர் 2 : என்னை விடு.. எவ்ளோ இழுத்தாலும் உடைய மாட்டேங்குது.. ஏன் இப்படி இறுக்கமா கட்டி வெச்சிருக்கே.. என்னை விடு.

சாத்தான் : விடறதா ? பாவம் செய்யும் எவனும் பாவத்துக்கு அடிமை. நீ என் அடிமை. அடிமைகளை விடுதலையாக்கற பழக்கம் எனக்கு இல்லை.

( அப்போது நபர் 1 – அங்கே வருகிறார் )

நபர் 1 : ஐயோ.. என்னடா.. நீ அதுக்குள்ள போயி மாட்டிகிட்டே… இது யாருடா.. பயமுறுத்தற மாதிரி..

நபர் 2 : சாரிடா.. நீ சொல்லச் சொல்லக் கேக்காம நான் இதுக்குள்ள நுழைஞ்சுட்டேண்டா.. இந்த சாத்தான் வந்து என்னை வெளியேற விடாம பண்றாண்டா.

சாத்தான் : மரியாதை இல்லாம பேசினே பல்லை அடிச்சு உடைச்சுடுவேன். நானா உன்னைப் புடிச்சு இழுத்தேன். பாவம் ந்னு எழுதிக் கூட வெச்சேன். வாசிச்சுட்டு போக வேண்டியது தானே. நீயா எல்லா தப்பையும் பண்ணிட்டு பழியை மட்டும் என் தலைல போடறியா ?

நபர் 2 : டேய்..என்னை காப்பாத்துடா.. இப்போ என்ன பண்ண ? எவ்வளவோ முயற்சி பண்ணியும் இந்த கட்டை அறுக்க முடியல. 

நபர் 1 : அதை நம்மால அவுக்க முடியாது. அதுக்கு ஒரே ஒரு நபர் தான் இருக்காரு. நீ உடனே முழங்கால் படியிட்டு இயேசுவை வேண்டு. அவ்ளோ தான். உன்னோட பாவக் கட்டு எல்லாம் அறுந்து போகும்.

சாத்தான் : இந்த பய சொல்றதையெல்லாம் நம்பாதே. செபிப்பாராம், உடனே கட்டு அவுருமாம். கதை விடறதுக்கு ஒரு அளவில்லையா.. தேவையில்லாம டைம் வேஸ்ட் பண்ணாதே.

நபர் 1 : அந்த பக்கம் சொல்றதை கேக்காதே. செபம் செய்.. நீ கண்டிப்பா பாவத்தில இருந்து எஸ்கேப் ஆகலாம். 

சாத்தான் : ஆமா.. மறுபடியும் சண்டேஸ்கூல், சர்ச்சுன்னு போரடிக்கும்… இப்போ தானே கோணிக்குள்ள வந்திருக்கே.. இனிமே தான் இருக்கு நம்ம ஜாலியான வாழ்க்கையே. அவனை விட்டுடு.. நீ சைலண்டா இரு…

நபர் 2 : இல்ல.. நான் செபம் செய்யப் போறேன் . ( சட்டென முழங்கால்படியிட்டு ) இயேசுவே என்னை மன்னியும். நீரே மீட்பர். இந்த பாவக் கட்டுகளிலிருந்து என்னை விடுவியும். 

( அப்போது வெள்ளை உடை அணிந்த ஒருவர் வந்து கட்டுகளை வெட்டு விடுகிறார் . நபர் 2 ஓடிப் போய் நபர் 1ந் அருகில் நிற்கிறார் )

வெள்ளை : நான் கடவுளுடைய தூதன். இயேசுவால் அனுப்பப்பட்டேன். அவரை நோக்கிக் கூப்பிடும் யாரையும் அவர் தள்ளி விடுவதில்லை. அதனால் தான் விரைந்து வந்தேன்.

கருப்பு : நீ என்ன தான் விரைவாய் வந்தாலும், இதெல்லாம் டெம்பரவரி.. அவன் இன்னும் கொஞ்ச நாள்ல மீண்டும் என்கிட்டே வருவான்.

நபர் 2 : நோ.. நோ.. இனிமே கோணியைப் பாத்தாலே ஓடுவேன். 

கருப்பு : ஹா..ஹா.. கோணிக்கு பதிலா வேற எதையாச்சும் வைப்பேன்பா… உன்னைப் புடிக்க எனக்குத் தெரியாதா என்ன ?

வெள்ளை : நீங்க யாருக்கும் பயப்பட வேண்டாம். இறைவார்த்தைகளைப் பற்றிக் கொள்ளுங்கள். எப்போதும் இயேசுவோட நடந்தீங்கன்னா உங்களை யாரும் புடிச்சுட்டு போக முடியாது.

நபர் 2 ; சரிங்க தூதரே.. எல்லாம் என் தப்பு தான்.

வெள்ளை : மனம் மாறி கடவுளை ஏற்றுக் கொண்டு அவர் வழியில நடந்தா போதும். மற்றதெல்லாம் கடவுள் பாத்துப்பாரு. செடியோட இணைந்த கிளைகளா இருந்தா தான் எப்பவுமே பச்சையத்தோடு இருக்க முடியும். உடலோடு சேர்ந்த உறுப்பா இருந்தா தான் உயிர்ப்போட இருக்க முடியும். பிரிஞ்சு போனா கரிஞ்சு போயிடுவோம்.

நபர் 2 : ரொம்ப நன்றி தூதரே.. பாவத்தை செய்றது மட்டுமில்லை, பாவத்தை நினைக்கிறதே ஆபத்துன்னு புரிஞ்சுகிட்டேன். அதே மாதிரி, எப்பவுமே கடவுளோட இணைஞ்சு இருக்க வேண்டியதன் தேவையையும் புரிஞ்சுகிட்டேன். நன்றி. 

( எல்லோரும் செல்கின்றனர் )

பின்குரல்

இறைவனோடு எப்போதும் இணைந்தே இருப்பது தான் பாவத்தை நெருங்காத வாழ்வை நமக்குத் தரும். பாவமும் புனிதமும் ஒரே இடத்தில் வாழ்வதில்லை. கடவுளும் சாத்தானும் ஒரே இதயத்தில் இருப்பதில்லை. இறைவனோடு இணைந்தே இருப்போம். அதுவே நமது பலம் என்பதை புரிந்து கொள்வோம். 

*

Posted in Articles, Sunday School

SKIT : செபத்தின் வலிமை

Image result for angel guardian

காட்சி 1

( மிஷனரியும், மனைவியும், இரண்டு பிள்ளைகளும் மலைப்பிரதேசத்தில் வருகின்றனர். அவர்களைக் காட்டுவாசிகளின் தலைவர் சந்திக்கிறார். )

தலைவர் : உங்க கிட்டே எத்தனை தடவை தான் சொல்றது ? இங்கேயெல்லாம் நீங்க வரக்கூடாது. இங்கேயெல்லாம் தங்கக் கூடாது. கிளம்புங்க.

மிஷனரி : ஐயா, நாங்க யாருக்கும் எந்த கெடுதலும் பண்ண மாட்டோம், மக்களோடு மக்களா வாழ்ந்து அவங்களுக்கு இயேசுவைப் பற்றிச் சொல்வோம் அவ்வளவு தான்.

தலை : ஆமா. எல்லாரும் முதல்ல இப்படித் தான் வருவீங்க. அப்புறம் ஊர்ல பெரிய பிரிவினையை உருவாக்குவீங்க.

மிஷனரி : அப்படியெல்லாம் இல்லைய்யா… நாங்க யாரையுமே கட்டாயப்படுத்த மாட்டோம், விருப்பமில்லாதவங்க கிட்டே எதையும் பேசவும் மாட்டோம்…

தலை : உங்க சால்ஜாப்பு சாமாதானமெல்லாம் எனக்கு வேண்டாம். பேசாம ஊருக்கே திரும்பி போயிடுங்க. இந்த ஊர் எல்லைக்குள்ள நீங்க எங்கயுமே தங்கக் கூடாது. இது கிராமத் தலைவரா என்னோட உத்தரவு.

மிஷனரி : ஐயா.. அப்படின்னா… இந்த ஊருக்கு வெளியே எங்கயாவது தங்கிக்கலாமா ?

தலை : உனக்கென்ன கிறுக்கு புடிச்சிருக்கா ? இதென்ன சிட்டியா ? மலைக்கிராமம்யா… ஊரைச்சுற்றி காடு. தேளு, பாம்பு, புலி, கரடி, யானைன்னு ன்னு நிறைய இருக்கும். வீட்ல இடி விழுந்தா கூட வெளியே தெரியாது. உதவிக்கு யாரும் இருக்க மாட்டாங்க. அங்கே நீங்க தங்கறது தற்கொலைக்கு சமம்.

மிஷனரி : ஐயா.. கடவுள் இருக்காரு எங்க கூட. அது போதும். அவரு பாதுகாப்பாரு. ஊருக்கு வெளியிலேயே நாங்க தங்கிக்கறோம்.

தலை : அதுக்கும் எனக்கும் எந்த சம்பந்தம் இல்லை. ஏதாச்சும் ஆபத்து கீபத்து வந்தா அதுக்கு நான் எந்த விதத்துலயும் பொறுப்பில்ல, சொல்லிட்டேன்.

மிஷ : சரிங்கய்யா.. என் வாழ்க்கைக்கு இயேசு மட்டும் தாங்க பொறுப்பு.

தலை : திரும்பத் திரும்ப அதையே சொல்லி வெறுப்பேத்ததே.. எனக்கு கொலை கோபம் வருது. போ.. போ…

( மிஷனரியும் குடும்பமும் விலகுகின்றனர் )

தலை : இவனுங்களுக்கெல்லாம் எங்கேயிருந்து தான் இந்த தைரியம் வருதோ. ம்ம்.. சில விஷயங்களையெல்லாம் முளையிலேயே கிள்ளி எறிஞ்சுடணும். வளர விட்டா ஆபத்து தான். ம்ம்ம்.. பாப்போம்…

காட்சி 2

( மிஷனரியும் குடும்பமும் குடிசையில் )

மகள் 1 : அப்பா… வீட்டைச்சுற்றி ஒரே இருட்டா இருக்கு. கரெண்டும் இல்லை. விளக்கு வெளிச்சத்துல என்ன நடக்குதுன்னே தெரியல. ரொம்ப பயமா இருக்கு.

மகள் 2 : ஆமாப்பா… வெளியில ஏதேதோ சத்தமும் கேக்குது. ஏதாச்சும், பாம்பு இல்லேன்னா அனிமல்ஸ் வந்து நம்மளை கடிச்சா என்ன பண்றதுப்பா ?

மிஷ : இதையெல்லாம் படைச்ச கடவுள் நம்ம கூட இருக்கிறாரும்மா.. நீங்க ஏன் கவலைப்படறீங்க. அவரு நம்மளை காப்பாத்துவாரு.”உன் தேவனாயிருக்கிற கர்த்தராகிய நான் உன் வலதுகையைப் பிடித்து: பயப்படாதே, நான் உனக்குத் துணைநிற்கிறேன்” ந்னு சொல்றாரு. இன்னொரு விஷயம் சொல்லவா, பைபிள்ல பயப்படாதீங்கன்னு 80 தடவைக்கு மேல வருது. அதனால, பயப்படாதீங்க.

மனைவி : ஆமாம்மா… எல்லா வசதிகளையும் எதிர்பார்த்து நாம ஊழியம் செய்ய முடியுமா என்ன ? இயேசப்பாவையே எடுத்துக்கோ,அவரு பிறக்கும்போ அவருக்கு இதமாதிரி குடிசை கூட கிடைக்கல. ஒரு தொழுவம் தான் கிடைச்சுது, அதை அப்படியே ஏற்றுகிட்டு அவரு வரலையா ? கடவுள் நமக்கு எதை தராரோ அதை அப்படியே ஏத்துக்கணும்.

மகள் 1 : சரிம்மா…

மிஷ : குட் கேர்ல்ஸ்.. நாம பிரேயர் பண்ணிட்டு தூங்குவோம்… காலைல அந்த கிராமத்துக்கு போலாம்.

மகள் 2 : சரிப்பா

மனைவி : சங்கீதம் 34 1 முதல் 10 வரை வாசிக்கிறேன்.. கேளுங்க..

மகள் 1 : பிளீஸ் பிளீஸ் … நான் வாசிக்கிறேன்..

மகள் 2 : நோ..நோ நான் வாசிக்கிறேன் பிளீஸ்

மனைவி : சரி, சண்டை போடாதீங்க… ஆளுக்கு 5 வசனம் வாசிங்க.

மகள் 1 :

கர்த்தரை நான் எக்காலத்திலும் ஸ்தோத்திரிப்பேன்; அவர் துதி எப்போதும் என் வாயிலிருக்கும்.

2. கர்த்தருக்குள் என் ஆத்துமா மேன்மைபாராட்டும்; சிறுமைப்பட்டவர்கள் அதைக்கேட்டு மகிழுவார்கள்.

3. என்னோடேகூடக் கர்த்தரை மகிமைப்படுத்துங்கள்; நாம் ஒருமித்து அவர் நாமத்தை உயர்த்துவோமாக.

4. நான் கர்த்தரைத் தேடினேன், அவர் எனக்குச் செவிகொடுத்து, என்னுடைய எல்லாப் பயத்துக்கும் என்னை நீங்கலாக்கிவிட்டார்.

5. அவர்கள் அவரை நோக்கிப்பார்த்துப் பிரகாசமடைந்தார்கள்; அவர்கள் முகங்கள் வெட்கப்படவில்லை.

மகள் 2 :

6. இந்த ஏழை கூப்பிட்டான், கர்த்தர் கேட்டு, அவனை அவன் இடுக்கண்களுக்கெல்லாம் நீங்கலாக்கி இரட்சித்தார்.

7. கர்த்தருடைய தூதன் அவருக்குப் பயந்தவர்களைச் சூழப் பாளயமிறங்கி அவர்களை விடுவிக்கிறார்.

8. கர்த்தர் நல்லவர் என்பதை ருசித்துப்பாருங்கள்; அவர்மேல் நம்பிக்கையாயிருக்கிற மனுஷன் பாக்கியவான்.

9. கர்த்தருடைய பரிசுத்தவான்களே, அவருக்குப் பயந்திருங்கள்; அவருக்குப் பயந்தவர்களுக்குக் குறைவில்லை.

10. சிங்கக்குட்டிகள் தாழ்ச்சியடைந்து பட்டினியாயிருக்கும்; கர்த்தரைத் தேடுகிறவர்களுக்கோ ஒரு நன்மையுங் குறைவுபடாது

மிஷ : நாம எப்பவுமே கர்த்தருக்குப் பயந்து, அவரது வழியில நடக்கணும். செபத்தை மட்டும் விடவே கூடாது. அது தான் கடவுளோட நம்மை இணைக்கிற பாலம். செபத்தினால அதிசயம் நடந்த விஷயங்கள் நிறைய பைபிள்ல இருக்கு. அதைப்பற்றி ஒரு நாள் உங்களுக்கு விளக்கமா சொல்றேன்.. அதுக்கு முன்னாடி நாம பிரேயர் பண்ணுவோம்.. சரியா ?

( எல்லோரும் முழங்காலில் செபம் செய்கின்றனர் )

காட்சி 3

( பிரேயர் பார்ட்னரின் வீடு. கணவன் மனைவி தூங்கிக் கொண்டிருக்கிறார்கள். மனைவி சட்டென விழிக்கிறார் )

பிபா. மனைவி : ஓ… ஏன் இப்ப… இப்படி… ( அங்கும் இங்கும் நடக்கிறார் ). அவங்க குடும்பத்துக்காக செபம் பண்ணச் சொல்லி மனசுல மிகப்பெரிய ஒரு பாரம் வருதே. என்னாச்சோ ? டைம் என்ன ஆச்சி ( புலம்புகிறார்… கடிகாரத்தைப் பார்க்கிறார் ) ஓ.. அதிகாலை ஒரு மணியா … இந்த நேரத்துல ஏன் இப்படி தோணுது. சரி, பிரேயர் பண்ணுவோம்.

( மனைவி செபிக்கிறார் .. சில வினாடிகளுக்குப் பின் எழும்புகிறார் )

பிபா.மனை : நோ.. நோ.. நாம் மட்டும் இல்ல.. இன்னும் நிறைய பேர் செபம் பண்ணணும்ன்னு என்னோட மனசு சொல்லுது. ( யோசிக்கிறார்.. நடக்கிறார் ) இந்த நேரத்துல யாரை கூப்பிட முடியும் ? முதல்ல இவரை எழுப்புவோம்.

( ஏங்க.. ஏங்க.. எழும்புங்க.. எழும்புங்க )

கணவன் : ஓ.. அதுக்குள்ள விடிஞ்சுடுச்சா.. நான் இப்போ தான் தூங்கின மாதிரி தோணிச்சு ( கொட்டாவி விடுகிறார் )

மனைவி : விடியல.. ஆனா நாம மலைப்பிரதேசத்துக்கு மிஷனரியா அனுப்பி வெச்சோம் இல்லையா வெஸ்லி குடும்பத்தை ?

கணவன் : ஆமா.. அவங்களை அனுப்பி வெச்சு ஒரு மாசம் ஆச்சே… இப்போ என்ன திடீர்ன்னு எழும்பி அதைப் பற்றி கேக்கறே…

மனைவி : இல்ல.. அவங்களுக்காக செபம் பண்ணச் சொல்லி ஒரு பாரம்.

கணவன் : சரி..சரி.. நல்லா செபம் பண்ணு… என்னை டிஸ்டர்ப் பண்ணாதே.. காலைல வேலைக்கு போணும்.

மனை : இல்லங்க.. தனியா இல்லை… சேர்ந்து செபம் பண்ணணும்ன்னு தோணிட்டே இருக்கு.. வாங்க… சேர்ந்து செபம் பண்ணுவோம்

கணவன் : உண்மையிலேயே சொல்றியா, இல்ல நான் நல்லா தூங்கறதைப் பாத்து பொறாமைல எழுப்பி விட்டியா ?

மனை : ஜோக் அடிக்காதீங்க.. கடவுள் விஷயத்துல யாராச்சும் பொய் சொல்வாங்களா… வாங்க முழங்கால்ல நின்னு செபம் பண்ணுவோம்.

( சில வினாடிகளில் மனைவி மீண்டும் எழும்புகிறார் )

மனைவி : இல்ல.. இல்ல.. இதுவும் பத்தாது.. இன்னும் நிறைய செபம் வேணும். ஏதோ ரொம்ப பாரமா இருக்கு…. ஏங்க ஏங்க..

( கணவர் செபித்துக் கொண்டிருப்பவர் கண் திறந்து பார்க்கிறார் )

கண : சொல்லும்மா.. என்னாச்சு ? ஏன் முகம் ஒருமாதிரி இருக்கு ?

மனை : நிறைய பேர் சேர்ந்து செபம் பண்ணணும் போல இருக்கு.. இன்னும் நிறைய பேர். நாம உடனடியா நம்ம பிரேயர் வாரியர்ஸ் எல்லாருக்கும் போன் பண்ணுவோம். அவங்களும் செபம் செய்யட்டும்.

கண : யம்மா… விளையாடறியா…. இது அதிகாலை ஒரு மணி.. இப்போ அவங்களையெல்லாம் எழுப்பறது நல்லா இல்ல. நிம்மதியா தூங்கிட்டிருப்பாங்க. காலைல பாத்துக்கலாம்.

மனைவி : அதெல்லாம் தப்பில்லைங்க.. கெத்சமெனே தோட்டத்துல இயேசு செபம் செஞ்சப்போ தூங்கிட்டிருந்த சீடர்களை தட்டித் தட்டி எழுப்பினாருல்ல.. பாவம் தூங்கட்டும்ன்னா விட்டாரு ? சேர்ந்து செபம் பண்றது இயேசுவுக்கே தேவையா இருக்கும்போ நமக்கெல்லாம் சொல்லணுமா என்ன ?

கண : அதுவும் சரி தான்..ம்ம்.. ஓக்கே…. நான் பிரேயர் வாரியர்ஸ்ல இருக்கிற ஆண்களுக்கெல்லாம் போன் பண்றேன்.. நீ பெண்களுக்கெல்லாம் போன் பண்ணு…

( இருவரும் போன் பண்ணுகிறார்கள்.. நடந்து நடந்து.. பேசுகிறார்கள். மௌனம் )

மனைவி : எத்தனை பேர் கிட்டே சொல்லியிருக்கீங்க ? நான் பன்னிரண்டு பேரைப் புடிச்சிருக்கேன். மத்தவங்க யாரும் போன் எடுக்கல.

கண : அட.. நானும் பன்னிரண்டு பேரைத் தான் புடிச்சிருக்கேன். மத்தவங்களை ரீச் பண்ண முடியல.

மனைவி : சூப்பர்.. மொத்தம் இருபத்தாறு பேரு இருக்கோம்.. வாங்க இனிமே உருக்கமா செபம் பண்ணுவோம். அந்த மெஷினரி குடும்பத்துக்கு ஏதோ ஒரு செப உதவி தேவைப்படுது. பாவம் ரெண்டு குழந்தைகளோட தனியா இருக்காங்க, பிள்ளைகளுக்கு உடம்பு சரியில்லையோ என்னவோ. அந்த மலைப்பகுதியில போன் கூட இல்லை.. வாங்க செபிப்போம்.

கண : சரிம்மா… செபிக்கணும்ன்னு தோணினா நிச்சயம் செபிச்சிடணும். உனக்கு ஆவியானவர் ஏதோ ஒரு செப பாரம் கொடுத்திருக்காரு. அதை உதாசீனப்படுத்த வேண்டாம்

( மனைவியும் கணவனும் செபிக்கிறார்கள் )

காட்சி 4

( ஆதிவாசி தலைவனின் முன்னால் மூன்று வந்து பேர் நிற்கின்றனர் )

தலைவன் : (பரபரப்பாக ) வாங்க… வாங்க… என்னாச்சு.. போட்டீங்களா.. ஆளைப் போட்டீங்களா ? குடும்பத்தோட போட்டீங்களா ?

ந 1 ; ஐயா.. அது… வந்து… திட்டம் வெற்றியடையல.

தலைவன் : என்னது ? அப்படின்னா ? இன்னும் அவங்களை காலி பண்ணலையா ? இன்னும் ஆளை முடிக்கலையா ?

ந 2 : இல்லீங்கய்யா.. கொல்ல முடியல.. அவங்களை நெருங்கறது எங்களுக்கே ஆபத்துன்னு தெரிஞ்சதும் இங்க வந்துட்டோம்.

தலைவன் : என்னய்யா சொல்றீங்க. உங்களுக்கு ஆபத்தா ? அவன் ஒரு சோதாப் பய, கூட இருக்கிறது நோஞ்சான் பொண்டாட்டி, ரெண்டு சின்ன பிள்ளைக. இவங்களை ஒரு எறும்பை நசுக்கிற மாதிரி நசுக்கிட்டு வருவீங்கன்னு பாத்தா… இப்படி வந்து நிக்கறீங்க ?

ந 3 : ஐயா.. நீங்க நினைக்கிற மாதிரி இல்லைய்யா..

தலை : என்ன நான் நினைக்கிற மாதிரி இல்லை ? அவன் என்ன புரூஸ்ல்லீயா ? அடிச்சு தொரத்திட்டானா ?

ந 3 : அப்படி இல்லைங்கய்யா..

தலை : (கோபமாக ) என்ன நொப்படி இல்லைங்கய்யா.. ஒரு ஏழெட்டு பேரு போக வேண்டியது தானே. அமௌண்டு குடுத்துட்டேன்ல…

ந 2 : ஐயா. நாங்க ஒன்பது பேர் போனோம். வீடையும் எரிச்சு, ஆளையும் காலி பண்ற வெறியோட தான் போனோம்.

தலை : ஒன்பது பேர் போயும் ஒண்ணும் நடக்கலையா ? என்னய்யா சொல்றீங்க.

ந 1 : ஐயா.. நான் சொல்றதை கொஞ்சம் அமைதியா நிதானமா கேளுங்க. அவங்க அங்கே தனியா இல்லை.

தலை : ஆமா.. நாலுபேர் சேந்து இருக்காங்க.

ந1 : அதில்லைய்யா.. அவங்க வீட்டைச் சுற்றி நிறைய பேரு காவலுக்கு நிக்கிறாங்க.

தலை : காவலுக்கா.. அவங்க வீட்டைச்சுத்தியா ? ஏன்யா.. ஓவரா தண்ணி போட்டுட்டு போனீங்களா ? அந்த வீட்டுக்குள்ள நாலுபேரு தான் தங்க முடியும். அவங்க வீட்டைச் சுற்றி காவலுக்கு எங்கேயிருந்து ஆட்கள் வந்தாங்க ? நமக்குத் தெரியாம இந்த ஏரியால ஒரு பய நுழைய முடியுமா ?

ந 2 : அது தெரியலைய்யா.. நாங்க அருவா, கம்பம், தீப்பந்தம் எல்லாம் கொண்டு போனோம். ஆனா ரொம்ப ரொம்ப வலிமையான ஆட்கள் வாட்களோட வீட்டைச் சுற்றி அரணா நின்னாங்க.

தலை : என்னய்யா ஆளு..வாளுன்னு.. இந்த.. தலைவரோட தலையையே சுத்த வைக்கிறீங்களே.. உண்மையை சொல்லுங்கய்யா..

ந 3 : ஐயா.. உண்மை தான்யா சொல்றோம். நாங்க எண்ணிப் பாத்தோம். மொத்தம் 26 பேரு இருந்தாங்க.

தலை : ஊஹூம்ம்.. நான் நம்ப மாட்டேன்.. நான் நம்ப மாட்டேன்.

ந 2 : ஐயா.. நம்பறதும் நம்பாததும் உங்க இஷ்டம். நாங்க உங்க கிட்டே விஷயத்தைச் சொல்ல ஓடி வந்தோம். மத்தவங்க ஆள விடுங்க சாமின்னு வீடுகளுக்கே ஓடிட்டாங்க.

தலை : சே.. இதெல்லாம் நம்பற மாதிரியா இருக்கு.. வாங்க நானும் வரேன் போய் பாப்போம். அங்கே நீங்க சொல்றமாதிரி ஆட்கள் யாரும் இல்லேன்னு வெச்சுக்கோங்க… அவனுக்கு பதிலா உங்களை காலி பண்ணிடுவேன்.

ந 1 : ஐயோ.. நான் வரலேப்பா.. எனக்கு பயமா இருக்கு…

ந 2 : நானும் வரல.. எனக்கு திக் திக்குன்னு இருக்கு…

தலை : (ந3 ஐப் பார்த்து ) சரி.. நீ வா.. நாம போலாம்…

ந 3 : ஐயா..நான்.. வந்து..

தலை : அட வாய்யா.. பயந்தாங்கொள்ளி. எனக்கென்னவோ நீங்க மரத்தோட நிழலைப் பாத்துட்டு மனுஷன்னு பயந்தா மாதிரி தான் தெரியுது. ஊருக்கு வெளியே கெடக்கிறவனுக்கு எவன் பாதுகாப்பு குடுக்கிறான்னு தான் பாப்போமே.

ந 3 : ஐயா.. நிஜமாவே அங்கே…

தலை : நிறுத்துப்பா… பொய் சொல்றதுக்கு ஒரு அளவில்லையா. நீங்க எல்லாம் முதுகெலும்பில்லாத பசங்க. நான் ஒத்தையா எத்தனை பேரை காலி பண்ணியிருக்கேன் தெரியுமா ? இன்னிக்கு நானா அவனான்னு பாத்துடறேன். குடுடா அந்த அருவாளை.

ந 3 : ஐயா.. அவங்க கூட சண்டை போட முடியும்ன்னு தோணல.

தலை : அடச்சே.. கொஞ்சம் வாய மூடறியா… இன்னிக்கு நான் அவனை ஒத்தையா நின்னு வெட்டி சாய்க்கிறதை நீ பாப்பே… அங்கேயே அவங்க குடும்பத்தை சமாதி பண்ணலேன்னா நான் என்னடா ஊர்த்தலைவர்… வா நீ பேசாம…

ந 3 : ச..சரிங்கய்யா… நீங்க இருக்கிற தைரியத்துல தான் வரேன். என்னை காவு குடுத்துராதீங்கய்யா…

தலை : … சும்மா தொண தொணன்னு பேசாம வா.. (கோபமாகக் கிளம்புகிறார் )

( மேடைக்கு வெளியே போய்விட்டு .. மீண்டும் உள்ளே வருகிறார்கள் )

தலை : யப்பா.. எவ்ளோ நேரம் நடக்க வேண்டியிருக்கு.. எங்கதான்யா அவன் தங்கியிருக்கான் ?

ந 3 : மெதுவா பேசுங்கய்யா.. நாம நெருங்கிட்டோ… அதோ அந்த இடத்துல தான் அவன் வீடு ( தூரமாய்க் காட்டுகிறான் )

( நடக்கிறார்கள் )

ந 3 : ஐயா.. அதோ அங்கே பாருங்கய்யா… ( பதட்டத்துடன் ) பாருங்க.. இன்னும் அவங்க அங்கே தான் நிக்கிறாங்க..

தலை : எங்க… ( உத்துப் பார்க்கிறார் .. பயந்து போய் பின்னாடி விழுகிறார். ) ஆ…ஆ…ஆ.மா.. நிக்கிறாங்க.. எவ்ளோ உயரமா இருக்காங்க.. வாள் பள பளன்னு இருட்டுலயும் மின்னுதே…

ந 3 : த..தலைவரே…. உங்களுக்கும் தெரியுது தானே..

தலை : ஏய்.. வாயை மூடுடா.. நானே மெரண்டு போய் கெடக்கேன். ஒருத்தன் நாம இருக்கிற திசையில பாக்கற மாதிரி தெரியுது.. வா …வா.. போலாம்

ந 3 : ஐயா.. நீங்க ஊர்த்தலைவர்.. தைரியசாலி… ஒத்தையா எத்தனையோ பேரை வெட்டி சாய்ச்சிருக்கீங்க.. நீங்க போயி…..

தலை : யோவ்… அதெல்லாம் பேசற நேரமாய்யா இது…. சத்தம் காட்டாம மெல்ல நடந்து வா…

( அப்படியே பின்னோக்கி நடக்கிறார்கள் )

காட்சி 5

( தலைவர் மிஷனரி வீட்டில் )

தலை : ஐயா.. வணக்கம்

மிஷ : ஐயா.. வாங்க வாங்க.. பிரைஸ் த லார்ட்.. வீடு தேடி வந்திருக்கீங்க.. ரொம்ப சந்தோசம்.

( தலைவர் அங்கும் இங்கும் பார்க்கிறார் )

மிஷ : யாரைப் பாக்கறீங்கய்யா.. பிள்ளைகளா ? விளையாட போயிருக்காங்க…

தலை : இல்ல.. இல்ல.. பிள்ளைங்களை இல்லை…

மிஷ : அப்போ என் மனைவியை தேடறீங்களா.. கிராமத்துல காமாட்சியம்மா உடம்பு சரியில்லாம இருக்காங்க , அவங்க வீடு வரைக்கும் போயிருக்காங்க.

தலை : இல்ல.. அவங்களையும்.. தேடல

மிஷ : ஐயா.. அதைத் தவிர இந்த வீட்ல இருக்கிறது நான் தான்.. என்னை நீங்க தேடிப் பாக்க வேண்டிய தேவை இல்லை. உங்க முன்னாடியே நிக்கிறேன். ( சிரிக்கிறார் )

தலை : இல்ல.. நேற்று நைட்.. உங்க வீட்டைச் சுற்றி நின்னாங்களே.. அவங்க.. எங்கே ?

மிஷ : என் வீட்டைச் சுற்றியா ? நேற்றைக்கா.. என்னய்யா சொல்றீங்க ? காமெடி பண்றீங்க..

தலை : காமெடி பண்ணல.. நானே என் கண்ணால பாத்தேன்… உண்மையை சொல்லுங்க அவங்க எங்கே ?

மிஷ : யாருய்யா.. நிஜமாவே புரியல

தலை : இருபத்தாறு பேரு.. உங்க வீட்டைச் சுற்றி .. வாளோட நின்னாங்களே. அவங்க எங்கே ?

மிஷ : ( அதிர்ச்சியுடன் ) என்ன சொல்றீங்க.. வாளோட ஆட்கள் என் வீட்டைச் சுற்றியா ? ஏன் ?

தலை : சரி.. நான் விளக்கமா சொல்றேன். நீங்க இங்க வந்தது எனக்குப் புடிக்கல. அதனால உங்களை மொத்தமா காலி பண்ண சொல்லி ஆட்களை அனுப்பினேன். மொத்தம் ஒன்பது பேரு உங்களை தீத்துக் கட்ட வந்தாங்க. ஆனா உங்க வீட்டை நெருங்க முடியாதபடி இருபத்தாறு வீரர்கள் காவலா நின்னாங்க. முதல்ல நான் நம்பல… அப்புறம் நானே வந்து பாத்தேன்.. நேர்ல பாத்தேன்… இப்போ சொல்லுங்க.. மறைக்காதீங்க… அவங்க யாரு ? இப்போ எங்கே இருக்காங்க ?

மிஷ : ஓ.. ஜீசஸ்… அது கடவுளோட தூதர்கள் தான். என்னைக் காப்பாற்ற கடவுள் தூதர்களை அனுப்பியிருக்காரு. அவங்க தான் வாளோட வந்து என்னைக் காப்பாற்றியிருக்காங்க.

தலை : என்ன சொல்றீங்க ? கடவுளோட தூதர்களா ?

மிஷ : ஐயா.. நான் வெறும் மனுஷன். என்னை இங்கே அனுப்பினது கடவுள் தான். அவரை நம்பி தான் இங்கே வந்திருக்கேன். அவரு என்னைக் காப்பாற்றியிருக்காரு. அவ்வளவு தான். தன்னோட பிள்ளைகளை எதிர்ப்பவர்களை கடவுள் எதிர்ப்பார்.

தலை : எ..என்ன சொல்றே….இ.. இப்போ எனக்கே பயமா இருக்கே.

மிஷ : ஐயா.. இயேசு பயப்படுத்தற தெய்வம் இல்லை. நமக்காக சிலுவையில் உயிர்விட்ட தெய்வம். அவரை நம்பி அவரை ஏற்றுக் கொண்டு அவர் காட்டற வழியில நாம வாழ்ந்தா நமக்கு சொர்க்கம் நிச்சயம். ஏன்னா நம்ம பாவத்தையெல்லாம் அவர் சிலுவையில் சுமந்து தீத்துட்டாரு. அவரிடம் வருபவர்களை அவர் புறம்பே தள்ளி விடுவதில்லை. அவரை ஏற்றுக் கொள்ளுங்க. உங்களுக்காகத் தான் என்னை மாதிரி மிஷனரிஸ் இங்கே வரோம். இதுல நன்மை உங்களுக்குத் தான். இந்த மீட்பை உங்களுக்கு அறிமுகப்படுத்தத்தான் நாங்க உயிரைக் கொடுத்து பணி செய்றோம்.

தலை : எங்களுக்காக.. ( அமைதியான குரலில் ) நீங்க ஏன் இப்படி ? எனக்கு ஒண்ணுமே புரியல.

மிஷ : ஏன்னா, இயேசு சொன்னாரு.. தன் நண்பனுக்காக உயிரைக் கொடுக்கிறதை விட மேலான அன்பு வேற இல்லேன்னு … நீங்க என் நண்பர், என் சகோதரர்.. உங்களுக்காக உயிரைக் கொடுக்கிறது கூட எனக்குச் சந்தோசமே…

( தலைவர் மிஷனரியை அரவணைக்கிறார். )

காட்சி 6

( கடிதம் ஒன்றை பிரேயர் பார்ட்னர் குழுவைச் சேர்ந்த பெண் வாசிக்கிறார் )

அன்புள்ள பிரேயர் பார்ட்னர்ஸ்க்கு,

ஒரு அதிசயமான செய்தியை நான் உங்களோடு பகிர்ந்து கொள்ள வேண்டும். எங்கள் குடும்பத்தைப் படுகொலை செய்ய கடந்த நான்காம் தியதி நள்ளிரவுக்குப் பின் ஒன்பது பேர் வந்திருக்கிறார்கள். அப்போது கடவுள் இருபத்தாறு தூதர்களை என் வீட்டைச் சுற்றிக் காவல் புரிய அனுப்பியிருக்கிறார். அவர்கள் உருவிய வாளோடு நின்ற காட்சியைக் கண்டு கொல்ல வந்தவர்கள் ஓடி விட்டார்கள்.

என்னைக் கொல்ல ஆளனுப்பிய தலைவர் இப்போது கிறிஸ்தவராக மாறிவிட்டார். என்னைக் கொல்ல வந்தவர்கள் எல்லோருமே கிறிஸ்தவர்களாக மாறுவார்கள் எனும் நம்பிக்கை எனக்கு உண்டு.

தொடர்ந்து எனக்காகவும், என் குடும்பத்துக்காகவும் செபியுங்கள்.

அன்புடன்
மிஷனரி

மனைவி : ( பதட்டத்துடன் ) ஏங்க… ஏங்க… புரியுதா…உங்களுக்குப் புரியுதா ?

கணவன் : ( மெதுவாக ) நீ சொல்றது என்னிக்குத் தான் எனக்குப் புரிஞ்சிருக்கு.. ( சத்தமாக ) என்னது… சொல்லு சொல்லு…

மனைவி : நாம ஒரு நாள் நடு ராத்திரி முழிச்சி இந்த மிஷனரிக்காக செபம் பண்ணினோமே…

கணவன் : ஆமா.. நாலாம் தியதி.

மனைவி : எத்தனை பேரு செபம் பண்ணினோம்..

கணவன் : ஆண்கள் பன்னிரண்டு, பெண்கள் பன்னிரண்டு அப்படி இருபத்து நாலு…

மனைவி : யப்பா.. நீங்க கணிதப் புலி தான்… நம்மளோட சேர்த்தா மொத்தம் இருபத்தாறு… இப்போ… இந்த லெட்டரை படிங்க…. ( மனைவி லெட்டரை அவரிடம் கொடுக்கிறார் )

( கணவன் படிக்கிறார் )

கண : ( ஆச்சரியமாய் ) பிரைஸ் த லார்ட்.. எவ்ளோ பெரிய விஷயம். செபத்தோட மகிமையும், வலிமையும் என்னன்னு நினைச்சாலே பிரமிப்பா இருக்கு.

மனை : ஆமாங்க.. அன்னிக்கு…. ஏன் நிறைய பேர் செபிக்கணும் ? ஏன் நிறைய பேர் செபிக்கணும்ன்னு என் மனசுக்குள்ள கேள்வி வந்துட்டே இருந்துச்சு. இப்போ தான் தெரியுது. அத்தனை செபங்களுக்கான பதிலா, அத்தனை ஏஞ்சல்ஸ் வந்திருக்காங்கன்னு.

கண : ஆமா.. உண்மையிலேயே நான் கூட செபத்தையும், செப வாரியர்ஸையும் ரொம்ப சீரியசா எடுத்ததில்லை. இன்னைல இருந்து , ஏன் இந்த நிமிஷத்துல இருந்து நான் மாறிட்டேன். செபத்தைப் போல வலிமையான விஷயம் இல்லைன்னு புரிஞ்சுகிட்டேன்.

மனை : பிரைஸ் த லார்ட்ங்க.. இந்த விஷயத்தை நம்ம பிரேயர் வாரியஸ்க்கும் சொல்வோம். அவங்களுக்கு ரொம்ப உற்சாகமா இருக்கும்.

<< நிறைவு >>

Posted in Articles, Christianity, Sunday School

SKIT : பாவம் வாசலில் படுத்திருக்கும்

பாவம் வாசலில் படுத்திருக்கும்

*=

காட்சி 1

( விக்டர் & ஸ்டீபன்  . முதலில் விக்டர் செயரில் அமர்ந்து பைபிள் வாசித்துக் கொண்டிருக்கிறார். அப்போது ஸ்டீபன் வருகிறான் )

விக்டர் : ( பைபிள் படித்துக் கொண்டிருக்கிறான் )

ஸ்டீபன் : ஹேய்.. விக்டர்.. என்னப்பா.. மரத்து மூட்ல உக்காந்து சீரியசா பைபிள் வாசிச்சிட்டு இருக்கே போல.

விக்டர் : ஆமாடா.. நாளைக்கு நம்ம பைபிள் ஸ்டடிக்கு கொஞ்சம் பிரிபேர் பண்ணலாம்ன்னு பாத்தேன். பைபிள் ஒரு புதையல் இல்லையா.. அதான் வாசிக்க வாசிக்க அப்படியே போயிட்டே இருக்கு.. நீ படிச்சிட்டியா..

ஸ்டீபன் : ஓ..யா.. நானும் மறந்துட்டேன்.. நானும் படிக்கிறேன்… ( ஒரு செயரை இழுத்துப் போட்டு உட்கார்கிறான். மொபைலை எடுக்கிறான் )

விக்டர் : கைல பைபிள் இல்லையா… ? 

ஸ்டீபன் : இப்போ பைபிளையெல்லாம் நான் ரொம்ப யூஸ் பண்றதில்லை. ஸ்மார்ட் போன் வந்தப்புறம்.. இதான் ஈசியா இருக்கு. 

விக்டர் : இருந்தாலும் பைபிள்ல படிக்கிற மாதிரி ஃபோக்கஸ் கிடைக்காது. தவிர்க்க முடியாத சூழல்கள்ல போன்ல படிக்கலாம்.. எப்பவுமே போன்ல படிக்கிறது எனக்கென்னவோ சரியா படல.

ஸ்டீபன் : நீயெல்லாம் ஒரு பழைய பஞ்சாங்கம்டா…. இந்த போன்ல படிக்கிறதுல எவ்ளோ யூஸ் இருக்கு தெரியுமா.. உதாரணமா.. நீ படிக்கிற பைபிள் என்ன வெர்ஷன் ?

விக்டர் : கிங் ஜேம்ஸ்.. பவர் எடிஷன்.

ஸ்டீபன் : உன் கிட்டே, என் ஐ வி இருக்கா ? நியூ கிங் ஜேம்ஸ் இருக்கா ? அமெரிக்கன் ஸ்டாண்டர்ட் வெர்ஷன் இருக்கா.. சீ.. என் கைல எல்லாமே இருக்கு. எதை வேணும்ன்னாலும் நான் படிக்கலாம்.

விக்டர் : ம்ம்.. குட்..குட்.. உனக்கு அது கம்ஃபர்ட்டபிளா இருந்தா அதை படி.. எனக்கு பிரச்சினை இல்லை ( புன்னகைக்கிறான்.. பின் படிக்கத் துவங்குகிறான் )

ஸ்டீபன் : ( மொபைலை எடுத்து படிக்கிறான் )… டொய்ங்…. ( ஒரு மெசேஜ்  வருகிறது… ஸ்டீபன் அதைப் பார்க்கிறான்.. சிரிக்கிறான். மொபைபில் பதில் அனுப்புகிறான். பிறகு விக்டரைப் பார்த்துவிட்டு.. மீண்டும் மொபைபில் பைபிள் படிக்கிறான். விக்டர் எதையும் கவனிக்காமல் பைபிள் படித்துக் கொண்டே இருக்கிறான்.

( டொய்ய்ங்… ) இப்போது மீண்டும் ஒரு மெசேஜ் வருகிறது… 

ஸ்டீபன் : யப்பா.. நாடு போற போக்கை நினைச்சா என்ன பண்றதுன்னே தெரியல. யாருக்கும் பாதுகாப்பில்லை. மனிதாபிமானமே செத்துப் போச்சு. ( மீண்டும் விக்டரைப் பார்த்தபடி படிக்கிறான் )

( ஒரு கால் வருகிறது.. எடுக்கிறான்.. எழும்பி நடந்தபடி பேசுகிறான் .. மீண்டும் வந்து உட்கார்ந்து படிக்கிறான் )

ஸ்டீபன் : (டொய்ங்.. மறுபடியும் சத்தம்.. இப்போது ஃபேஸ்புக்.. ஸ்கிரீனை விரல்களால் தள்ளி விட்டபடி.. கொஞ்ச நேரம் பார்க்கிறான். சிரிக்கிறான் )

விக்டர் : வெரி இண்டரஸ்டிங் பேசேஜ்பா… யப்பா.. என்ன அற்புதமான பகுதி…. இல்லையா ?? படிச்சு முடிச்சுட்டியா..

ஸ்டீபன் : ஓ.. நீ அதுக்குள்ள முடிச்சுட்டியா.. நான் இன்னும் முடிக்கல… ஐ மீன்.. கொஞ்சம் படிச்சேன்.. இனி கொஞ்சம் டீப்பா படிக்கணும்…

விக்டர் : ம்ம்ம்..  சரிடா.. கிளம்புவோமா ? நாளைக்கு சர்ச்ல மீட் பண்ணுவோம். சர்ட் முடிஞ்சப்புறம் தானே பைபிள் ஸ்டடி… அதுக்குள்ள பிரிபேர் பண்ணிடு. 

ஸ்டீபன் : யா.. யா.. அதெல்லாம் பண்ணிடலாம்.. சீ யூ டுமாரோ

காட்சி 2

( சர்ச்சில் விக்டரும் ஸ்டீபனும் உட்கார்ந்திருக்கின்றனர்.. விக்டர் முதலில் அமர்ந்திருக்கிறார். கொஞ்ச நேரத்துக்குப் பின் ஸ்டீபன் ஓடி வந்து அருகில் அமர்கிறான்… )

விக்டர் : ஹாய்… வா.. உக்காரு…

ஸ்டீபன் : நல்லவேளை மெசேஜ் ஆரம்பிக்கறதுக்கு முன்னாடி வந்துட்டேன்… கொஞ்சம் லேட்டாயிடுச்சு… நைட் தூங்க லேட்டாச்சு அதான் பிராப்ளம்.

விக்டர் : ம்ம்ம்…. ஓக்கே… ஓக்கே.. அமைதியா உக்காரு.. இது சர்ச் ( புன்னகைக்கிறான் )

ஸ்டீபன் : யாருடா இன்னிக்கு மெசேஜ் ?

விக்டர் : இன்னிக்கு நம்ம பாஸ்டர் தான்…

ஸ்டீபன் : ஓ.. அவரா… செம போரா இருக்குமேடா… பேசாம வீட்லயே தூங்கியிருக்கலாம் போல….இங்கயும் அதை தான் பண்ண போறேன்…. 

விக்டர் : மெசேஜே ஆரம்பிக்கல, அதுக்குள்ள ஜட்ஜ்மெண்டே குடுக்கிறே …. கேப்போம் கடவுள் நம்ம கிட்ட என்னதான் பேசறாருன்னு.. 

ஸ்டீபன் : ம்ம்.. ஓக்கேடா… ( கொஞ்சம் அமைதி ) உன் ஷர்ட் நல்லா இருக்குடா.. எங்கே வாங்கினே ? புதுசா ?

விக்டர் : எல்லாம் சர்ச் முடிஞ்சு சாவாகாசமா பேசிக்கலாம்பா…. கொஞ்சம் வெயிட் பண்ணு..

ஸ்டீபன் : ஓக்கே..ஓக்கே… அதா மெசேஜ் ஸ்டார்ட் ஆகுது.. பாப்போம்.. ஏதாச்சும் புரியுதான்னு… 

( இருவரும் மெசேஜ் கவனிப்பது போல … ) 

( ஸ்டீபன் பொறுமை இழந்து நெளிகிறான்.. கொட்டாவி விடுகிறான் )

ஸ்டீபன் : செம கடிடா.. மாசத்துக்கு ஒரு நாள் இவரு பேச்சை நம்மால கேக்க முடியல. பாஸ்டரம்மா பாவம் தான்.. எப்படி நாள் முழுக்க இவரோட பேச்சை கேக்கறாங்களோ…  

விக்டர் : டேய்.. சர்ச்ல ஜோக் அடிக்காதே.. ஜஸ்ட் லிசன்… கடவுள் ஏதோ ஒரு வார்த்தை மூலமா நம்ம கிட்டே பேசுவார்..

ஸ்டீபன் :ம்ம்ம் சரிடா… ( சொல்லிக் கொண்டே போனை நோண்டுகிறான் ). 

ஸ்டீபன் : போன வாரம் சர்ச்ல ஏதோ பிரச்சினையாமே.. கேள்விப்பட்டியா ?

விக்டர் : இல்லைடா.. அதெல்லாம் அப்புறம் பேசுவோம்… கொஞ்சம் வெயிட் பண்ணு..

ஸ்டீபன் : ஓக்கேடா.. ரொம்ப புழுக்கமா இருக்கு.. நான் வெளியில போய் உக்கார்ரேன்…. சர்ச் முடிஞ்சப்புறம் பேசுவோம்.

விக்டர் : ஏண்டா வெளியே போறே.. இங்கே உக்காரு.. வெளியே போனா போக்கஸ் பண்ண முடியாது.

ஸ்டீபன் : நோ..நோ.. சூடா இருந்தா தான் என்னால போக்கஸ் பண்ண முடியாது.. நீ இங்கே இரு… 

( ஸ்டீபன் வெளியே போகிறான் )

காட்சி 3

( பஸ் ஸ்டாண்ட் … விக்டர் ஸ்டீபன் .. இப்போது விக்டரின் கையில் ஒரு சின்ன பைபிள் இருக்கிறது.. )

ஸ்டீபன் : ஹேய்.. எங்கடா போறே ?

விக்டர் : ஹேய் ஸ்டீபன்.. நான் கோயம்பேடு வரைக்கும் போகணும்பா.. கொஞ்சம் திங்க்ஸ் வாங்க வேண்டியிருக்கு.

ஸ்டீபன் : எனக்கும் கோயம்பேடு மார்க்கெட் தாண்டா போணும்.. என்னாச்சு பஸ் வரலையா..

விக்டர் : என்னன்னு தெரியல.. ரொம்ப நேரமா பஸ்ஸே வரல… 

ஸ்டீபன் : ம்ம்.. கைல அதென்னடா ? பைபிளா ? இவ்ளோ சின்னதா இருக்கு. 

விக்டர் : இது பாக்கெட் பைபிள்டா.. டிராவல்ல பெரிய பைபிள் எடுத்துட்டு போக முடியலைன்னா இதை பாக்கெட்ல போட்டுப்பேன். இப்படி பஸ்ஸுக்கு காத்திருக்கிற நேரத்துல நாலு வசனம் படிச்சா மனசுக்கு ஆறுதலா இருக்கும். 

ஸ்டீபன் : டேய்.. எப்பவும் வசனம் வசனம்னு இருக்காதே. உலகத்தைப் பாரு.. கடவுள் இந்த உலகத்தை ஏன் இவ்ளோ அழகா படைச்சாரு ? நாம பாத்து ரசிக்கணும்ன்னு தான்.

விக்டர் : இந்த மொட்டை வெயில்ல.. தார் ரோட்ல நீ இயற்கையை ரசிக்கிறே… நடக்கட்டும் நடக்கட்டும்

ஸ்டீபன் : சரி, இயற்கைன்னா இயற்கை இல்லை.. மக்களை பாக்கலாம்.. அவங்களோட பழக்க வழக்கங்களைப் பாக்கலாம்.. இதெல்லாம் நமக்கு வாழ்க்கைப் பாடம் இல்லையா ?

விக்டர் : அதையெல்லாம் பாக்கறதால எனக்கு என்னடா லாபம் ? 

ஸ்டீபன் : சமூகத்தோட ஒட்டாம இருக்கிறது ரொம்ப தப்புடா

விக்டர் : டேய்.. நான் எங்கடா ஒட்டாம இருக்கேன்.. டைமை வேஸ்ட் பண்ற நேரத்துல வேட்ஸ் படிக்கிறேன் அவ்வளவு தான். இப்போ என்ன உங் கூட பேசிட்டு தானே இருக்கேன். 

ஸ்டீபன் : ம்ம்ம்.. என்னவோ போ…  ( எதையோ உற்றுப் பார்க்கிறான் ).. ம்ம்…ச்சே… மக்களோட டிரசிங் சென்ஸ் ரொம்ப கம்மியாயிடுச்சு.. இப்படிப்பட்ட டிரஸ் எல்லாம் போட எப்படித் தான் பேரண்ட்ஸ் பெர்மிஷன் குடுக்கிறாங்களோ 

விக்டர் : இப்படிப்பட்ட காட்சியெல்லாம் பாக்க வேண்டாம்ன்னு தான் நான் பைபிளை பாக்கிறேன்.. நீ தான் சமூகம், இயற்கை, மக்கள் ந்னு இப்படி புலம்பறே..

ஸ்டீபன் : ஐமீன்… மக்களை டைவர்ட் பண்றாங்க.. இப்படியெல்லாம் டிரஸ் பண்ணி.. அதான் சொன்னேன்.

விக்டர் : ம்ம் உண்மை தான்.. அவங்களை விமர்சிக்கிறதை விட, நாம கவனமா இருக்கணுன்னு நான் நினைக்கிறேன்.

ஸ்டீபன் : ஓ.. மை காட்..  ( கையை நீட்டி ) அவன் போற போக்கைப் பாரு.. பைக் கிடைச்சா எப்படி வேணும்ன்னாலும் ஓட்டிடுவாங்களா… வாயில அசிங்கமா வருது.. பொறுப்பில்லாத பசங்க. 

விக்டர் : ம்ம்ம்.. ( கையிலிருக்கும் சின்ன பைபிளை பிரிக்கிறான் ) நம்ம கண்களை பாதுகாக்கணும்ன்னா வசனம் தாண்டா… 

ஸ்டீபன் : ம்ம்ம்.. படி.. நான் மெயில் செக் பண்ணிக்கறேன்…. 

காட்சி 4

( ஸ்டீபன் & விக்டர் )

ஸ்டீபன் : விக்டர்.. உன் கிட்டே கொஞ்சம் பேசணும்… 

விக்டர் : சொல்லுடா.. என்ன விஷயம் ..  என் கிட்டே பேச பெர்மிஷன் எல்லாம் கேக்க தேவையில்லை.. சொல்லு

ஸ்டீபன் : கொஞ்ச நாளாவே மனச சரியில்லை.. ஸ்பிரிச்சுவலா வீக்கா போற மாதிரி ஒரு பீலிங்… ஒரு நிம்மதியில்லை… 

விக்டர் : ம்ம்ம்.. நானே உன் கிட்டே பேசலாம்ன்னு தான் நினைச்சேன். பைபிள்ல ஒரு வசனம் உண்டு. பாவம் நம் வீட்டு வாசல்படியில் படுத்திருக்கும், நாம அதை அடக்கி ஆளணும்ன்னு…. கதவைத் திறந்தா தான் ஆபத்து… கவனமா இருந்தா ஆபத்துல்ல..

ஸ்டீபன் : அப்படின்னா ? புரியல

விக்டர் : நம்ம இலக்கு இயேசுவைப் போல மாறணும், புனிதமான வாழ்க்கை வாழணும்ன்னு தான் இருக்கணும். ஆனா அது சாத்தானுக்குப் புடிக்காது. எப்படிடா நம்மளோட சிந்தனையை திசை திருப்பலாம்ன்னு தான் அலைவான். அதுக்கு நாம இடம் கொடுக்கக் கூடாது. 

ஸ்டீபன் : இன்னும் கொஞ்சம் புரியற மாதிரி சொன்னா நல்லா இருக்கும்.

விக்டர் : உதாரணமா, பைபிள் வாசிக்கும்போ நம்ம கவனம் பைபிள்ல மட்டும் இருக்கணும். அதுக்கு மொபைல் இடைஞ்சலா இருக்குன்னா ஒதுக்கி வைச்சுடணும். கடவுள் இடறலாய் இருக்கிற கண்ணையே பிடிங்கி எறிய சொன்னார். மொபைல் இடறலாய் இருந்தால் மொபைலை தூக்கி எறிய தயங்கக் கூடாது. 

ஸ்டீபன் : யா.. அது உண்மை தாண்டா.. நான் மொபைல்ல பைபிள் வாசிக்க ஆரம்பிப்பேன்.. கடைசில வாட்ஸர், எஸ் எம் எஸ், டுவிட்டர் ந்னு எல்லா இடங்கள்ளயும் அலைஞ்சு பைபிளை வாசிச்சும், வாசிக்காமலும் தான் முடிப்பேன். 

விக்டர் : யெஸ்.. அதான் சொல்ல வந்தேன். சர்ச்ல வரும்போ கூட நம்ம கவனம் கடவுள் மேல இருக்கணுமே தவிர, கூட இருக்கறவங்க மேல இருக்கக் கூடாது. இறை பிரசன்னத்தை விட்டு நம்மை விரட்டணும்ன்னு சாத்தான் ரொம்ப முயற்சி பண்ணுவான். அந்த டிராப்ல நாம விழக் கூடாது.

ஸ்டீபன் : யா.. ஐ அக்ரீ.அ து என் தப்பு தாண்டா…

விக்டர் : உலகத்தை ரசிக்கிறது, இயற்கையை ரசிக்கிறது எல்லாம் நல்லது தான். ஆனா நம்ம கண்கள் பலவீனமானவை. ஊனுடல் பலவீனமானதுன்னு இயேசுவே சொல்லியிருக்காரு. அதனால நாம பாவத்தை கண்டா ஓடி ஒளியணும். அதான் ஈசி.

ஸ்டீபன் : உண்மை தாண்டா.. எப்பவுமே பைபிளா, எப்பவுமே கடவுளான்னு நினைக்கிறது தான் தப்பு. எப்பவுமே கடவுளோட இருக்கிறது தான் நம்மை சரியா நடத்தும். சரியா ?

விக்டர் : எக்ஸாக்ட்லி.. ஜீசஸ் என்ன சொன்னாரு.. என் நுகத்தை ஏற்றுக் கொண்டு என்னோடு வாருங்கள் ந்னு சொன்னாரு. நுகத்தோட ஒரு பக்கம் இயேசு, இன்னொரு பக்கம் நாம. அப்படி பயணிக்கும்போ நாம தடுமாறினாலும் இயேசு நம்மை கூட்டுட்டு போவாரு. நாம தடம் மாறினாலும் இயேசு நம்மை சரி பண்ணுவாரு. 

ஸ்டீபன் : நுகம்ன்னா என்னடா ? அந்த வயல்ல ரெண்டு மாடு கட்டி உழுவாங்களே ? அதுவா ? 

விக்டர் : ஆமாடா. அதுல நாமும் இயேசுவும் இருக்கணும். அதான் இயேசு விரும்பறது. அப்போ தான் நம்ம போக்கஸ் சரியா இருக்கும். சரியான இடத்துல இருக்கும். 

ஸ்டீபன் : உண்மை தான்.. நீ சொல்லும்போ தான் என்னோட தப்பெல்லாம் புரியுது. என்னோட போக்கஸ் இறைவன் மேல இல்ல, அதான் தப்பு.

விக்டர் : குதிரைச் சவாரி செய்யும்போ , குதிரையோட கண்களுக்கு பக்கத்துல ஒரு மறைவை கட்டுவாங்க. அதனால குதிரை அந்தப் பக்கம், இந்தப் பக்கம் பாக்க முடியாம நேரா மட்டும் தான் பாக்கும். அப்போ தான் அது அலைபாயாம, இலக்கை நோக்கிப் பாயும். நம்ம கண்களையும் இறைவார்த்தைங்கற கவசத்தால கட்டி பாதுகாக்கணும். அப்போ தான் இலக்கு இயேசுவை நோக்கி இருக்கும்.

ஸ்டீபன் : ஆமா, குதிரைன்னு சொன்னதும், குதிரை யுத்த நாளுக்கு ஆயத்தமாகும் ஜெயமோ கர்த்தரால் வரும்ங்கற வசனம் ஞாபகத்துக்கு வருது. 

விக்டர் : அதுல கூட பாரு, ஜெயம் கர்த்தரால தான் வரும். அதுல சந்தேகமே இல்லை. ஆனா குதிரையை யுத்த நாளுக்காய் ஆயத்தப்படுத்தணும். அதான் ரொம்ப முக்கியம். அதை நாம தான் பண்ணணும். நம்மை இறைவனோட வருகைக்கு ஆயத்தமா வெச்சிருக்கணும். அப்போ. மீட்பு இறைவனால் நமக்குக் கிடைக்கும்.

ஸ்டீபன்  : ரொம்ப அழகா சொன்னேடா… இப்போ எனக்கு கொஞ்சம் நிம்மதி வந்திருக்கு.

விக்டர் : கவலைப்படாதே.. இயேசு சொன்னதை ஞாபகம் வெச்சுக்கோ. “மரியாள் நல்ல பங்கைத் தேர்ந்து கொண்டாள் “ அப்படித் தானே இயேசு சொன்னார். இயேசுவோட வார்த்தைகளைக் கேக்கறது, அவர் அருகே அமர்ந்திருப்பது தான் நல்ல பங்குன்னு இயேசு சொல்றாரு. நாமும் அதையே பற்றிக் கொள்வோம். வேற எதுவும் தேவையில்லை.

ஸ்டீபன் : ரொம்ப நன்றிடா… ஐம் கிளியர் நௌ…கிளம்பறேன்.

விக்டர் : ஓகேடா.. பிரைஸ் த லார்ட். 

பின் குரல் :

பாவம் நம்மைச் சுற்றி வலை விரித்துக் கொண்டே இருக்கிறது. பாவம் நம்மைச் சுற்றி தூண்டில்களைப் போட்டுக் கொண்டே இருக்கிறது. பாவம் நம் பாதைகளெங்கும் கண்ணி வெடிகளை புதைத்து வைத்துக் கொண்டே திரிகிறது. விழிப்பாய் இருப்போம். இறைவார்த்தை எனும் கேடயம் நம்மிடம் இருந்தால், பாவத்தின் வாள்வீச்சுகளிலிருந்து தப்பிக்கலாம். அலட்சியமாய் இருப்பது மிகவும் ஆபத்தானது. இறைவனோடு இருப்பது மட்டுமே தேவையானது. சிந்தித்து செயல்படுவோம்.