Posted in Articles, Christianity, Uncategorized, WhatsApp

திடுக்கிட வைக்கும் தீர்க்கத்தரிசனங்கள்

திடுக்கிட வைக்கும் தீர்க்கத்தரிசனங்கள்

ஒருவர் இயேசுவிடம், “போதகரே, சொத்தை என்னோடு பங்கிட்டுக்கொள்ளுமாறு என் சகோதரருக்குச் சொல்லும்” என்றார். அவர் அந்த ஆளை நோக்கி, “என்னை உங்களுக்கு நடுவராகவோ பாகம் பிரிப்பவராகவோ அமர்த்தியவர் யார்?” என்று கேட்டார்.” என்றார்.

( லூக்கா 12 : 13 )

சமீபகாலமாக என்னை மிகவும் வியப்புக்குள்ளாக்கும் ஒரு செய்தி புற்றீசல் போலக் கிளம்பும் தீர்க்கத்தரிசனங்கள். சிலருடைய தீர்க்கத்தரிசனங்களைக் கேட்கும் போது உண்மையிலேயே இயேசுவை அவர்கள் தங்களுடைய பர்சனல் செக்கரட்டரியாக நியமித்துவிட்டார்களோ என திடுக்கிட வைக்குமளவுக்கு இருக்கின்றன. 

‘கர்த்தர் சாயங்காலம் பல் விளக்கச் சொன்னார்’, ‘கர்த்தர் பெட் ரோல் விலை இன்னும் உயரும்ன்னு சொன்னார்’ என தாங்கள் நினைப்பதையெல்லாம் கடவுளின் பெயரோடு இணைத்துப் பேசுகின்ற தீர்க்கத் தரிசிகள் பலர் இன்றைக்கு நம்மிடையே உலவுகின்றனர். 

அவர்கள் அடுக்கடுக்காய் சொல்கின்ற செய்திகள் பல வேளைகளில் சிரிக்க வைக்கின்றன. ஒருவர் சொல்கின்ற வார்த்தைகள் கடவுள் பேசியதா அல்லது தனது ஆழ்மனதின் சிந்தனை வெளிப்பாடா என்பதைப் புரிந்து கொள்ள வேண்டும். தனது வசதிக்கும், தனது வாய்ப்புக்கும், தனது சூழலுக்கும் ஏற்ப இறைவாக்கு உரைப்பவர்கள் உண்மையில் இறைவாக்கை உரைக்கவில்லை, குறை வாக்கையே உரைக்கிறார்கள். அவர்கள் தங்களுடைய வார்த்தைகளை காலப் போக்கில் மாற்றிக் கொள்ளவும் தயங்குவதில்லை. கேட்டால், “அ..அ..அது அப்போ அப்படி சொன்னார், இப்போ இப்படி சொல்கிறார்” என்பார்கள். அவர்களே “கடவுள் நேற்றும் இன்றும் என்றும் மாறாதவர் என்றும் சொல்வார்கள். “  

இது அவர்களுடைய தவறும் அல்ல. பல வேளைகளை நம் மனதில் தோன்றுகின்ற எண்ணம் எல்லாமே இறைவன் தருவது என நினைத்துக் கொள்கிறோம். அது தவறு. நாம் பிறரைக் குறித்து ஒரு விஷயத்தைச் சொல்லும் போது, அது உண்மையிலேயே இறைவன் சொன்னது தானா என்பதை ஆராய்வது மிக மிக அவசியம். கிதியோனைப் போல கடவுளிடம் தனது சிந்தனை உண்மை தானா என கேட்டு அறிவதிலும் தவறில்லை. 

ஓர் இறைவாக்கினன் எனது பெயரால் பேசுவதாக எண்ணிக்கொண்டு, நான் அவனுக்குக் கட்டளையிடாதவற்றைப் பேசினால் … அந்த இறைவாக்கினன் சாவான் ( இணைச்சட்டம் 18:20 ) என இறைவன் மிகக் கடுமையாக எச்சரிக்கிறார்.  “எனது பெயரால் பேசுவதாக எண்ணிக் கொண்டு, நான் அவனுக்குக் கட்டளையிடாதவற்றைப் பேசினால்’ என இறைவன் மிக மிகத் தெளிவாக உரைக்கிறார். எனவே இறைவாக்கு உரைப்பவர்கள் மிகவும் கவனமாகவும், இறைவன் நம்மிடம் உண்மையிலேயே இதைப் பேசினாரா எனும் உறுதியைப் பலமுறை பெற்ற பின்பும் தான் பேசவேண்டும்.

அதிலும் குறிப்பாக, இறைவன் நீதிமான் எனக் கருதும் ஒருவரிடம் இறைவன் நேரடியாகப் பேசுவதே வழக்கம். பைபிளின் பக்கங்கள் முழுதும் அப்படித் தான் இருக்கின்றன. இறைவன் நீதியற்றவர்களைச் சந்திக்கவே பெரும்பாலும் இறைவாக்கினர்களை அனுப்புகிறார். அத்தகைய கடவுள் நீதிமானிடம் கூட பேசாத விஷயத்தை இன்னொருவர் மூலமாகப் பேசுகிறார் எனில், உண்மையிலேயே கடவுள் தான் பேசினாரா ? ஏன் பேசினார் ? போன்ற விஷயங்களை செபத்தில் நிலைத்திருந்து புரிந்து கொள்ள வேண்டும். அவை நமது மனதில் நாம் கற்பித்துக் கொண்ட நியாயங்களின் அடிப்படையில் எழுகின்ற சிந்தனையா என்பதையும் புரிந்து கொள்ள வேண்டும்.

ஒரு தீர்க்கத்தரிசி சொல்கின்ற தீர்க்கத்தரிசனங்கள் உண்மையிலேயே மக்கள் மீதான தன்னுடைய ஆழமான கரிசனையா ? அல்லது அது ஏதோ ஒரு சுயநலத் தேடலின் வெளிப்பாடா என்பதைக் கவனிக்க வேண்டும். சுயநலத் தேடல்களில் இறைவன் தனது தீர்க்கத்தரிசனத்தை எப்போதுமே வெளிப்படுத்துவதில்லை. இறைவனுடைய தீர்க்கதரிசனங்கள் எல்லாமே மக்கள் மீதான ஆழமான அன்பாக இருக்குமே தவிர, வெறுப்பாகவோ, விரோதமாக இருக்கவே இருக்காது. இதை பைபிளை நாம் ஆழமாய்ப் படிக்கும் போது புரிந்து கொள்ளலாம்.

இன்னொரு முக்கியமான விஷயம், தவறான போதனைகளுக்கு ஆதரவாக உண்மையான இறைவாக்கினர்கள் என்றுமே இருப்பதில்லை. சொர்க்கமும் கிடையாது நரகமும் கிடையாது என ஒருவர் சொல்கிறார் எனில் அவரது போதனை தவறான போதனை. அதற்கு ஆதரவாக கடவுளின் உண்மை இறைவாக்கினர்கள் நிற்பதில்லை. அதே போல, ‘ கடவுள் மாம்சத்தில் வந்தவரல்ல’ என்று ஒருவர் சொல்கிறாரெனில் அது தவறான போதனை அதற்கு ஆதரவாக நிற்பவர்கள் நிச்சயம் கடவுளின் இறைவாக்கினர்களாக இருக்க முடியாது. அத்திமரத்தில் திராட்சைப் பழங்கள் காய்ப்பதில்லை ! 

நாம் பல வேளைகளில், “ஐயோ ஒருவேளை அது கடவுளோட ஆவி பேசுவதாக இருந்தால் நாம் அவர்களை எதிர்க்கக் கூடாது” என நினைப்போம். பயப்படுவோம். அந்தப் பயமே அவர்களின் முதலீடு. இயேசு சொல்கிறார், “அஞ்சாதீர்கள்” ! 

கடவுள் ஆதாமிடம் தன்னுடைய ஆவியை ஊதினார். அந்த ஆவியே நம்மிடமும் இருக்கிறது. இயேசு நம்மிடம் சொல்கிறார் “ போலிகளைக் கண்டறியுங்கள். கனிகளைக் கொண்டே அவர்களின் தனி அடையாளங்களை அறியுங்கள். என்னை நோக்கி ஆண்டவரே ஆண்டவரே என்பவர்களோ, வசனத்தை வைத்து விளையாடுபவர்களோ, தீர்க்கத்தரிசனம் உரைப்பவர்களோ, வல்ல செயல்கள் செய்பவர்களோ என்னிடம் வருவதில்லை. தந்தையின் விருப்பப்படி நடப்பவர்களே வருவார்கள்” என்கிறார் இயேசு. எனவே யாருடைய ஆவியையும் இறைவசனங்களைக் கொண்டு ஆய்ந்து அறிவதில் கவலையே படாதீர்கள். 

“போலி இறைவாக்கினரைக் குறித்து எச்சரிக்கையாய் இருங்கள். ஆட்டுத் தோலைப் போர்த்திக் கொண்டு உங்களிடம் வருகின்றனர். ஆனால், உள்ளேயோ அவர்கள் கொள்ளையிட்டுத் தின்னும் ஓநாய்கள். அவர்களின் செயல்களைக் கொண்டே அவர்கள் யாரென்று அறிந்துகொள்வீர்கள்” என்கிறார் இயேசு. இறைவாக்கு உரைப்பவர் உண்மையிலேயே இயேசுவின் குணங்களைக் கொண்டிருக்கிறாரா ? அவரிடம் இயேசுவிடம் இருந்த பணிவு, கனிவு, புறம்பேசாமை, சுயநலம் பாராமை, தனிமனித விரோதம் கொள்ளாமை, சூழ்ச்சி கொள்ளாமை, பேதம் பார்க்காமை எல்லாம் இருக்கிறதா என்பதைப் பார்க்க வேண்டும். அப்படி இல்லாதவர்களைக் குறித்து எச்சரிக்கையாய் இருங்கள் என்கிறார் இயேசு !

உலகு சார்ந்த விஷயங்களைப் பேசுபவர்களிடம் உலகின் ஆவியே இருக்கும். தனக்கு நியாயமாய்க் கிடைக்க வேண்டிய சொத்தைப் பற்றிப் பேச வந்த மனிதரிடம், “என்னை உங்களுக்கு நடுவராகவோ பாகம் பிரிப்பவராகவோ அமர்த்தியவர் யார்?” என கேட்டவர் இயேசு.  அவரது தேடல் உலகு சார்ந்த விஷயமல்ல. அவரது போதனை விண்ணுலகு சார்ந்தது. எனவே உலகு சார்ந்த விஷயங்களையே தொடர்ந்து தீர்க்கத்தரிசனமாய் உரைப்பவர்களிடமிருந்து விலகியிருப்பதே நல்லது., அவர்களுக்காக செபிப்பது அதை விட நல்லது. 

இறுதியாக,

நம்மிடம் இறைவன் இருக்கிறார் !

இறைவார்த்தை இருக்கிறது. 

அதை விளக்கிச் சொல்ல தூய ஆவி இருக்கிறார்

இறை வார்த்தை அச்சத்தை விட்டு இறைவனில் அடைக்கலம் தேட நம்மை உற்சாகப்படுத்துகிறது. அதற்கு மாறாக அச்சத்தை விதைக்கின்ற, பிரிவினையை தூவுகின்ற எந்த ஆவியுமே பரிசுத்தம் பூசி வரும் அசுத்த ஆவிகள் என்பதைப் புரிந்து கொள்வோம். அவற்றை எதிர்த்து நிற்க தயங்காதிருப்போம். ஏனெனில் இறைவார்த்தையே சொல்கிறது…

தூய ஆவியின் தூண்டுதல் தமக்கு இருப்பதாகச் சொல்லிக்கொள்ளும் எல்லாரையுமே நம்பிவிடாதீர்கள்; அந்தத் தூண்டுதல் கடவுளிடமிருந்து வருகிறதா எனச் சோதித்தறியுங்கள் ( 1 யோவான் 4 : 1 )

*

சேவியர் 

Posted in Articles, Christianity, Uncategorized

SKIT : மாமியார் மருமகள்

( காலை நேரம் )

மாமியார் : கவிதா.. கவிதா… ஒரு காபி கொண்டாம்மா…

கவிதா : இதோ ஒரு நிமிஷம் ம்மா… ( மெதுவாக : ஆமா.. கண்ணு முழிச்ச உடனே காபி கேட்டுடுவாங்க.. கொஞ்சம் வெயிட் பண்ணினா என்னவாம் ? )

மாமியார் : உனக்கு வேலை இருக்குன்னா, அப்புறமா கூட குடு.. பரவாயில்லை.

கவிதா : இல்ல ம்மா.. இதோ… கொண்டு வந்துடறேன் ( மெதுவாக : பாவம்.. காபி குடிக்காட்டா அவங்களுக்கு தலைவலி வந்தாலும் வந்துடும் )

மாமியார் : சரிம்மா…

கவிதா : இந்தாங்கம்மா காபி..

மாமியார் : தாங்க்ஸ்மா.. நீ குடிச்சுட்டியா ?

கவிதா : இல்லம்மா.. கொஞ்சம் வேலை இருக்கு அதை முடிச்சுட்டு குடிக்கிறேன்.

மாமியார் : சரிம்மா.. நீ போய் வேலையைப் பாரு.

கவிதா : சரிம்மா ( கவிதா செல்கிறார் )

மாமியார் : ( காபியைக் குடித்துப் பார்க்கிறார் ) ( மெதுவாக ) ஐயய்யோ சூடே இல்லையே… ம்ம்ம்.. சரி .. பரவாயில்லை. பாவம் காலைல இருந்தே வேலை செஞ்சு கஷ்டப்படறா.. மறுபடியும் ஒரு வேலையைக் குடுக்க வேண்டாம்.

( அப்போது மகள் அனிதா வருகிறாள். )

அனிதா : அம்மா.. அண்ணி எங்கே… எனக்கு காபி வரவேயில்லையே..

மாமியார் : நீ போய் எடுத்து குடி.. அவ வேற வேலையா இருக்கா..

அனிதா : ஆமா.. உங்களுக்கு மட்டும் தருவாங்க. . எனக்கு தர மாட்டாங்களோ.. வரவர நமக்கு இந்த வீட்ல மரியாதை இல்லாம போச்சு.

மாமியார் : சிரிக்கிறார்… நீ இன்னொரு வீட்டுக்குப் போகும்போ … அங்கே உனக்கொரு நாத்தனார் இருப்பா…

அனிதா : அப்படி ஒருத்தி இருந்தா நான் ஒரு வழி பண்ணிடுவேன்.

மாமியார் : ( ஜாலியாக ) அப்போ உனக்கு மட்டும் ஒரு நியாயம் கவிதாக்கு ஒரு நியாயமா ?

அனிதா : சரி.. சரி.. விடுங்க.. நானே காபி போட்டுக்கறேன்..

( அப்போது கவிதா உள்ளே வருகிறார் )

கவிதா : ஏய்..அனிதா எழும்பிட்டியா… இன்னிக்கு காலேஜ் இருக்கா ? காபி குடிச்சுட்டியா ?

அனிதா : இல்ல அண்ணி… குடிச்சுக்கறேன்..

கவிதா : உனக்கும் சேத்து தான் போட்டிருக்கேன்.. கொஞ்சம் சூடு பண்ணிக்கோ சரியா..

அனிதா : சரி.. அண்ணி.. ஆமா, அண்ணன் இன்னிக்கு பாம்பே போறதா சொன்னான், எப்போ போறான் ?

கவிதா : பத்து மணி பிளைட்டுன்னு சொன்னாரு.. அதான் அவரோட துணியெல்லாம் அயர்ன் பண்ணிட்டிருந்தேன்.

அனிதா : ஆமா.. அதெல்லாம் அவன் பண்ண மாட்டானா ?

கவிதா : ஹி…ஹி.. பண்ணுவாரு.. நான் சும்மா தானே இருக்கேன்.. கொஞ்சம் ஹெல்ப் பண்ணலாம்ல..

அனிதா : ஆமா.. இந்த பொண்டாட்டிங்க தான் புருஷனை சோம்பேறியாக்கறது.

மாமியார் : ஆமாமா.. நீ ஒரு வீட்டுக்குப் போகும்போ தெரியும்.. நீ எப்படி உன் புருஷனை சோம்பேறி ஆக்கறேன்னு

அனிதா : நான் அப்படியெல்லாம் பண்ணவே மாட்டேன். அவரு தான் எனக்கு எல்லாம் பண்ணணும். .. நான் ஜாலியா இருக்கணும்.

மாமியார் : ஓவரான கனவெல்லாம் வளர்த்த வேண்டாம் மகளே… குடும்பங்கறது ஒருத்தர் ஒருத்தருக்கு உதவியா இருக்கிறது தான். நான் ஏன் அவங்களுக்கு உதவி செய்யணும் ? அப்படிங்கற சிந்தனை வந்தாலே குடும்பம் ஆட்டம் கண்டுடும்.

கவிதா : அவ சின்னப் பொண்ணு ம்ம்மா.. அதான் விளையாட்டுத் தனமா பேசறா.

மாமியார் : ம்ம்..இப்போ பேசறது தானே அப்புறமும் வரும்.

கவிதா : அப்படியெல்லாம் இல்லம்ம்மா.. நாம பிறந்த வீட்ல ஜாலியா, சந்தோசமா அன்பா இருந்தா அப்படியே தான் புகுந்த வீட்டையும் வெச்சுக்க நினைப்போம்.. அவ அப்படி தான் வெச்சுப்பா..

அனிதா : ஓவர் தத்துவம் எல்லாம் பேசாதீங்க.. கல்யாணத்தைப் பற்றி எதுக்கு இப்போ பேச்சு. அங்கே போய் மாமியார் தொந்தரவுல கஷ்டப்படவா ?

கவிதா : மாமியார்னா என்ன ? எல்லாருமே ஒரு குடும்பம் தானே… சண்டை வந்தா போட்டுக்கோங்க, ஆனா அப்புறம் சமாதானம் ஆயிடுங்க.. நாங்க இருக்கிற மாதிரி..

மாமியார் : ( விளையாட்டாக ) ஆமா.. நான் எப்போ சண்டை போட்டேன் உன் கூட..

அனிதா : இதோ.இதோ இப்போ சண்டை ஸ்டார்ட் ஆகுதுல்ல..( சிரிக்கிறார் )

கவிதா : ஹா..ஹா.. எங்களுக்குச் சண்டை போட வேண்டிய தேவை வரல. அதான் உண்மை.

மாமியார் : அப்படியெல்லாம் இல்ல.. நாங்க சண்டை போட்டிருக்கோம். ஆனா அந்த சண்டையை நீட்டக் கூடாது. ஒருத்தர் விட்டுக் குடுத்து போகணும். விட்டுக் குடுக்கிறவங்க பெரிய மனுஷங்கன்னு நினைச்சுக்கணும், அப்போ விட்டுக் குடுக்கத் தோணும். ஈகோ இல்லாம இருந்தா வீட்ல யூ..கோ ந்னு கத்த வேண்டி வராது.

கவிதா : சூப்பரா பேசறீங்கம்மா.. உண்மை தான்.. என்னப் பொறுத்தவரைக்கும் பொறுமையை கடைபிடிச்சாலே முக்காவாசி பிரச்சினை போயிடும்மா…

அனிதா : போதும் போதும் நிறுத்துங்க.. ஓவரா அட்வைஸ் பண்ண ஆரம்பிச்சுடாதீங்க… நான் கிளம்பறேன்.

மாமியார் :..ஆமாமா.. நீ காலேஜுக்கு கிளம்பு… டைம் ஆவுது..

கவிதா : சரிம்மா… இன்னிக்கு லஞ்ச் என்ன பண்ணலாம் ?

மாமியார் : அது கொஞ்சம் கழிஞ்சு யோசிப்போம்.. நீ இப்போ கொஞ்சம் ரெஸ்ட் எடு

*

Posted in Bible Feasts, Uncategorized

விவிலிய விழாக்கள் 4. பெந்தேகோஸ்தே விழா !

Image result for feast of pentecost

  1. பெந்தேகோஸ்தே விழா !

பெந்தேகோஸ்தே விழா அறுவடைப் பெருவிழா என்றும், வாரங்களின் விழா என்றும் பல பெயர்களில் அழைக்கப்படுகிறது. நிசான் மாதத்தின் 14ம் நாள் பாஸ்கா பண்டிகை கொண்டாடப்பட்டது. அடுத்த நாளிலில் இருந்து புளிக்காத அப்பத் திருவிழா ஆரம்பமானது. நிசான் மாதத்தின் 16ம் நாள் முதற்பலன் விழா கொண்டாடப்பட்டது. இப்போது முதல் பலன் விழாவிலிருந்து ஐம்பதாவது நாள் இந்த பெந்தேகோஸ்தே விழா கொண்டாடப்படுகிறது.

முதற்பலனில் இறைவனுக்கு பார்லி படைக்கப்பட்டது, அது இறைமகன் இயேசுவைக் குறிப்பதாய் அமைந்தது. இப்போது ஐம்பது நாட்கள் கழிந்து வருவது கோதுமை அறுவடையின் காலம். கோதுமையை இறைவனுக்குப் படைக்கும் விழாவாக இந்த அறுவடைப் பெருவிழா அல்லது பெந்தேகோஸ்தே நாள் கொண்டாடப்படுகிறது. பெந்திகோஸ்தே எனும் கிரேக்க வார்த்தையிலிருந்து இந்த பெந்தேகோஸ்தே எனும் பெயர் வந்தது, இதற்கு ஐம்பது என்பது பொருள் !

முதற்பலன் நாளில் இருந்து ஏழு வாரங்களைக் கணக்கிட்டு அதற்கு அடுத்த நாளில் இந்த விழா கொண்டாடுவதால், வாரங்களின் விழா என்றும் அழைக்கப்படுகிறது. ஏழு என்பது முழுமையின் குறியீடு. அடிமைத்தனத்திலிருந்து மனிதன் முழுமையாய் மீட்படைந்ததன் அடையாம் இது.

இதைக்குறித்து இறைவனின் கட்டளை இவ்வாறு கூறுகிறது.

ஆரத்திப் பலியாகக் கதிர்க்கட்டினைக் கொண்டுவந்த ஓய்வு நாளின் மறு நாளிலிருந்து ஏழு வாரங்களைக் கணக்கிடவும்ஏழாம் ஓய்வு நாளுக்கு மறுநாளான ஐம்பதாம் நாளில் ஆண்டவருக்குப் புது உணவுப் படையலைச் செலுத்துங்கள்.

நீங்கள் வாழும் இடங்களிலிருந்து இருபது படி அளவுள்ள ஒரு மரக்கால் மிருதுவான மாவில் பத்தில் இரு பகுதி எடுத்து, புளிப்பேற்றி இரண்டு அப்பங்களைச் சுட்டு, அவற்றை ஆண்டவருக்கு பலியாகக் கொண்டு வாருங்கள்ஓராண்டான பழுதற்ற ஏழு ஆட்டுக் குட்டிகளையும், ஒரு காளையையும், இரண்டு ஆட்டுக் கிடாய்களையும் ஆண்டவருக்கு எரிபலியாகச் செலுத்துங்கள்.

உங்கள் நாட்டில் நீங்கள் அறுவடை செய்யும்போது உங்கள் வயலோரத்தில் இருப்பதை முற்றிலும் அறுத்துவிடாமலும் சிந்திக்கிடக்கும் கதிர்களைப் பொறுக்காமலும் இருங்கள். அவற்றை எளியவருக்கும் அன்னியருக்கும் விட்டுவிடுங்கள். நானே உங்கள் கடவுளாகிய ஆண்டவர்!”

விளைச்சலின் பயனை இறைவனுக்குப் படைக்கும் விழாக்கள் உலகெங்கும் பல்வேறு வகைகளில் கொண்டாடப்பட்டு வருகின்றன. இந்த அறுவடை விழாவும் சுமார் 3500 ஆண்டுகளாக நினைவு கூரப்பட்டு வருகிறது.

இதுவும் இறைமகன் இயேசுவைக் குறியீடாய் கொண்ட ஒரு விழாவே. முதற்பலனாக இறைமகன் இயேசு இருக்கிறார், இரண்டாவதான இந்த அறுவடை விழா மனிதர்களை உயிர்த்தெழச் செய்யும் நிகழ்வின் குறியீடு. எனவே தான் இங்கே புளிப்பான மாவு பயன்படுத்தப்படுகிறது. புளிப்பு என்பது பாவத்தைக் குறிப்பது. பாவியாகிய நம்மை மீட்டுக்கொண்ட இறைவனின் திட்டம் இதன் மூலம் தெரிவிக்கப்படுகிறது. தேர்ந்து கொண்ட இஸ்ரேல் இனமும், தேர்ந்து கொள்ளப்படாத பிற இனங்களும் இறைவன் முன்னில் இணையும் குறியீடே இரட்டை அப்பங்கள் !

மோசே இஸ்ரேல் மக்களை எகிப்திலிருந்து விடுவித்துக் கொண்டு வெளியே வந்த ஐம்பதாவது நாளில் சீனாய் மலையில் இறைவன் பத்து கட்டளைகளைக் கொடுக்கிறார் ! அந்த வார்த்தைகள் அடங்கிய சட்டங்களை மோசே சுமந்து வருகிறார்.

இறைமகன் இயேசு உயிர்த்தபின் ஐம்பதாவது நாளில் தூய ஆவியானவர் சீடர்களின் மேல் நெருப்பு நாவாக வந்து இறங்கினார். இறைவனை விவிலியம் “வார்த்தை” என்கிறது. மோசேயிடம் வார்த்தைகள் எழுத்து வடிவமாக கிடைத்தன, இங்கே தூய ஆவி வடிவமாக கிடைக்கின்றன.

மோசே கட்டளைகளைப் பெற்ற அந்த ஐம்பதாவது நாளிலும் சத்தமும், பெருங்காற்றும் காற்றும், நெருப்பும் இருந்தன. புதிய ஏற்பாட்டின் பெந்தேகோஸ்தே நாளிலும் நெருப்பும், பெருங்காற்றும், சத்தமும் இருந்தன.

மோசே கட்டளைகளைக் கொண்டு வந்த நாளில் மக்கள் இறைவனை விட்டு விலகி கன்றுக்குட்டியை வணங்கிக் கொண்டிருந்தார்கள். சட்டம் கொண்டு வந்த அந்த நாளில் மூவாயிரம் பேர் கொல்லப்பட்டனர். தூய ஆவி வந்திறங்கிய நாளில் சீடர்கள் பல மொழிகளில் பேச, மக்களில் மூவாயிரம் பேர் மீட்புக்குள் வந்தனர்.

“எழுதப்பட்ட சட்டத்தால் விளைவது சாவு; தூய ஆவியால் விளைவது வாழ்வு ( 2 கொரி 3 : 6 ) ” எனும் இறைவார்த்தை நிறைவேறும் நிகழ்ச்சியே இதில் மறைந்துள்ள மறை உண்மை !

புதிய ஏற்பாட்டில் அறுவடை என்பது தானிய அறுவடை என்பதைத் தாண்டி, இதயங்களை இறைவனிடம் கொண்டு வரும் நிகழ்வு எனலாம். “உங்களை மனிதரைப் பிடிப்போர் ஆக்குவேன்” என இறைமகன் இயேசு நற்செய்தி அறிவிக்க சீடர்களை அழைத்தார். முதற்பலனான இறைமகன் உயிர்த்து விட்டார், இப்போது இரண்டாம் பலனான நாம் கிறிஸ்துவின் அன்பில் இணையவேண்டும். அதுவே இந்த புதிய அறுவடை !

சுயநலமற்ற சிந்தனைகளோடு இறைமகனிடம் நம்மை நாமே அர்ப்பணிப்பதே இந்த விழாவின் இன்றைய சிந்தனை.

Posted in Bible Feasts, Uncategorized

விவிலிய விழாக்கள் 2. புளிப்பற்ற அப்பப் பண்டிகை

2. புளிப்பற்ற அப்பப் பண்டிகை

Image result for unleavened bread feast

விவிலியத்தில் வருகின்ற விழாக்களில் முக்கியமான ஒன்று புளிப்பற்ற அப்பப் பண்டிகை ! பண்டைய விழாக்கள் இறைவனுக்கும் மனிதனுக்கு இடையேயான உறவின் வெளிப்பாடுகள். பழைய ஏற்பாட்டில் கொண்டாடப்படும் இந்த புளிப்பில்லாத அப்பத் திருவிழாவும் இறைமகன் இயேசுவின் வாழ்க்கையை முன்குறிக்கின்ற ஒரு விழாவாகவே அமைகிறது !

‘பாஸ்கா விழா’ வுக்கு அடுத்த நாளிலிருந்து இந்த விழா ஆரம்பமாகிறது. இந்த விழா ஏழு நாட்கள் தொடர்ச்சியாகக் கொண்டாடப்படும் ஒரு விழா.

எகிப்தில் அடிமைத்தனத்தில் கிடந்த இஸ்ரேஸ் மக்களை மோசேயின் மூலமாக கடவுள் மீட்கிறார். அவர்கள் விடுவிக்கப்படுகின்றனர். அவசர அவசரமாக அவர்கள் நாட்டை விட்டு வெளியேறும் போது கடவுள் இந்த கட்டளையைக் கொடுக்கிறார். “வீடுகளிலிருந்து புளிப்பானவற்றை அகற்றுங்கள். புளிப்பான எதையும் எடுத்துக் கொள்ள வேண்டாம், புளிப்பற்ற அப்பத்தை மட்டுமே ஏழு நாட்கள் உண்ணுங்கள்” !

அப்படி இஸ்ரயேல் மக்கள் புளிப்பற்ற அப்பத்தையும், புளிக்காத திராட்சை ரசத்தையும் ஒரு வாரம் குடித்து இந்த விழாவைக் கொண்டாடுகின்றனர். கடவுள் அவர்களை வாக்களிக்கப்பட்ட நாட்டுக்கு அழைத்துச் செல்வதற்கான முதல் நிலையாக இந்த விழா அமைகிறது.

புளிப்பற்ற அப்பத்தைத் தயாராக்கும் முறை வித்தியாசமானது. அப்பத்தின் மீது கோடுகளையும், துளைகளையும் போட்டு அதை சுடுவார்கள். இதனால் அப்பம் விரைவாக தயாராகி விடும். வரலாற்றுப் பதிவுகள் இந்த அப்பம் சுட 18 நிமிடங்கள் மட்டுமே தேவைப்படும் என்கின்றன.

சுட்டு முடித்தபின் அதன் உடலெங்கும் சாட்டையால் அடித்தது போன்ற காயங்களும், துளைகளும் காணப்படும் !

புளிப்பு என்பது பாவத்துக்கு ஒப்பீடாக விவிலியத்தில் பயன்படுத்தப்படுகிறது. இறைமகன் இயேசு தனது போதனைகளில் “புளிப்பு மாவை விலக்க வேண்டும் எனவும், புளிப்பு மாவு குறித்து கவனமாய் இருக்க வேண்டும் எனவும்” பல முறை வலியுறுத்தியிருக்கிறார்.

அதற்கு மாறாக, புளிப்பற்ற மாவு என்பது தூய்மையைக் குறிக்கிறது. இறைமகன் தருகின்ற புனித வாழ்வுக்கு அது ஒப்பீடு செய்யப்படுகிறது. புளிப்பை விலக்கி விட்டு புளிப்பற்ற அப்பத்தை எடுப்பது, பாவத்தை விலக்கி விட்டு புனிதத்தை அணிவது எனும் பொருளில் வருகிறது!

புளிப்பற்ற அப்பத்தின் உடலில் உள்ள வரிகள், பாவமற்ற இயேசுவின் உடலில் சாட்டையால் கொண்ட தழும்புகளைக் குறிக்கின்றன. அப்பத்தின் துளைகள் இயேசுவின் உடலில் ஆணிகளாலும், ஈட்டியாலும் உருவான காயங்களைக் குறிக்கின்றன. திராட்சை இரசம் அவரது குருதியைக் குறிக்கிறது. “என் உடலை உண்டு, இரத்தத்தைக் குடியுங்கள்” என இயேசு சொன்னது அவரால் புனிதமாக வேண்டும் என்பதன் குறியீடே.

“ஆகையால் பழைய புளிப்பு மாவைத் தவிர்க்க வேண்டும். தீமை, பரத்தைமை போன்ற புளிப்பு மாவோடு அல்ல, மாறாக நேர்மை, உண்மை போன்ற புளிப்பற்ற அப்பத்தோடு பாஸ்காவைக் கொண்டாடுவோமாக” 1 கொரி 5:8 எனும் விவிலிய வசனம் புளிப்பு என்பது பாவம் என்பதை தெளிவாக விளக்குகிறது.

அதே போல புளிப்பு என்பது வெளிவேடம் என்பதையும் இயேசு குறிப்பிடுகிறார். “பரிசேயருடைய வெளிவேடமாகிய புளிப்பு மாவைக் குறித்து நீங்கள் எச்சரிக்கையாய் இருங்கள்” என அவர் மிகத் தெளிவான போதனையை தருகிறார். பரிசேயர் சதுசேயர் ஆகியவர்களுடைய வெளிவேடமும், அவர்களுடைய போதனையும் புளிப்பு மாவைப் போன்றது. அதை விலக்க வேண்டும் என்பதே அவருடைய அறிவுறுத்தலாய் இருந்தது.

அதேபோல ஏரோதியரின் புளித்த மாவு என உலகு சார்ந்த சிந்தனைகளை இயேசு குறிப்பிடுகிறார். உலகின் போக்கில் வாழ்வதையே வாழ்க்கை எனக் கொள்ளாமல் இறைவனின் வாக்கில் வாழ்வதையே வழக்கமாகக் கொள்ளவேண்டும் என்பது அவரது அறிவுரையாய் இருந்தது.

இயேசு தன்னை அப்பம் என அழைத்தார். ஜீவ அப்பம் நானே என்றும் வாழ்வு தரும் உணவு நானே என்றும் அவர் தனது போதனைகளில் குறிப்பிட்டார்.

இன்றைக்கு புளிப்பற்ற அப்பத் திருவிழா பழைய நாட்களைப் போல கொண்டாடப்படமல் புதிய சிந்தனையின் அடிப்படையிலேயே கொண்டாடப்படுகிறது. நமது வாழ்க்கையில் கலந்திருக்கின்ற பாவங்களை முழுவதுமாய் அகற்றி விட்டு புனிதமான வாழ்க்கையில் பயணிக்க வேண்டும் என்பதே அந்த புதிய சிந்தனை.

ஏழு என்பது விவிலியத்தில் முழுமையைக் குறிப்பிடும் சொல். ஏழு நாள் புளிப்பற்ற அப்பம் உண்ண வேண்டும் என்பது வாழ்நாள் முழுதும் புனிதமாய் இருக்க வேண்டும் என்பதன் அடையாளம். கொஞ்சம் புளிப்பு மாவை நல்ல மாவோடு சேர்த்து வைத்தால் மொத்த மாவும் புளித்துப் போய்விடும். அதே போல கொஞ்சம் பாவம் தானே என நம்மோடு அதை சேர்த்துக் கொண்டால் அது நமது வாழ்க்கையை முழுவதுமாய் செல்லரித்துப் போகச் செய்து விடும்.

புதிய ஏற்பாட்டின் பின்னணியில், இறைமகன் இயேசுவின் போதனையின் வெளிச்சத்தில் இந்த புளிப்பற்ற அப்பப் பண்டிகை பாவத்தை விலக்கும் விழாவாகக் கொண்டாடுவதே சரியானது !

Posted in Parables of JESUS, Uncategorized

இயேசு சொன்ன உவமைகள் 20 : மினா நாணயமும், பணியாளர்களும்

மினா நாணயமும், பணியாளர்களும்

Image result for ten minas parable

லூக்கா 19 : 11 முதல் 27 வரை

இயேசு எருசலேமை நெருங்கி வந்துகொண்டிருந்தார். அவர் சொன்னதைக் கேட்டுக்கொண்டிருந்தவர்கள் இறையாட்சி உடனடியாகத் தோன்றப்போகிறது என்று நினைத்தார்கள். அப்போது இயேசு மேலும் ஓர் உவமையைச் சொன்னார்:

“உயர் குடிமகன் ஒருவர் ஆட்சியுரிமை பெற்றுவரத் தொலை நாட்டிற்குப் போகப் புறப்பட்டார். அப்போது அவர் தம் பணியாளர்கள் பத்துப் பேரை அழைத்து, பத்து மினாக்களை அவர்களிடம் கொடுத்து அவர்களை நோக்கி, ‘நான் வரும்வரை இவற்றை வைத்து வாணிகம் செய்யுங்கள்’ என்று சொன்னார்.

அவருடைய குடிமக்களோ, அவரை வெறுத்தனர். எனவே, ‘இவர் அரசராக இருப்பது எங்களுக்கு விருப்பமில்லை’ என்று சொல்லித் தூது அனுப்பினர். இருப்பினும் அவர் ஆட்சியுரிமை பெற்றுத் திரும்பி வந்தார். பின்னர் தம்மிடம் பணம் வாங்கியிருந்த பணியாளர் ஒவ்வொருவரும் ஈட்டியது எவ்வளவு என்று அறிய அவர் அவர்களைக் கூப்பிட்டு அனுப்பினார்.

முதலாம் பணியாளர் வந்து, ‘ஐயா, உமது மினாவைக் கொண்டு பத்து மினாக்களைச் சேர்த்துள்ளேன்’ என்றார். அதற்கு அவர் அவரிடம், ‘நன்று, நல்ல பணியாளரே, மிகச் சிறிய பொறுப்புகளில் நம்பிக்கைக்கு உரியவராய் இருந்தீர். எனவே பத்து நகர்களுக்கு அதிகாரியாய் இரும்’ என்றார்.

இரண்டாம் பணியாளர் வந்து, ‘ஐயா உமது மினாவைக் கொண்டு ஐந்து மினாக்களை ஈட்டியுள்ளேன்’ என்றார். அவர், ‘எனவே நீர் ஐந்து நகர்களுக்கு அதிகாரியாய் இரும்’ என்று அவரிடமும் சொன்னார்.

வேறொருவர் வந்து, ‘ஐயா, இதோ உமது மினா. ஒரு கைக்குட்டையில் முடிந்து வைத்திருக்கிறேன். ஏனெனில் நீர் கண்டிப்புள்ளவர் என்று உமக்கு அஞ்சி இப்படிச் செய்தேன். நீர் வைக்காததை எடுக்கிறவர்; நீர் விதைக்காததை அறுக்கிறவர்’ என்றார்.

அதற்கு அவர் அவரிடம், ‘பொல்லாத பணியாளே, உன் வாய்ச் சொல்லைக் கொண்டே உனக்குத் தீர்ப்பிடுகிறேன். நான் கண்டிப்பானவன்; வைக்காததை எடுக்கிறவன்; விதைக்காததை அறுக்கிறவன் என உனக்குத் தெரியுமல்லவா? அப்படியானால் ஏன் என் பணத்தை வட்டிக் கடையில் கொடுத்து வைக்கவில்லை? நான் வந்து அதை வட்டியோடு சேர்த்துப் பெற்றிருப்பேனே’ என்றார்.

பின்பு அருகில் நின்றவர்களிடம், ‘அந்த மினாவை அவனிடமிருந்து எடுத்து, பத்து மினாக்கள் உள்ளவருக்குக் கொடுங்கள்’ என்றார். அதற்கு அவர்கள், ‘ஐயா, அவரிடம் பத்து மினாக்கள் இருக்கின்றனவே’ என்றார்கள். அவரோ, ‘உள்ளவர் எவருக்கும் கொடுக்கப்படும். இல்லாதோரிடமிருந்து உள்ளதும் எடுக்கப்படும்’ என உங்களுக்குச் சொல்கிறேன்’ என்றார்.

மேலும் அவர், ‘நான் அரசனாக இருப்பதை விரும்பாத என் பகைவர்களை இங்குக்கொண்டு வந்து என்முன் படுகொலை செய்யுங்கள்’ என்று சொன்னார்.”

Image result for ten minas parable

இயேசுவின் போதனைகள் இறையாட்சி உடனே வரப் போகிறது எனும் சிந்தனையை மக்களிடம் உருவாக்கியிருந்தது. அவர்களுடைய பார்வையில் இறையாட்சி என்பது தாவீதின் குலத்தில் தோன்றும் மன்னர் ஒருவர் பொற்கால ஆட்சியைத் தருவார், எதிரிகளை அடியோடு ஒழிப்பார், அடிமை நிலையை மாற்றுவார் என்பதாகவே இருந்தது. இறைமகன் இயேசு சொன்ன இறையாட்சி முற்றிலும் வித்தியாசமானது. தூய ஆவியானவரை நமக்குள் ஏற்று நாம் வாழப்போகும் வாழ்க்கையின் குறியீடு அது. இயேசு மீண்டும் வரப்போகின்ற இரண்டாம் வருகையின் குறியீடு.

அந்த பின்னணியில் இயேசு மக்களிடம் இந்த உவமையைக் கூறுகிறார். இந்த உவமை இறைமகன் இயேசு உலகில் இல்லாத இந்தக் காலகட்டத்தில் அவரது பணியாளர்கள் எப்படிப் பணி செய்ய வேண்டும் என்பதை விளக்குகிறது. இயேசு மனிதராக பூமியில் இல்லாத இந்த காலத்தில் அவருடைய பணிகளை முழு மனதோடு செய்பவர்களிடம் தான் இறை விசுவாசம் இருக்கிறது, இறை அன்பு இருக்கிறது, நிறை வாழ்வுக்கான தேடல் இருக்கிறது என்பதையே இந்த உவமை விளக்குகிறது. அப்படி முழு மனதோடு உண்மையாய் இறை பணி செய்யும் மக்களுக்கு இறைவன் மேலும் மேலும் வரங்களை அளிக்கிறார்.

இந்த உவமை சில உண்மைகளை நமக்குள் விதைத்துச் செல்கிறது.

Image result for ten minas parable1. தலைவன் தங்களோடு இருக்கும்போது பணியாளர்கள் துணிவுடன் பணி செய்வார்கள். ஆனால் தலைவன் இல்லாதபோது அதே உற்சாகத்தோடு பணி செய்யும் ஊழியக்காரர்களே இறைவன் பார்வையில் சிறப்பானவர்கள். எனவே தான் அவர் தோமாவிடம், “என்னைக் காணாமலேயே விசுவசிப்பவன் பேறு பெற்றவன்” என்கிறார். இயேசு இந்த உலகிலிருந்து எடுத்துக் கொள்ளப்பட்ட இந்தக் காலகட்டத்தில் பணியாளர்கள் எப்படி இருக்க வேண்டும் என்பதையே இது கூறுகிறது. காரணம் இந்த கால கட்டம் தான் எதிர்ப்புகள் அதிகமாய் உலவும் காலகட்டம், விசுவாசத்துக்கு மிகப்பெரிய சோதனை எழும் காலகட்டம்.

Image result for ten minas parable2. தலைவன் அரசுரிமை பெற்றுவரச் செல்லும்போது ஊழியர்களுக்கு தலா ஒரு மினா வழங்குகிறார். எல்லோருக்கும் சமமாய்க் கொடுக்கப்படுவது “நேரம்” எனலாம். அல்லது “ஒரு ஜீவன்” என்று வைத்துக் கொள்ளலாம். அதை வைத்துக் கொண்டு நாம் என்ன செய்கிறோம் ? நமது வாழ்க்கையில் இறைவன் வியக்கும் வகையில் நடக்கிறோமா ? வெறுக்கும் வகையில் நடக்கிறோமா என்பதே கேள்வி.

Image result for ten minas parable3. தலைவர் ஊழியர்களிடம் மினாக்களைக் கொடுக்கும் போது “இவற்றை வைத்து வாணிகம் செய்யுங்கள்” என்று தான் சொல்கிறார். மற்ற அனைத்து உரிமைகளையும் ஊழியர்களிடமே கொடுத்து விடுகிறார். என்ன வாணிகம் செய்வது, எப்போது செய்வது, எப்படி செய்வது என ஊழியர்களுக்கு முடிவெடுக்கும் உரிமைகள் அனைத்தையும் அளிக்கிறார். அதே சூழலில் தான் நாமும் இருக்கிறோம். “பணி செய்யுங்கள்” என அழைப்பு விடுத்த இறைவன் “எப்படிப் பணி செய்வது” என்பதை நம்மிடமே விட்டு விடுகிறார். நாம் எப்படி வாழ்கிறோம் ? அடுத்தவர்களை எப்படி வாழ வைக்கிறோம் எனும் கேள்விகள் நம்மிடம் எப்போதும் இருக்கட்டும்.

Image result for ten minas parable4. “அவருடைய குடிமக்கள் அவரை வெறுத்தனர்” எனும் சொற்றொடர் இறைமகன் இயேசுவின் மக்கள் அவரை வெறுத்தனர் என்கிறது. இயேசுவை வெறுப்பது என்பது அவருடைய கட்டளைகளை நிராகரிப்பதே. என்னை அன்பு செய்பவன் என் கட்டளைகளைக் கடைபிடிப்பான் என்கிறார் இயேசு. அப்படியானால் என்னை வெறுப்பவன் என் கட்டளைகளை அன்பு செய்ய மாட்டான் என்பதே அதன் பொருள். அதாவது இயேசுவை வெறுப்பது என்பது அவர் கட்டளைகளை நிராகரிப்பதே. நாம் இறைவனை அன்பு செய்கிறோமா ?

Image result for ten minas parable5. தலைவன் அரசுரிமையோடு திரும்பி வரும்போதும் அன்பான மனதுடனே வருகிறார். “ஈட்டியது” எவ்வளவு என்பதை அறியும் ஆவல் தான் அவரிடம் இருந்தது. இவ்வளவு ஈட்டினாயா ? என அவர் கேட்கவில்லை. எவ்வளவு ஈட்டினாய் என்றே கேட்கிறார். நாம் எவ்வளவு ஈட்டினோம் எனும் கேள்வியை நம் மனதில் நாளும் கேட்கவேண்டும். இல்லையேல் இன்றே நமது வாழ்க்கையை அர்த்தமுள்ளதாக்க ஆரம்பிக்க வேண்டும்.

Image result for ten minas parable6. முதலாவது ஊழியன் தனது மினாவை பத்து மடங்காக்குகிறான். இவர் தனது நாட்கள் முழுவதும் தலைவனின் மினாவைக் குறித்த கவனத்திலேயே இருந்த முழு நேரப் பணியாளர் எனலாம். முழு நேரப் பணியாளர் என்பது இறைவனுக்கு ஏற்புடைய வாழ்க்கையை ஒவ்வொரு கணமும் வாழ்வது எனக் கொள்ளலாம். அவர் தன் தலைவனுக்கு அதிகபட்ச பலனைக் கொடுக்க வேண்டும் எனும் சிந்தனையில் உழைத்துக் கொண்டிருந்தவர். அவருடைய பதில் தலைவனை மகிழ்ச்சிக்குள்ளாக்குகிறது. அவரை பத்து நகர்களுக்கு அதிகாரியாக்குகிறார். இவருக்குத் தான் மேலும் மினாக்கள் அளிக்கப்படுகின்றன. சிறியவற்றில் நம்பிக்கையாய் இருந்தாய் எனும் தலைவனின் பாராட்டும் கிடைக்கிறது.

Image result for ten minas parable7. இரண்டாவது பணியாளர் ஐந்து மினாக்கள் சம்பாதித்தார். அவருக்கும் தலைவனின் பரிசு கிடைக்கிறது. ஐந்து நகர்களுக்கு அவர் அதிகாரியாகிறார். ஐந்து மினாக்கள் சம்பாதித்தவர் பகுதி நேரப் பணியாளர் எனலாம். அவர் தனது உலகப் பணிகளுக்கு பாதி நேரம் செலவிட்டு விட்டு மீதி நேரம் தலைவனின் பணியைச் செய்தார் எனலாம். ஆனால் செய்த வேலையை அவர் கவனமாய்ச் செய்ததால் தலைவனின் மினாவை ஐந்து மடங்காக்க முடிந்தது.

Image result for ten minas parable8. மூன்றாவது வகைப் பணியாளர் தலைவரின் மினாவை கைக்குட்டையில் பொதிந்து வைக்கிறார். பிறர் பார்க்கும் விதமாகத் திறந்து கூட வைக்கவில்லை. இவர் தலைவன் கடினமானவன் என தலைவனையே குற்றம் சாட்டுகிறார். இவருக்கு தலைவரைக் கண்டு பயம் இருக்கிறது ஆனால் அந்தப் பயம் தலைவனுக்கு ஏற்புடைய செயல்களைச் செய்யத் தூண்டவில்லை. மாறாக தலைவன் தந்ததை தலைவனிடம் அப்படியே திரும்ப‌ கொடுக்க வைக்கிறது. தலைவனோ கோபமடைகிறார். இறைவன் நமக்குத் தரும் வாழ்க்கையை, கொடைகளை, வரங்களை பயன்படுத்தாமல் அப்படியே இறைவனிடம் திருப்பிக் கொடுத்தால் இறைவன் விரும்புவதில்லை. நமது வரங்களை நாம் பயன்படுத்துகிறோமா ?

Image result for ten minas parable9. “உன் வாய்ச்சொல்லைக் கொண்டே உன்னைத் தீர்ப்பிடுகிறேன்” என்கிறார் தலைவர். ஒருவேளை அந்த பணியாளர், “மன்னிக்கவும் நான் முயன்றேன் என்னால் வாணிகத்தில் வெற்றி பெற முடியவில்லை ” என சொல்லியிருந்தால் தலைவனின் கருணை கிடைத்திருக்கலாம். ஆனால் அவன் அப்படிச் சொல்லவில்லை. அவன் தனது வாய்ச்சொல்லின் மூலம் தனது செயலை நியாயப்படுத்த முயன்றான். எனவே தலைவனின் கோபத்துக்கு ஆளானான்.

Image result for ten minas parable10. “சிறியவற்றில் நம்பிக்கைக்கு உரியவராய் இருந்தால், பெரியவற்றுக்கு இறைவன் நம்மை அதிகாரியாக்குவார்” எனும் மிகப்பெரிய வாக்குறுதி இதனால் வெளிப்படுகிறது. இறைவன் நமக்கு சிறிய சிறிய வாய்ப்புகளை முதலில் வழங்குகிறார், சிறிய சிறிய பணிகளைத் தருகிறார். அவற்றில் நாம் முழு ஈடுபாட்டுடன் இருக்கும்போது நமக்கு பெரிய பெரிய அங்கீகாரங்களைத் தருகிறார். எனவே இறைவன் தருகின்ற சிறிய பணிகளைக் கூட ஆத்மார்த்தமாய்ச் செய்ய வேண்டும்.

இந்த சிந்தனைகளை மனதில் கொள்வோம்.