Posted in Articles, Sunday School

SKIT : கோதுமை மணி

கோதுமை மணி – 1
( மிஷனரி ஜெயராஜ் வாழ்க்கை )

Image result for christian missionary in tribals

Pic: from Net

காட்சி 1

( ஊழியர் ஜெயராஜ், அவரது மனைவி ரத்னா, அவரது சின்ன மகன் லிவிங்க்ஸ்டன் மற்றும் கைக்குழந்தை. இவர்கள் எல்லோரும் ஆலயத்தின் உள்ளே முன் வரிசையில் அமர்ந்திருக்கின்றனர்)

லிவிங்க்ஸ்டன் : ( அப்பாவின் கையைத் தட்டி ) அப்பா.. அப்பா

ஜெயராஜ் : ம்ம்.. என்னப்பா ?

லிவி : நாம மட்டும் ஏன்பா முன்னாடி உக்காந்திருக்கோம் ? எப்பவும் அங்கே தானே உக்காந்திருப்போம் ?

ஜெயராஜ்: நாம ஒரு ஊழியத்துக்காக போகப் போறோம்பா. கடவுளுக்கான ஊழியம் இல்லையா ? அதனால நமக்காக அவங்க எல்லாம் செபம் செய்வாங்க. அதனால தான் இங்கே இருக்கோம்.

லிவி : ஊழியம் ஊழியம்ன்னு அடிக்கடி சொல்றீங்களே… ஊழியம்ன்னா என்னப்பா ?

ஜெயராஜ் : இயேசுவைப் பற்றி சொல்றது தான்பா நம்மைப் பொறுத்தவரைக்கும் ஊழியம்.

லிவி : ஓ.. அதெப்படிப்பா சொல்றது ?

ஜெயராஜ் : நாம பிறருக்கு இயேசுவோட அன்பைப் பற்றி வாயால பேசலாம். அதே போல இயேசுவைப் போல நல்ல ஒரு வாழ்க்கை வாழ்ந்து அந்த வாழ்க்கையின் மூலமாகவும் இயேசுவை அறிவிக்கலாம்.

லிவி : இப்போ நாம எந்த இடத்துக்குப்பா போகப் போறோம் ?

ஜெயராஜ் : பீகார் ந்னு ஒரு இடத்துக்கு போறோம்.

லிவி : அதெங்க இருக்கு.. ரொம்ப தூரமா ? ஏன்பா பீகார் போணும்…

ஜெயராஜ் : பீகார்ல கிறிஸ்துவைப் பற்றி அறியாதவங்க தான் நிறைய பேர் இருக்காங்க. அதனால தான் அங்க போறோம். ரொம்ப தூரம் போணும்.

லிவி : ஓ.. அந்த இடம் நல்லா இருக்குமா ?

ஜெயராஜ் : நாம போறது ஒரு மலைப்பகுதிப்பா. அங்க யாருக்கும் தமிழ் தெரியாது. மலைக்கு கீழே இருக்கிற மக்கள் சந்தாலி மொழி பேசற ஆதிவாசிகள். மேலே இருக்கிறவங்க மால்ட்டோ மொழி பேசும் ஆதி திராவிட மக்கள். மலையில ஏறி வரணும்.. முடியுமா ?

லிவி : இயேசப்பா உங்களை எங்கெல்லாம் கூட்டிட்டு போவாரோ, அங்கெல்லாம் நானும் வருவேன்பா.. ஆமா ஆதிவாசிகள்ன்னா யாரு ?

சரி.. சரி.. சரி… கொஞ்சம் அமைதியா இரு.. பாஸ்டரும் , மூப்பர்களும் வராங்க. உனக்கு எல்லாம் விரிவா அப்புறம் சொல்லித் தரேன் சரியா ?

லிவி : சரிப்பா

( பாஸ்டரும், மூப்பர்களும் வருகின்றனர். மூவரும் எழுந்து நிற்கின்றனர். கை கூப்பி வணக்கம் சொல்கின்றனர் )

பாஸ்டர் : நாம செபிப்போம். ஆண்டவரே இந்த சகோதரர் ஜெயராஜையும் அவரது குடும்பத்தையும் உம்முடைய மிஷனரி ஊழியப் பணிக்காக அர்ப்பணிக்கிறோம். ஆதித்திருச்சபை நாட்களில் அந்தியோக்கிய திருச்சபையின் தூண்களாக விளங்கிய பவுலையும், பர்ணபாவையும் இந்த சிறப்புப் பணிக்காக தூய ஆவியானவர் அழைத்தது போல, இவர்களையும் தூய ஆவியானவரே அழைத்து வழிநடத்தட்டும். ஆமேன்.

மூப்பர் : உங்களுக்காக நாங்கள் தொடர்ந்து செபிப்போம். உங்களுடைய பணத் தேவைகளையெல்லாம் இந்த திருச்சபையே ஏற்றுக் கொள்ளும். கடவுள் உங்களோடு துணை நிற்பார்.

ஜெயராஜ் : மதிப்புக்குரிய ஆயர் அவர்களுக்கும், மூப்பர்களுக்கும், உங்க எல்லாருக்கும் என்னோட நன்றி. உங்கள் செபங்கள் தான் எங்களை வழிநடத்த வேண்டும். உங்களுக்கே தெரியும் பீகாரை, “மிஷனரிகளின் கல்லறைத் தோட்டம்” என்று அழைப்பார்கள். ஆனால் நமது ஆண்டவர் கல்லறையை உடைத்து உயிர்த்தவர். எந்த கல்லறைத் தோட்டத்தையும் அவருக்குப் பிரியமான ஏதேன் தோட்டமாக மாற்ற வல்லவர். பிசாசின் இருள் சூழ்ந்திருக்கும் பகுதிகளுக்கு, இறைமகன் இயேசு எனும் வெளிச்சம் சுமந்து செல்கிறோம். உங்களுடைய செபங்களை நம்பித் தான் புறப்பட்டுச் செல்கிறோம்.

நவீன கால மிஷனரிகளின் தந்தை வில்லியம் கேரி சொன்னது போல, மிஷனரிப் பணித்தளம் எனும் தங்கச் சுரங்கத்தில் இறங்குகிறேன். நீங்கள் உங்கள் செபம் எனும் கயிறால் என்னைத் தாங்குங்கள். இது கடவுள் தந்த பணி. இதற்காக கடவுளுக்கு நன்றி செலுத்துகிறேன். கோதுமை மணி மண்ணில் விழுந்து மடிந்தால் தான் பலன் கொடுக்கும் எனும் இயேசுவின் அழைப்பை ஏற்று செல்கிறேன். எனக்காகவும், என் குடும்பத்துக்காகவும் செபிக்கும் படி மீண்டும் ஒருமுறை கேட்டுக் கொள்கிறேன்.

மூப்பர் : நன்றி சகோதரரே.. இறைவன் உங்களோடும், உங்களுக்கு முன்பாகவும் செல்வார்.

ஜெயராஜ் : ப்ரைஸ் த லார்ட்.

 

காட்சி 2

( பீகாரில் ஜெயராஜின் குடும்பம் சென்று சேர்கிறது )

 

லிவி : அப்பா.. என்னப்பா இவ்ளோ குளிரா இருக்கு.

ஜெயராஜ் : ஆமாப்பா.. இங்கே நம்ம ஊரை விட ரொம்ப அதிகம் குளிரா இருக்கும். அதுவும் நாம போற இடம் மலைப்பகுதியாச்சா.. குளிர் இன்னும் அதிகமா இருக்கும்

லிவி : அப்படியா ? அப்படி கஷ்டப்பட்டு நாம ஏம்பா இங்கே வரணும். இப்படி வேற யாராச்சும் வந்திருக்காங்களா ?

ஜெயராஜ் : என்ன இப்படி கேட்டுட்டே ? வெளிநாட்டில நல்லா வாழ்ந்திட்டிருந்த எத்தனையோ மிஷனரிகள் நம்ம ஊருக்கு வந்து, வெயில்லயும், குளிர்லயும் கஷ்டப்பட்டு இயேசுவைப் பற்றி சொன்னாங்க. அப்படி தான் நம்மோட முன்னோர்களெல்லாம் இயேசுவைப் பற்றி அறிஞ்சாங்க. இல்லேன்னா நீயும் நானும் கூட இயேசுவைப் பற்றி அறியாத ஒரு வாழ்க்கை தான் வாழ்ந்திட்டிருப்போம்.

லிவி : ஆச்சரியமா இருக்குப்பா… எப்படி அவ்வளவு கஷ்டத்தையும் தாங்கினாங்களோ

ஜெயராஜ் : இயேசு நம்ம கூட இருந்தா மட்டும் தான் நாம இதையெல்லாம் பண்ண முடியும். உனக்கு தெரியுமா ? நிறைய ஊழியர்கள் சின்ன வயசிலயே இறந்து போயிட்டாங்க. அவங்களால இங்க உள்ள எதிர்ப்பையும், காலநிலையையும் சமாளிக்க முடியல.

லிவி : ஓ… நம்ம ஊருக்கும் வந்திருக்காங்களாப்பா ?

ஜெயராஜ் : ஆமா ஆமா… என்ன இப்படி கேட்டுட்டே… ராக்லான்ட் மாதிரி நிறைய பேர் நம்ம ஊர்ப்பக்கம் வந்திருக்காங்க. அவங்க கல்லறை கூட நம்ம ஊர்ப்பக்கம் உண்டு.

லிவி : ஓ… நல்ல வேளை அவங்க எல்லாம் வந்தாங்கப்பா.. ஆமா, இன்னும் ரொம்ப தூரம் நடக்கணுமா ?

ஜெயராஜ் : ஆமாப்பா.. கஷ்டமா இருக்கா ? நாம போக வேண்டிய மலையோட பெயர் டெப்ரிகோல்..

லிவி : பேரே நல்லா இருக்குப்பா.. கத்ரிகோல்..

ஜெயராஜ் : (மகனை அணைத்துக் கொண்டு ) கத்ரிகோல் இல்லப்பா.. டெப்ரிகோல்.. கொஞ்சம் டேஞ்சரான இடம். மலேரியாவை பரப்பற கொசு நிறைய உண்டு. கவனமா இருக்கணும். அங்கே மருத்துவமனை ஒண்ணும் கிடையாது.

லிவி : சரிப்பா.

ஜெயராஜ் : சரி, கொஞ்சம் வேகமா போவோம்.. வாங்க…

 

 

காட்சி 3

( பணித்தள கிராமத்தில் ஜெயராஜும், லிவியும் )

ஜெயராஜ் : அன்பான டெப்ரிகோல் மக்களே, உங்களுக்கு ஒரு நற்செய்தியைச் சொல்லத் தான் நான் வந்திருக்கிறேன்.

கிராம தலைவர் : நில்லுங்க.. நில்லுங்க.. நீங்க யாரு ? எதுக்கு எங்க கிராமத்துக்கு வந்திருக்கீங்க ?

ஜெயராஜ் : நான் ஒரு ஊழியர். இயேசுவைப் பற்றி, அதாவது ஈசு மிசி பற்றி உங்களிடம் பேச வந்திருக்கிறேன்.

கி த : யாரு அவரு ? அவரைப் பற்றி ஏன் எங்க கிட்டே பேசணும் ?

ஜெயராஜ் : ஏன்னா, இயேசு உங்களை நேசிக்கிறார்.

கி.த : நாங்க யாருன்னே அவருக்கு தெரியாது ! அவரு யாருன்னும் எங்களுக்குத் தெரியாது. அவரு எங்களை நேசிக்கிறாரா ?

ஜெய : நம்முடைய பாவத்தை கழுவி, நம்மை மீட்டு பரலோகம் சேர்க்க வந்தவர் அவர். தன்னையே சிலுவையில் பலியாகத் தந்தவர். அன்பான தெய்வம் அவர்.

கி.த : ஓ.. தெய்வமா ? வெளிநாட்டு தெய்வமா ?

ஜெய : எல்லா நாட்டுக்கும் அவர் தான் தெய்வம். நமக்காக தன்னோட உயிரைக் கொடுக்கிற தெய்வம் வேற ஏதாவது உண்டா ?

கி.த : வெளிநாட்டு தெய்வத்தை விக்க தான் இங்க வந்திருக்கியா ?

ஜெய : ஐயா.. இயேசுவை யாரும் விக்க முடியாது. அவர் தான் நம்மை வாங்கியிருக்கிறார். தன்னுடைய விலைமதிப்பற்ற இரத்தத்தை சிந்தி வாங்கியிருக்கிறார்.

மக்கள் 1 : என்னய்யா சொல்றான் இவன் ? நமக்காக ஒருத்தர் இறந்திருக்காரா ?

மக் 2 : அதுவும் நமக்கு பரலோகம் கிடைக்கவா ? இவனை எப்படி நம்பறது ? வெளியூர் காரனா இருக்கானே

கி. த : ஐயா… வெளியூர்க்காரங்களை நாங்க உள்ளே அனுமதிக்கிறதில்லை. நீங்க வந்திருக்கீங்க. பரவாயில்லை. கொஞ்ச நாள் இருந்துட்டு போங்க.

ஜெயராஜ் : ஐயா… நாங்க வெகு தூரத்திலிருந்து உங்களைத் தேடி வந்திருக்கிறோம். இயேசுவைப் பற்றிப் பேசச்சொல்லி எங்களை இங்கே அனுப்பினவரே கடவுள் தான். அதனால கொஞ்சம் நான் சொல்றதை கேளுங்க.

கி. த : எனக்கு வேலை இருக்கு. ஊர்ல குழப்பம் உண்டாக்கினா நான் நடவடிக்கை எடுக்க வேண்டிவரும் சொல்லிட்டேன்

( அவர் போகிறார் )

ஜெயராஜ் : ஐயா.. நான் இந்த ஊர்ல தான் கொஞ்ச நாள் இருப்பேன். உங்களுக்காக நான் செபம் செய்வேன்.

மக் 1 : ( தங்களுக்குள் ) ஏம்பா.. இவனைப் பாத்தா படிச்சவன் மாதிரி இருக்கான். எப்படி நம்ம ஊருக்கு வந்திருக்கான் ? இவனுக்கு என்ன லாபம் ?

மக் 2 : ஒருவேளை நம்ம மலையில ஏதாச்சும் புதையல், கிதையல் கிடைக்குமோ ?

மக் 1 : அட போப்பா… நம்ம மலையில என்ன இருக்குன்னு நமக்கு தெரியாதா ?

மக் 2 : ஒருவேளை வேற ஏதாச்சும் வளங்களை தேடி வந்த வியாபாரியா இருப்பாரோ ?

மக் 1 : அதுக்கு ஏன்பா குடும்பத்தோட வராரு ? அதுவும் சின்ன பையன், கைக்குழந்தை ,, ஒண்ணும் புரியல.

மக் 2 : ஆமா எங்க தங்கியிருக்காரு

மக் 1 : அத ஏன் கேக்கறே.. நம்ம மாதிரி ஒரு குடிசை வீட்ல வசதி ஏதும் இல்லாம தான் தங்கியிருக்காரு

மக் 2 : என்னய்யா சொல்றே.. எல்லாம் ஒரே மர்மமா இருக்கே. ஏதோ பேரு சொன்னானே.. ஆங்.. இயேசு.. இயேசு.. ம்ம்ம்.. அவரைச் சொல்றதால இவனுக்கென்ன லாபம். ஒண்ணும் புரியல.

மக் 1 : சரி..வா.. நாம நம்ம வேலையைப் பாப்போம்.

( பின் குரல் : ஜெயராஜ் அந்த மலைப்பகுதியில் தங்கி வாழ்கிறார். மக்களுக்கு இயேசுவைப் பற்றியும் அவரது அன்பைப் பற்றியும் சொல்ல முயல்கிறார். நாட்கள் செல்கின்றன. ஒரு நாள் )

 

காட்சி 4

( ஜெயராஜ் தடுமாறியபடியே குடிசைக்குள் நுழைய, ரத்னா அதிர்ச்சியடைகிறாள் )

ரத்னா : என்னங்க ? என்னாச்சு ? ஏன் தடுமாறறீங்க ?

ஜெயராஜ் : ரத்த பேதி… உடம்புக்கு ரொம்ப முடியல..

ரத்னா : ஐயோ.. அதெப்படி உங்களுக்கு வந்துச்சு.

ஜெயராஜ் : நான் முன்னாடியே உங்களுக்கு எச்சரிக்கை தந்திருக்கணும். இங்க உள்ள தண்ணி சுகாதாரம் இல்லாதது. கொசுக்களெல்லாம் நோயைப் பரப்புது. அதான் இந்த நோய்க்கு காரணம்.

ரத்னா : ஐயோ.. மலேரியா நோயா ! இப்போ என்ன பண்றது

ஜெயராஜ் : பதட்டப்படாதே. ஆண்டவர் இருக்காரு. நீ கிராமத் தலைவரைக் கூட்டிட்டு வா.

( ரத்னா வெளியே ஓடுகிறாள். ஜெயராஜ் முடியாமல் உட்கார்கிறார் )

( கிராமத் தலைவரும், அவர் நண்பரும் வருகிறார்கள் )

கி.த : கையைப் பிடித்துப் பார்க்கிறார். அடடா.. பிலாய் ல வந்திருக்கு.

ஜெயராஜ் : பிலாய் யா ? மலேரியா இல்லையா ?

கி.த : மஞ்சக்காமாலையும், மலேரியாவும் சேர்ந்து வந்திருக்குப்பா. அதைத் தான் நாங்க பிலாய்ன்னு சொல்லுவோம்.

ஜெயராஜ் : ஓ.. அப்படியா… ம்ம்… ஏதாச்சும் மருந்து குடுத்து இதை சரி பண்ணுங்க. ரொம்ப முடியல. செய்ய வேண்டிய வேலை நிறைய இருக்கு.

கி.த : மருந்தா ? இதுக்கு மருந்தே கிடையாது. இது வந்தா, விதின்னு சொல்லி உயிரை விட்டுட வேண்டியது தான்.

ரத்னா : ஐயையோ என்ன சொல்றீங்க

கி.த : ஆமாம்மா.. இந்த நோயில இருந்து யாரும் பொழச்சதா சரித்திரமே இல்லை.

ரத்னா : ஐயா.. தலைவரே. எப்படியாச்சும் இவரை காப்பாத்துங்க. இங்க மலையில வந்து மாட்டிகிட்டோம். உங்களை கெஞ்சி கேட்டுக்கறேன். இந்த மலையை விட்டுக் கீழே போனா எப்படியும் அவரைக் காப்பாத்திடலாம்.

கி.த : கீழே போனா ஒருவேளை காப்பாத்தலாம், ஆனா இப்போ போக முடியாதே. பேய் மழையில்லையா பெஞ்சிட்டிருக்கு.

ரத்னா : ஐயா… நீங்க கிராமத் தலைவர்யா.. நீங்க நினைச்சா காப்பாத்தலாம். இந்தாங்க, என் தாலியை வெச்சுக்கோங்க. அவரை எப்படியாவது காப்பாத்துங்க.

கி.த : ம்ம்ம் பாக்கலாம்மா.. ஆனா மழை பெய்திட்டிருக்கும்போ கீழே போக முடியாது. வழி தெரியாது, மலைச்சரிவெல்லாம் வரும். இந்த மழையில வெளியே போறது தற்கொலைக்கு சமம். மழை நின்னதும் பாக்கலாம்.

ரத்னா : ஐயோ.. நான் என்ன பண்ணுவேன். கடவுளே… இந்த மழை வேற வந்து நம்மை தனிமையாக்கிடுச்சே.

ஜெயராஜ் : நீ அழாதேம்மா.. ஏன் பயப்படறே… நாம என்ன தனியாவா இருக்கோம். ஆண்டவர் நம்ம கூட இருக்காரு.

கி.த. : என்னப்பா.. உயிரைக் கொல்ற நோய் வந்திருக்கு ? உனக்கு பயமா இல்லையா ?

ஜெயராஜ் : ஐயா நான் சாகறதுக்குப் பயப்படல.. செத்தா அடுத்த நொடி நான் ஆண்டவரோட இருப்பேன். அங்கே வியாதியோ, வலியோ, கஷ்டமோ ஏதும் இல்லை. எல்லாம் வெள்ளை உடை உடுத்திய தேவதைகள் போல இருப்போம். இயேசுவும் அப்படித் தான் இருப்பாரு. அதுக்காகத் தானே என்னோட இயேசு இங்கே வந்து தன்னோட உயிரை சிலுவையில குடுத்து, மூணாவது நாள் உயிரோட எழும்பினாரு. அந்த உலகத்துல நாங்க எல்லாம் கடவுளை பாடி துதிச்சு சந்தோசமா இருப்போம். நீங்களும் அவரை ஏத்துக்குங்கய்யா…

கி.த : ( கோபமாய் ) சாகப்போற நேரத்துல கூட உனக்கு கடவுள் ஞாபகமா.. இனிமே ஒருவாட்டி அந்த கடவுளைப் பற்றி எங்கிட்டே சொன்னே, நடக்கிறதே வேற.

( வெளியேறுகிறார்கள் தலைவரும் நண்பரும் )

( அப்போது லிவிங்ஸ்டன் தடுமாறியபடி உள்ளே வருகிறான் )

ரத்னா : ஐயோ.. மகனே.. உனக்கென்ன ஆச்சு.. நீ ஏன் தடுமாறறே.

லிவி : அம்மா.. உடம்பெல்லாம் வலிக்குது.. ரத்த பேதியா இருக்கு

ரத்னா : ஐயோ.. உனக்குமா.. நான் என்ன செய்வேன். கடவுளே இதென்ன சோதனை

ஜெயராஜ் : ரத்னா.. ஏன் பதட்டப்படறே.. நம்மைப் பராமரிக்கிறவர் கடவுள் தான். சங்கீதம் 55:22 எடுத்து வாசி.

ரத்னா : ( அழுதபடியே பைபிளை எடுத்து ) கர்த்தர் மேல் உன் பாரத்தை வைத்துவிடு அவர் உன்னை ஆதரிப்பார். நீதிமானை ஒருபோதும் தள்ளாட ஒட்டார்.

ஜெயராஜ் : ம்ம்ம்.. இயேசப்பா மாதிரி ஒரு முன்மாதிரியைப் பாக்க முடியுமா ? கெத்சமெனே தோட்டத்துல மரணத்துக்கு முன்னாடி கலங்கித் தவிச்சு செபம் பண்ணும்போ என்ன சொன்னாரு ? “தந்தையே என் சித்தமல்ல உம் சித்தமே ஆகட்டும்” ந்னு சொன்னாருல்லயா… நாமளும்.. கடவுளோட சித்தத்துக்கு நம்மை ஒப்புக் கொடுக்கணும்

ரத்னா : என்னங்க.. என்னென்னவோ சொல்றீங்களே…

லிவி : அப்பா.. தூக்கம் தூக்கமா வருது.. தூங்க போறேன்..

ஜெயராஜ் : ஆமா.. என்னாலயும் முடியல. குடும்ப ஜெபத்தை இப்பவே வெச்சுப்போம். நாளைக்கு பாத்துக்கலாம் மற்ற விஷயங்களை.

“அப்பா பிதாவே. இந்த கிராம மக்கள் உம்மை அறியணும். இவர்கள் உமது இரட்சிப்பைப் பெறணும். இந்த கிராமத்தையும், எங்களையும் உம்முடைய கரத்தில் ஒப்புக்கொடுக்கிறோம். இயேசுவின் மூலம் செபம் கேளும் எங்கள் பரம பிதாவே.. ஆமேன் ).

காட்சி 5

( தலைவரும் நண்பரும் அவரவர் வீட்டை நோக்கிப் போகின்றனர் )

நண்பர் : தலைவரே… அந்த மனுஷனோட முகத்தைப் பாத்தீங்களா

கி.த : முகத்துல என்ன ?

நண்பர் : என்ன ஒரு அமைதி, நிம்மதி, புன்னகை ! சாகிறதைப் பற்றி பயமே இல்லாம ஒருத்தனால எப்படி இருக்க முடியும் ?

கி.த : என்ன சொல்ல வரே ?

நண்பர் : செத்தப்புறம் சந்தோசமா இருப்போங்கற உறுதி இருந்தா தான் தலைவரே.. சந்தோசமா சாக முடியும். இவன் ரொம்ப வித்தியாசமா இருக்கான் தலைவரே.

கி.த : என்ன சொல்ல வரே.. தெளிவா சொல்லு ..

நண்பர் : ஒருவேளை இவர் தன்னோட கடவுளைப் பற்றி சொன்னது உண்மையா இருக்குமோ ?

கி. த : சும்மா சும்மா என்னை நீயும் குழப்பாதே.

நண்பர் : நான் குழப்பல தலைவரே… நானே குழம்பிப் போய் இருக்கேன்.

கி.த : போய் படுத்து தூங்கு நாளைக்கு எல்லாம் சரியாயிடும்.

காட்சி 6

( நள்ளிரவு, ஜெயராஜின் குடிசை )

ரத்னா : என்னங்க.. என்னங்க..

ஜெயராஜ் : ம்ம்… என்னம்மா

ரத்னா : லிவி… பதிலே சொல்லாம கிடக்கான்.. எனக்கு பயமா இருக்கு.

ஜெயராஜ் : ஐயோ.. அப்படியா… எங்கே அவன்.. தடுமாறித் தடுமாறி அவன் அருகில் போகிறார்.

ஜெயராஜ் : லிவி.. லிவி… பேச முடியாமல் தடுமாறி விழுகிறார். ( இறந்து விடுகிறார் )

ரத்னா : ஐயோ.. என்னங்க.. என்னங்க.. ( இருவரையும் மாறிமாறிப் புரட்டுகிறாள் )

ரத்னா : ஐயோ கடவுளே.. ஒரே நாளில இரண்டு பேரையும் இழந்துட்டேனே. ஐயோ.. கடவுளே நான் என்ன செய்வேன். கடவுளே.. ஆனாலும் உம்மை மறுதலிக்க மாட்டேன். எனக்கு பெலன் கொடுங்க இயேசுவே.. எனக்கு பெலன் கொடுங்க.இந்த மக்கள் முன்னாடி நான் விசுவாசத்தைக் காத்துக் கொள்ளணுமே.. இயேசப்பா…

(ரத்னா பாடுகிறாள்.. அழுதபடியே.. )

பாடல் :

அனாதை ஆவதில்லை அன்பர் இயேசுவின் திருமகள் நான் குடும்பமே அழிந்தாலும் குறை உம்மைச் சொல்வதில்லை கொடுத்தவரே எல்லாம் எடுத்தார் அவர் நாமத்தைத் தொழுதிடுவேன்.

( பாடல் சத்தம் கேட்டு ஊர் மக்கள் வருகின்றனர். )

நண்பன் : ஐயோ.. ரெண்டு பேரும் இறந்து போயிருக்காங்க. இந்த நோய் வந்தா பொழைக்கிறது கஷ்டம். ஆனா.. அந்த அம்மாவால எப்படி இந்த நேரத்துல ஒப்பாரி வெக்காம, கடவுள் கிட்டே பாட்டு பாட முடியுது !

நபர் 2 : எனக்கும் அது தான் ஆச்சரியமா இருக்கு. அவங்க தனியா இருக்கிற மாதிரியே இல்லை. யாரோ, அவங்க கூட இருக்கிற மாதிரியே இருக்கு. நம்பவே முடியல

நண்பர் : ஆமா.. என்னாலயும் நம்ப முடியல. தலைவர் கிட்டே கூட அதைத் தான் சொன்னேன்.

கி.த : அம்மா.. நடந்தது நடந்து போச்சு. இப்போ உங்களுக்கு என்ன உதவி வேணும்ன்னாலும் சொல்லுங்க, பாவம் நீங்க தனியா இருக்கீங்க

ரத்னா : ஐயா.. நான் தனியா இல்லை. கடவுள் என்கூட இருக்காரு. அவரு தான் எனக்கு பெலன் தராரு. நீங்களும் கடவுளை ஏத்துக்கணும்ன்னு தான் நாங்க இங்க வந்தோம். ஒரே ஒரு உதவி மட்டும் செய்யுங்க

தலைவர் : சொல்லுங்கம்மா

ரத்னா : மலைக்குக் கீழே பர்ஹர்லாவுக்கு ஆளனுப்பி விஷயத்தை சொல்லிட்டீங்கன்னா, அடக்கம் பண்ண உதவியா இருக்கும்.

தலைவர் : இந்த நேரத்துல பர்ஹர்லாவுக்கு ஆளனுப்பி, அவங்க வந்து, அப்புறம் உடலையெல்லாம் கீழே தூக்கிட்டு போய்….

நண்பர் : தலைவரே… நான் ஒண்ணு சொல்லவா ?

தலைவர் : சொல்லுப்பா…

நண்பர் : மழை தான் நின்னுடுச்சே. நாமளே இவங்களை தூக்கிட்டு கீழே போய் அடக்கம் பண்ண உதவி பண்ணலாமே.

தலைவர் : நாமளா..

நண்பர் : ஆமா தலைவரே.. நம்ம ஊருக்கு வந்தவங்க இல்லையா ?

தலைவர் : சரி சரி.. ஆட்களை தயார் பண்ணு. நீ சொன்னது மாதிரி, நாமளே இவங்களை தூக்கி கீழே கொண்டு போய் அடக்கம் பண்ணிட்டு வரலாம்.

ரத்னா : ( அழுது கொண்டிருக்கிறாள் )

காட்சி 7

( அடக்க ஆராதனை முடிந்து தலைவரும் நண்பரும் மலையில் ஏறிச் செல்கின்றனர் )

தலைவர் : அவர்களோட அடக்க ஆராதனையே ரொம்ப வித்தியாசமா இருக்குல்ல.. எங்கயோ வழியனுப்பி வைக்கிற மாதிரி பண்றாங்க.

நண்பர் : அந்த போதகர் சொன்னதெல்லாம் என் காதுல எதிரொலிச்சிட்டே இருக்கு. ” நீங்கள் இயேசுவை அறிய வேண்டும் என்பதற்காக, தமிழ்நாட்டிலிருந்து வந்த இந்த குடும்பத்தில் நடந்த துயரம் மனதுக்கு ரொம்பவே கஷ்டமாக இருக்கிறது. இறைவார்த்தை விதைக்கப்பட்டால் நிச்சயம் பயன் தரும். அது வெறுமனே திரும்பாது என பைபிள் சொல்கிறது. இந்த பணியாளர்கள் இங்கே கோதுமை மணி போல விதைக்கப்பட்டிருக்கிறார்கள்.” ந்னு சொன்னாரு கவனிச்சீங்களா

தலைவர் : ஆமா.. கவனிச்சேன். கஷ்டப்படறதை கூட இஷ்டப்பட்டு செய்ற இவங்களோட நடவடிக்கை ஆச்சரியமா இருக்கு.

நண்பர் : ( பரபரப்பாய் ) தலைவரே. தலைவரே அங்கே பாருங்க.

தலைவர் : அட.. ஆமா.. அது யாரு..வெள்ளை உடை உடுத்திட்டு ஒருத்தர் நம்மையே பாத்திட்டிருக்காரு

நண்பர் : இப்படி ஒருத்தரை நாம பாத்ததே இல்லையே.. பே..பேயா ?

தலைவர் : பேய் இல்லை, அவரோட முகம் கூட ரொம்ப ஜொலிக்குதே…

நண்பர் : தலைவரே.. ஞாபகம் இருக்கா ?

தலைவர் : என்னடா ஞாபகம் இருக்கான்னு.. பயமா இருக்கு.. சீக்கிரம் சொல்லு

நண்பர் : அந்த ஊழியக்காரரு சாகிறதுக்கு முன்னாடி வெள்ளை உடை உடுத்தின இயேசு பற்றி சொன்னாருல்ல.. ஈசு மிசி யைப் பற்றி. இது .. இது அவர் தான் தலைவரே..

தலைவர் : என்னடா சொல்றே.

நண்பர் : ஆமா தலைவரே.. நாம வெறுத்தாலும் அவர் நம்மை தேடி வந்துட்டே இருக்காரு.

தலைவர் : ஐயையோ.. ஊழியக்காரரு நம்ம கிட்ட இயேசு பற்றி சொன்னப்பவே கேட்டிருக்கணும். இப்போ நமக்கு அவரைப் பற்றி யாரு சொல்லித் தருவாங்க…

நண்பர் : தலைவரே.. அதோ அவரு மறைஞ்சு போறாரு..

( இருவரும் அந்த திசையையே உற்றுப் பார்க்கின்றனர் )

பின் குரல் : சில நாட்களுக்குப் பின்

காட்சி 8

( மிஷனரி ஜான் அந்தப் பகுதிக்கு வருகிறார் )

கி.த : யாருப்பா அது.. ஊருக்குள்ள புதுசா

ஜான் : ஐயா.. என் பேரு ஜான். இங்கே முன்னாடி ஒருத்தர் ஜெயராஜுன்னு குடும்பத்தோட வந்திருந்தாரே.

கி.த : ஆமாப்பா.. பாவம்…. அவரும் அவரோட பையனும் நோயில இறந்து போயிட்டாங்க. அவங்க மனைவியும் கைக்குழந்தையும் ஊரை விட்டுப் போயிட்டாங்க. என்ன பண்றாங்களோ. அவங்கள தேடி வந்தீங்களா ?

ஜான் : இல்லீங்கய்யா.. அவரு இங்கே இயேசுவைப் பற்றி அறிவிக்க வந்தாருல்லயா, அதே இயேசுவைப் பற்றி அறிவிக்க தான் நான் வந்திருக்கிறேன்.

கி.த : ஐயா.. என்ன சொல்றீங்க… இப்ப தான் ரெண்டு உயிரு போயிருக்கு. அதுக்குள்ள தைரியமா வந்திருக்கீங்களே.

ஜான் : “யாரை நான் அனுப்புவேன், யார் என் காரியமாய்ப் போவான்” ந்னு கடவுள் கேட்டார். “இதோ நான் இருக்கிறேன்” ந்னு சொன்னேன். என்னை அவர் அழைத்து இங்கே வரச் சொன்னார். வந்துட்டேன். நீங்க வெறுத்தாலும் இயேசு உங்களை நேசிக்கிறார்.

கி.த : அது உண்மை தாங்கய்யா…

ஜான் : என்ன சொல்றீங்க..

கி. த : ஆமாங்கய்யா… நாங்க இயேசுவைக் கண்டோம்.

ஜான் : இயேசுவைக் கண்டீங்களா ! ஆச்சரியமா இருக்கே.

கி. த : ஆமாங்கய்யா.. அந்த மலையில வெள்ளை உடையில அவர் உலா வரதை நாங்க கண்டோம். அது மட்டுமல்ல, அந்த ஊழியக்காரரும், அவரோட மகனும், மனைவியும் வாழ்ந்த வாழ்க்கை ரொம்பவே ஆச்சரியமான வாழ்க்கைங்க. அப்படிப்பட்ட கடவுளும், அப்படிப்பட்ட வாழ்க்கையும் எங்களுக்கு வேணுங்க.

ஜான் : இயேசுவே உமக்கே நன்றி. அற்புதம் செய்கிறீரே அற்புதரே, உமக்கே நன்றி

கி. த : ஐயா, நாங்க எல்லாருமே இயேசுவை ஏத்துக்கிறோம். எங்களுக்கு அவரைப் பற்றி சொல்லுங்கய்யா.

ஜான் : இயேசுவே உமக்கே நன்றி. முதல்ல நாம எல்லாம் அவருக்கு நன்றி சொல்லி ஒரு பாட்டு பாடுவோம். நீங்க இரட்சகரைக் கண்டிருக்கீங்க. எனக்கு ரொம்ப சந்தோசமா இருக்கு. வாங்க பாடுவோம், அப்புறம் உங்களுக்கு இயேசுவைப் பற்றி எல்லாமே சொல்றேன்.

“இரட்சகரைக் கண்டேன் “

*

பின் குரல் :

( ஊழியர் ஜெயராஜ் பற்றிய குறிப்பும், நண்பர் சுவிசேஷ ஜெபக்குழு பற்றியும் )

Advertisements
Posted in Articles, Christianity, Sunday School

SKIT : புனித‌ பிபியானா / இரத்தசாட்சி பிபியானா

பின்வாங்காத பிபியானா

Image result for roman governor

காட்சி 1

( மன்னன் ஜூலியனின் அவை. மன்னனும், கவர்னர் அப்ரோனியஸும், சில உயரதிகாரர்களும் இருக்கின்றனர் )

ஜூலியன் : மிக முக்கியமான சில கட்டளைகளைக் கொடுப்பதற்காகவும், ஆலோசனைகள் பெறுவதற்காகவும் தான் நான் உங்களை இங்கே அழைத்திருக்கிறேன். நான் மன்னனாய் பொறுப்பேற்றதும் இதைத் தான் செய்யவேண்டும் என நீண்ட காலமாக நினைத்துக் கொண்டிருந்தேன்.

அப்ரோனியஸ் : சொல்லுங்கள் அரசே.

ஜூ : இந்த அறையில் பேசும் விஷயங்கள் ரகசியமாகவே இருக்கட்டும். நமது நாடு கலாச்சாரத்தை விட்டும், பண்பாட்டை விட்டும் விலகி விட்டது. நமது ரோம சாம்ராஜ்யத்தின் இயல்புகளை நாம் மீண்டெடுக்க வேண்டும்.

அப் : எதை வைத்து அப்படிச் சொல்கிறீர்கள் அரசே ?

ஜூ : எனக்கு முன் இருந்த கான்ஸ்டன்டைன் மன்னன் தான் அனைத்திற்கும் காரணம். கிறிஸ்தவம் என்றொரு மதத்தை அங்கீகரித்தவன் அவன் தான். இல்லையென்றால் இன்றைக்கு நமக்கு இந்த நிலை வந்திருக்காது.

அப் : உண்மை தான் அரசே. எங்கிருந்தோ வந்தவன் நம்மை அழிப்பதா ? எனக்குள்ளும் அந்த வெறி கொழுந்து விட்டெரிகிறது.

ஜூ : நமது தெய்வங்களை அழித்து விட்டு, புதிய தெய்வங்களைக் கொண்டு வந்திருக்கிறான். நமது தெய்வச் சிலைகளை புழுதி படிய ஒதுக்கி விட்டு புதிய மறைகளைக் கொண்டு வந்திருக்கிறான். நமது கடவுளரை ஏளனப்படுத்தும் படி, ஏசு எனும் கடவுளை ஏணியில் வைக்கிறான்.

அப் : அது மட்டுமா அரசே, கிறிஸ்தவர்களை உயர்பதவியில் வைத்தார். கிறிஸ்தவத்தை யார் வேண்டுமானாலும் பின்பற்றலாம், யார் வேண்டுமானாலும் பரப்பலாம் என சட்டமே போட்டார். அதனால் தான் அடங்கிக் கிடந்த இந்த கிறிஸ்தவம் ஆல்போல தழைக்க ஆரம்பித்து விட்டது.

ஜூ : இனிமேல் அது நடக்காது. நடக்கக் கூடாது. கடந்த 48 ஆண்டுகள் கிறிஸ்தவம் அரச மதமாகவும், அங்கீகரிக்கப்பட்ட மதமாகவும் இருந்து வளர்ந்து விட்டது. இனி நமது பணி, அதை வேரோடு பிடுங்குவதாகத் தான் இருக்க வேண்டும். தேடித் தேடி வேட்டையாடுவதாய் இருக்க வேண்டும்.

அப் : அதற்கு என்ன செய்யலாம் அரசே !

ஜூ : முதலில் ரோம தெய்வங்களுக்கும், தேவதைகளுக்கும் கோயில்களைக் கட்டுங்கள். விழாக்களை எடுங்கள். மக்களுடைய கவனத்தை திசை திருப்புங்கள். சிலை வழிபாட்டை மீண்டும் கொண்டு வாருங்கள். மக்கள் பார்க்கும் இடமெல்லாம் ரோம தேவதைகள் தெரியும் படி செய்யுங்கள். மாறாதவனை அழியுங்கள்.

அப் : நல்ல யோசனை அரசே.. நீங்கள் அனுமதித்தால் ஒன்று சொல்லலாமா ?

ஜூ : சொல்லுங்கள்.

அப் : நமது அரசாங்கத்திலேயே உயரதிகாரிகளாக, கிறிஸ்தவர்களாக இருப்பவர்களை முதலில் நாடுகடத்த வேண்டும். அவர்களுடைய குடும்பங்களை மீண்டும் மதம் மாற்றம் செய்ய வேண்டும். அப்போது தான் நமது திட்டங்களை எளிதில் செயல்படுத்த முடியும்.

ஜூ : நல்ல யோசனை. அப்படி தீவிரமான கிறிஸ்தவ அதிகாரிகள் அரச அதிகாரிகளாக இருக்கிறார்களா என்ன ?

அப் : ஏன் இல்லை, பிளேவியனையே எடுத்துக் கொள்ளுங்கள். நீண்ட நெடிய காலமாக உயர்ந்த பதவியில் இருக்கிறார். ஆழமான கிறிஸ்தவர். நிச்சயம் நமக்கு தடையாக இருப்பார். முதலில் அவரை நாடுகடத்தலாம்.

ஜூ : அவரது குடும்பம் ?

அப் : அவருக்கு மகன்கள் இல்லை. மனைவியும் இரண்டு பெண் பிள்ளைகளும் நான். அப்பாவை விரட்டி விட்டால் பிள்ளைகளெல்லாம் தானாகவே வழிக்கு வந்து விடுவார்கள். பெண்கள் தானே, ஒரு சின்ன மிரட்டலுக்கே பணிந்து விடுவார்கள். பிரச்சினை இல்லை.

ஜூ : சரி.. அப்படியே செய். இதை நான் அரசாங்க ஆணையாக அறிவிக்கப் போவதில்லை. ஆனால் நீங்கள் செய்யும் எல்லாவற்றிலும் என்னுடைய அனுமதியும், ஊக்கமும் உண்டு என்பதை நினைவில் கொள்ளுங்கள்.
அப் : அப்படியே ஆகட்டும் அரசே.
ஜூ : சரி, சபை கலையலாம்.

காட்சி 2

( தந்தை பிளேவியன், தாய் டஃப்ரோசா, பிள்ளைகள் பிபியானா, டெமிட்ரியா )

Image result for saint bibiana's father

பிபியானா : அப்பா… என்னப்பா உங்களை எங்கெல்லாம் தேடறது ?இன்ன்க்கு ஏன் இங்கே வந்து உக்காந்திருக்கீங்க, வாங்க தோட்டத்துல பொய் விளையாடலாம்.

பிளேவியன் : ம்ம்ம். போலாம், கொஞ்சம் உக்காரு. ஆமா தங்கச்சி எங்கே ?

பிபியானா : அவ தோட்டத்துல தான் இருக்கா. உங்களுக்காகத் தான் காத்திட்டிருக்கோம்.

பிளேவியன் : ம்ம்ம்.. போலாம்..

பிபியானா : அப்பா.. ஏன் ரொம்ப டல்லா இருக்கீங்க. பொதுவா நீங்க எங்க கூட ஜாலியா விளையாடுவீங்களே.. என்னாச்சு ?

( அப்போது தங்கையும் அங்கே வருகிறார் )

பிளேவியன் : நம்ம கிறிஸ்தவ விசுவாசத்தை சோதிச்சுப் பாக்கற தருணம் வந்துடுச்சுன்னு நினைக்கிறேன்.

பிபியானா : (சீரியசான முகத்துடன் ) என்னாச்சுப்பா ?

டஃப்ரோசா : புதுசா வந்திருக்கிற மன்னர் பழைய மன்னரைப் போல இல்லை. கிறிஸ்தவர்களை அழிக்கணும்ன்னு முடிவு கட்டி வந்திருக்காரு போல. அதான் அப்பாவுக்கு கவலை.

பிளேவியன் : கவலையில்லை… கடவுளோட சித்தம் இல்லாம எதுவும் நடக்காது. ஆனாலும் நம்ம அழகான குடும்பத்துக்கு இப்படி ஒரு சோதனை வந்திடுச்சே.. இதை தாங்கற சக்தியைக் நமக்கு கடவுள் தரணுமேன்னு தான் பிரார்த்திக்கிறேன்.

டஃப்ரோசா : என்ன சொல்றீங்க ? புரியல

பிளேவியன் : என்னை நாடுகடத்தப் போறாங்கன்னு கேள்விப்பட்டேன்…

டஃப்ரோசா : ( அதிர்ச்சியுடன் ) என்னது ? நாடுகடத்தவா ? அப்படின்னா நாம குடும்பத்தோட போலாங்க…

பிளேவியன் : இல்லை, நாடுகடத்தறதுன்னா அகதி மாதிரி அனுப்பிடுவாங்க. அங்கே நாம சாதாரண வாழ்க்கை வாழ முடியாது. நாடுகடத்தப்பட்டவர்களுக்கு எங்கேயும் அங்கீகாரம் கிடைக்காது. உதவியும் கிடைக்காது… நீயும் பிள்ளைகளும் இறைவனில் நிலைச்சு இருக்கணும். இங்கேயே இருக்கணும்.

டஃப் : பயமா இருக்குங்க…

பிளேவியன் : ஏன் பயம் ? நம்மை இந்த நாட்டை விட்டுத் துரத்தலாம். ஆனா பரலோக வீட்டை விட்டு யாரும் துரத்தவே முடியாது.

டஃப் : பயம் அதுக்காக இல்லை, விசுவாசத்தை கைவிடாத உறுதி வேணுமேன்னு தான் பயப்படறேன்.

பிளேவியன் : நம்மை விலைகொடுத்து வாங்கிய இயேசுவுக்காக எந்த விலையையும் கொடுக்க தயாரா இருக்கணும்.

( கதவு தட்டப்படும் ஓசை )

டொக்..டொக்..டொக்

பிளேவியன் கதவைத் திறக்கிறார். வெளியே வீரர்கள்.

பிளேவியன் : வா..வாங்க…

வீரர்கள் : நாங்க அரச அதிகாரிகள் ந்னு உங்களுக்கே தெரியும். நீங்களும் உயர் அதிகாரின்னு எங்களுக்கு தெரியும். ஒரு நிமிச வேலை தான்.. போயிடறோம்.

பிளேவியன் : சொல்லுங்க

வீரர்கள் : ஒரே ஒரு வாக்கியம் மட்டும் சொல்லுங்க, நாங்க போயிடறோம். நீங்க வழக்கம் போல வாழ்க்கையை நடத்தலாம்.

பிளேவியன் : என்ன சொல்லணும் ? சொல்லுங்க

வீரர்கள் : இயேசு உண்மையான கடவுள் இல்லை, ரோம தெய்வங்களே உண்மையான தெய்வங்கள். அவ்ளோ தான். நீங்க இயேசுவை மறுதலிச்சதும் நாங்க போயிட்டே இருப்போம்.

பிளேவியன் : அது மட்டும் முடியாது

வீரர்கள் : ஐயா… மன்னரைப் பற்றி உங்களுக்கே தெரியும். அவரு சும்மா விடமாட்டாரு..

பிளேவியன் : அவரை விடப் பெரிய பரலோக மன்னரைப் பற்றியே எனக்குத் தெரியும். மண்ணக மன்னருக்காக விண்ணக மன்னரை மறுதலிக்க நான் என்ன முட்டாளா ?

வீரர்கள் : ஏன் இந்த வீண் பிடிவாதம்…உங்களை நாடுகடத்துவோம்.. குடும்பமே அழியும்.

பிளேவியன் : என்னை நாடுகடத்தலாம்.. ஆனா இறைவன் மீது நான் வெச்சிருக்கிற விசுவாசத்தைக் கடத்த முடியாது.

வீரர்கள் : உங்க குடும்பத்தை நினைச்சுப் பாருங்க… கொஞ்ச நாளைக்காச்சும் இயேசுவை மறுதலிச்சு உயிர்வாழலாமே ?

பிளேவியன் : இயேசுவை தூஷித்து வாழ்வதை விட, இயேசுவை பூஜித்து சாவேன். நீங்க அரச கட்டளை எதுவோ அதைச் செய்யுங்க.

வீரர்கள் ( மனைவியிடம், கொஞ்சம் எரிச்சலாக ) : அம்மா.. நீங்களாச்சும் கொஞ்சம் அட்வைஸ் பண்ணுங்க. அழகான இந்த குடும்பம் அலங்கோலமாகணுமா ?

மனைவி : இந்த வீடு அலங்கோலமானாலும் பரவாயில்லை, அலங்காரமான மோட்ச வீடு தான் எங்க இலட்சியம்.

வீரர்கள் ( கோபத்தில் ) : இந்த நாயை கட்டி இழுத்து வாங்க..சொன்னா கேக்க மாட்டேங்கறான்… இவனை நாடுகடத்துங்க. திமிரா பேசின அவரோட மனைவியை இழுத்து சிறையில அடைங்க… நாய்ங்க.. சாகட்டும். நேற்று வந்த இயேசு இவங்களுக்கு பெருசு..அப்படின்னா… ஆயிரம் காலமா நாம வணங்கற தெய்வங்கள் நமக்குப் பெரிசில்லையா.

வீரர்கள் : நாம யாருன்னு ஊருக்கே காட்டுவோம்.

பிளேவியன் : சகோதரர்களே… இயேசுவை ஏற்றுக் கொள்ளுங்கள். அவர் தான் உலக மீட்பர். அவர் இல்லாம இரட்சிப்பு இல்லை.

( பேசிக்கொண்டிருக்கும்போதே வீரர்கள் அவரை அடித்து மனைவியையும் இழுத்துக் கொண்டு செல்கின்றனர் )

காட்சி 3

( சகோதரிகள் பிபியானாவும், டெமிட்ரியாவும் பேசிக்கொண்டிருக்கின்றனர் )

Image result for saint bibiana parents

டெமிட் : அக்கா.. சாப்பிட்டு ரொம்ப நாளாச்சு. யாருமே எதுவும் தரமாட்டேங்கறாங்க. நமக்கு இருந்த சொத்தையெல்லாம் புடுங்கிட்டாங்க.

பிபியானா : கவலைப்படாதே தங்கச்சி. கடவுளுக்காக இதையெல்லாம் நாம தாங்கிக்கணும். இந்த காலத்தை உபவாச காலமா நெனச்சு நாம செபம் செய்வோம். அப்போ கடவுளோட அருள் நிறையவே நமக்கு கிடைக்கும். எல்லாத்தையும் தாங்கற பெலன் கிடைக்கும்.

டெமிட் : சரிக்கா… அப்பா பாவம் என்ன ஆனாரோ. எப்படி இருக்காரோ.

பிபியானா : கவலைப்படாதே.. அப்பா ஏதோ ஒரு இடத்துல வாழ்ந்திட்டு தான் இருப்பாரு. ஒருவேளை இந்த உலகத்துல, இல்லேன்னா சொர்க்க வீட்ல. அதனால பயம் இல்லை.

டெமிட் : சரிக்கா… அம்மா எப்படி இருக்காங்களோ !

பிபியானா : தெரியல.. ஜெயில்ல போட்டாங்க. அங்கே என்ன கொடுமைப்படுத்தறாங்களோ தெரியல. ஆனா, அதையெல்லாம் தாங்கற பெலனை இயேசு குடுப்பாரு.

( அப்போது வீரர்கள் இருவர் வந்து அவர்களை இழுத்துக் கொண்டு கவர்னரிடம் போகின்றனர். கவர்னர் இருக்கையில் ஏளனமாக அமர்ந்திருக்கிறான் )

அப்ரோனியன்ஸ் : வாங்க பிள்ளைகளே.. பட்டினி நல்லா இருந்துச்சா.. நல்லா பசியை சாப்டீங்களா ? ( சிரிக்கிறான் )

( மௌனமாக இருக்கின்றனர் )

அப் : எதுக்கு இந்த வீண் பிடிவாதம் ! உங்க அப்பாக்கு என்ன ஆச்சு தெரியுமா ? நாடு கடத்தப்பட்ட இடத்துல அலஞ்சு திரிஞ்சு செத்துப் போயிட்டாரும்மா ( நக்கலாக சிரிக்கிறார் )

பிபியானா : (கண்ணீரைத் துடைத்துக் கொண்டே ) இறைவனுக்கே நன்றி, அப்பாவை முதலில் வான் வீட்டில கூட்டிட்டுப் போயிட்டாரே.

அப் : ( கோபத்தில் ) உன் அம்மாவுக்கு என்னாச்சு தெரியுமா ? ஜெயில்ல பட்டினி போட்டோம். இருந்தாலும் வழிக்கு வரல. கொடுமைப்படுத்திப் பாத்தோம் மசியல. கடைசியில என்ன பண்ணினோம்ன்னு தெரியணுமா ? ( ஹா..ஹா..ஹா ) தலையை ஒரே வெட்டு.. உடம்பு ரெண்டு துண்டு …

( பிபியானாவும், டெமிட்ரியாவும் கைகளை இறுகப் பிடித்துக் கொள்கின்றனர். கண்களில் மிரட்சி )

அப் : அப்பாவும் போயாச்சு, அம்மாவும் போயாச்சு. நீங்களாச்சும் கடவுளை மறுதலிச்சா, சாப்பாடு கிடைக்கும். இல்லேன்னா அவங்க போன வழி தான் உங்களுக்கு.

( இருவரும் அமைதியாக நிற்கின்றனர் )

அப் : ( டெமிட்ரியாவிடம் ) ஏம்பா சின்னப் பொண்ணே.. உனக்கு பயமா இல்லையா ? இயேசுவை மறுதலிச்சு வாழவேண்டியது தானே.

டெமிட் : ( இல்லை என தலையாட்டுகிறாள் )

அப் : சரி.. அவ்ளோ எல்லாம் வேண்டாம். நீ சின்னப் பிள்ளையா இருக்கே. அதோ அந்தப் பீடத்துல எங்க ரோம தெய்வத்தோட சிலை இருக்கு. கொஞ்சம் சாம்பிராணி எடுத்து அதுக்கு முன்னாடி போடு போதும்.. உன்னை விட்டுடறேன்.

பிபியானா : ம்ம்.. இன்னொரு கடவுளுக்கு வணக்கம் செலுத்துவது, என்னுடைய கடவுளை அவமதிப்பது போல. எனக்கு ஒரே ஒரு தந்தை. ஒரே ஒரு விண்ணகத் தந்தை. அவருக்கான மாட்சியையும், கனத்தையும் அவருக்கு மட்டுமே கொடுப்பேன்.

அப் : ( உரத்த குரலில் .. ) பிபியானா.. வாயை மூடு.. அவளைப் பேசவிடு.

டெமிட் : நான் ரட்சகரை அவமதிக்க மாட்டேன் ( சொல்லிக் கொண்டே மூர்ச்சையாகி கீழேவிழுகிறாள் )

பிபியானா : (அழுகையுடன் ) தங்கச்சி… டெமிட்ரியா.. எழும்பு.. எழும்பு.. அக்கா உன்னைப் பாத்துக்கறேன்.. கடவுள் இருக்காரு நமக்கு.

அப் : கடவுளா .. ஹா…ஹா உன் தங்கச்சி செத்துட்டா.. அவ்ளோ தான். வீட்ல மூணு பேரு காலி. இனியுமா உனக்கு இயேசு..கடவுள்.. அது..இதுன்னு… கடவுளோட சக்தி அவ்ளோ தானா…

பிபியானா : ஐயா.. மனிதனுக்குக் கீழ்ப்படிவதை விட தேவனுக்குக் கீழ்படிவதே சிறந்ததுன்னு இறை வார்த்தை சொல்லுது. உயிரைக் கொல்பவர்களுக்கு அஞ்சவேண்டாம், ஆன்மாவைக் கொல்பவர்களுக்கே அஞ்சுங்கள்ன்னு என்னோட இயேசுவே சொன்னாரு. நான் அவரைப் பற்றிக் கொண்டவள்.. விட்டு விடப் போவதில்லை.

அப் : ( கோபத்தின் உச்சத்தில் எழுத்து கத்துகிறான் ) முடிவாக என்ன சொல்கிறாய்… பாடுபடப் போகிறாயா ? பாடுகளிடமிருந்து விடுபடப் போகிறாயா ?

பிபியானா : ஐயா.. இயேசு படாத பாடுகளா ? அவரை விட்டு விட எனக்கு உத்தேசமில்லை. எதுவேண்டுமானாலும் செய்யுங்கள்.

அப் : (யாரங்கே ) இவளைக் கொண்டு போய்… சித்திரவதைக்காரி ரூஃபினாவிடம் ஒப்படையுங்கள். அங்கே இவள் படுகின்ற அவஸ்தையில் மனம் மாற வேண்டும், மதம் மாற வேண்டும். அப்படியும் மாறவில்லையேல், தூணில் கட்டி வைத்து கொடிய சாட்டைகளால் அடியுங்கள். உடல் கிழிந்து தொங்கும்போது கிழிந்த இடத்திலேயே அடியுங்கள். இயேசு அனுபவித்ததை விட கொடிய சாவு இவளுக்கு வரவேண்டும். அடிபட்டே அவள் சாகவேண்டும். இழுத்துக் கொண்டு போங்கள் இவளை.

பிபியானா : அரசே.. இறைவனின் சித்தம் எதுவோ அதுவே நடக்கும். நீரும் இயேசுவை ஏற்றுக் கொள்ளும். அதுதான் விண்ணக வாழ்க்கையை உமக்கு வழங்கும்.

அப் : ( கோபத்தில் கத்துகிறார் )ஆஆஅஹ்ஹ்.. இவளை இழுத்துக் கொண்டு போங்கள்.

 

காட்சி 4

( கவர்னர் அப்ரோனியன்ஸ் முன்னால் ஒருவன் வந்து நிற்கிறான் )

 

Image result for saint bibiana family

அப் : கொஞ்ச நாளுக்கு முன்னாடி ஒரு பொண்ணை ரூஃப்பினா கிட்டே விட்டோமே .. அவ என்ன ஆனா ?

நபர் : ஐயா.. அவள் பிபியானா.. ரூஃபினா எவ்வளவோ முயற்சி செய்தும் அவளை மனம் மாற்ற முடியல.

அப் : ஆச்சரியமா இருக்கே… ரூஃபியானா எப்பவுமே தோற்றதில்லையே.

நபர் : ஆமா.. அவளை பாவத்துல விழவைக்கவும், இச்சையில சிக்கவைக்கவும் எவ்வளவோ முயற்சி பண்ணி பார்த்தும் தோற்றுப் போயிட்டாளாம்.

அப் : ஓ.. இது என்னோட எரிச்சலை அதிகப்படுத்துது..இன்னும் ஏன் அவளை உயிரோட வெச்சிட்டிருக்கீங்க, கொன்னுடுங்க.

நபர் : ஐயா.. அவளை நேற்றைக்கே கொன்னாச்சு. நீங்க சொன்னாமாதிரி கம்பத்துல கட்டி வெச்சு, உயிர் போகற வரைக்கும் அடிச்சே கொன்னாச்சு.

அப் : இருந்துமா மனம் மாறல.

நபர் : பிபியானா மனம் மாறல, ரூஃப்பினா மனம் மாறுவாளோன்னு பயமா இருக்கு

அப் : அதிர்ச்சியில் என்ன சொல்றே..

நபர் : ஆமா.. சாகும்வரை பிபியானாவோட புன்னகை மாறல, ஒரு தெய்வீக ஒளி அவ முகத்துல தெரிஞ்சுது.. இயேசு உண்மையிலேயே தெய்வமா இருப்பாரோ.. ந்னு என்கிட்டே கேட்டாங்க.

அப் : ம்ம்ம்… சரி சரி.. கிளம்புங்க.

Image result for saint bibiana family

அப் : ( கொஞ்ச நேரம் யோசனையில் இருந்து விட்டு கிளம்புகிறான் )

 

 

 

 

 

 

பின் குரல் :

இறைமகன் இயேசுவுக்காக இரத்தசாட்சிகளாய் மரித்த எத்தனையோ குடும்பங்கள் வரலாற்றில் உண்டு. அதில் ஒரு குடும்பம் பிபியானாவின் குடும்பம். பிபியான மகிழ்ச்சியுடன் வலிகளைத் தாங்கிக் கொண்டு உயிர்விட்டார். கடைசி வரை விசுவாசத்தில் நிலைத்திருந்தார். லிபர் ஃபேன்டிபிகாலிஸ் எனும் வரலாற்று நூலில் இவரைப்பற்றிய குறிப்புகள் காணக் கிடைக்கின்றன. இவரது உடலின் மீது எழுப்பப்பட்ட தேவாலயம் இன்றும் ரோம் நகரில் இருக்கிறது. கிறிஸ்தவத்தின் சில பிரிவினர் டிசம்பர் 2ம் தியதியை, இவரை நினைவுகூரும் தினமாகக் கொண்டாடுகின்றனர். இவர் மரணமடைந்த காலம் தோராயமாக கிபி 363 எனப்படுகிறது.

Posted in Bible Poems, Christianity, Poem on People, Songs, Sunday School

Kavithai : யார் எதிரி

யார் எதிரி ?

Image result for joseph and potiphar's wife

இச்சைக்கு
இணங்கென்று
கண்ணி வெடி வைத்தாள்
கன்னியொருத்தி.

தனிமையின்
நெருக்கத்திலும்
தேகத் தீயில் விழாமல்
தப்பித்தார் யோசேப்பு !

போர்த்திபாவின்
மனைவி,
யோசேப்பின் தூய்மையை
உலகறியச் செய்தவள் !

கடவுளுக்கு எதிராகவே
கர்ஜித்து நின்றான்
ஒருவன்.

வீரனே இல்லாத
கோழை தேசமா என
கொக்கரித்தான்.

கோலியாத்,
தாவீதிடம்
கடவுள் இருந்ததை
வரலாற்றுக்கே
புரிய வைத்தவன்.

புனித முத்தத்தை
புனிதரின் முகத்தில்
பதித்தான் ஒருவன்.

எனினும்
அது புனிதமடையவில்லை.
போலியின் பிசுபிசுப்பால்
கறைபடிந்தது.

யூதாஸ்
சிலுவைப் பயணத்தை
முத்தத்தால்
துவங்கி வைத்தவன்.

கொலையாளிகளின்
ஆடைகளுக்குக்
காவலிருந்தான் ஒருவன்.

கொன்றே தீருவேனென
அழிக்கும் அனலுடன்
சீறிப் பாய்ந்தான்.

பயணம்
சவுலின் சத்தத்தை
பவுலின்
போதனையாய் மாற்றியது.

இறைவன்
வியப்பானவர்.

எதிரியின்
விரல்களைப் பிடித்தும்
எழுதுகிறார்
வெற்றியின் வரலாறுகளை

*

சேவியர்

Posted in Bible Poems, Christianity, Poem on People, Songs, Sunday School

எதிரே வருவதெல்லாம், எதிரியல்ல

எதிரே வருவதெல்லாம்,
எதிரியல்ல

Image result for red sea and moses
செங்கடல்
எதிரே வந்ததால் தான்
இரண்டாகப் பிரிந்தது.

யோர்தான்
குறுக்கே வந்ததால் தான்
குறுக்கு வெட்டுத்
தோற்றம் பெற்றது.

எதிரே வருவதெல்லாம்
எதிரியல்ல
சாதாரண வெற்றியை
அசாதாரணமாக்கும்
காரணிகள்.

எரிகோ மதில்
இல்லையெனில்
ஆராவாரமும்
ஆண்டவரின் ஆயுதமென்பது
புரிந்திருக்குமா ?

நாமான்
மட்டும் இல்லையென்றால்
நீர் கூட
நோய் தீர்க்குமென
விளங்கியிருக்குமா ?

சிலுவை மட்டும்
இல்லையென்றால்
பூட்டிய கல்லறையும்
புரட்டப்படுமென
புரிந்திருக்குமா ?

எதிரே வருவதெல்லாம்
எதிரியல்ல.
இறைவன் யாரென்பதை
நமக்கே உணர்த்தும்
உதிரிகள்

• சேவியர்

Posted in Bible Poems, Christianity, Songs, Sunday School

Kavithai : ஒருவன்

ஒருவன்

Image result for david and jesus

ஒரு தீக்குச்சி,
செய்யும்
சிறு தவறு
பிழையற்ற கானகத்தைப்
பொசுக்கி முடிக்கிறது.

தாவீதின்
பிழை
எழுபதாயிரம் பேரின்
மரணத்துக்கு
முன்னுரை எழுதியது.

ஏரோதின்
பிழை
எண்ணற்ற குழந்தைகளின்
புன்னகையை
அழுகையாய் மாற்றியது.

ஆபிரகாமின்
பிழை
தவறான சந்ததியை
பூமிக்கு அறிமுகம் செய்தது.

ஒரு மீட்பர் செய்யும்
பெரும் தியாகம்
பொசுங்கிய வாழ்வை
மீண்டும் புதுப்பிக்கிறது.

இயேசுவின் வருகை
ஒற்றை
விளக்கில்
அத்தனை இருட்டையும்
அடக்கும் முயற்சி.

ஒற்றை
சிப்பியில்
அத்தனை ஆழிகளையும்
நிறைக்கும் முயற்சி.

ஒற்றை
ஜீவனில்
அத்தனை மரணங்களையும்
முறிக்கும் முயற்சி.

இது
பிழையற்ற ஒருவர்
பிழையாய்
உருமாறிய தருணம்.

பாவமற்ற ஒருவர்
பாவத்தின் வடிவான
தருணம்.

ஒருவரால்
மனுக்குலம்
மீட்பின் வாசல் நுழைந்த
அனுபவம்.

நாமும்
ஒருவன் தான்.
கானகம் அழிக்கிறோமா
வானகம் அழைக்கிறோமா ?

*

சேவியர்

Posted in Songs, Sunday School

நான் இயேசுவின் பிள்ளை

Image result for kids and jesus

நான் இயேசுவின் பிள்ளை
எனக்கு கவலையே இல்லை
அருகில் வாவென
என்னை அழைத்தார்
தடுத்த மனிதரை
இயேசு கடிந்தார்

இயேசுவின் மனதில் நானிருப்பேன்
எந்தன் மனதில் அவர் இருப்பார்
அவரின் அன்பின் நானிருப்பேன்
அவர் போல் அன்பாய் நான் நடப்பேன்

Posted in Songs, Sunday School

Song : யூதாஸ் நானொரு யூதாஸ்

Image result for judas

யூதாஸ் நானொரு யூதாஸ்
மறைவாய் திரியும் யூதாஸ்
யூதாஸ் நானொரு யூதாஸ்
பாவம் உலவும் யூதாஸ்

எந்தன் பேச்சில் புனிதம் வடியும்
எந்தன் நடையில் பணிவும் தெரியும்
எந்தன் செயலில் மனிதம் மிளிரும்
இறைவா உண்மை உமக்கே தெரியும்

*

சுருக்குப் பையில் பணமும் தந்தால்
பாவ புண்ணியம் பார்ப்பதும் இல்லை
அன்போ நட்போ எதுவும் எந்தன்
தீய எண்ணம் தடுப்பதும் இல்லை

செல்வம் எனக்கு இறையென்றேன்
இறையை செல்லாக் காசென்றேன்
உலகின் பின்னால் அலைகின்றேன்
இறைவா உம்மை பிரிகின்றேன்

*

உறவின் அழகாம் முத்தம் தந்தும்
பிறரை அழிக்க தயங்கிய தில்லை
போலித் தனத்தை நெஞ்சில் நானும்
வேலி போட்டுத் தடுப்பதும் இல்லை

அன்பை நானும் போவென்றேன்
உண்மை நேசம் ஏனென்றேன்
விண்ணக வீட்டை வீணென்றேன்
தன்னலக் கூட்டில் வாழ்கின்றேன்